ಯುದನು ಬರೆದ ಪತ್ರಿಕೆ
ಯುದಾನಿ ಲಿವಲ್ಯಾಲ ಪತ್ರ
ವಳಕ್
ಯುದಾನಿ ಲಿವ್‌ಲ್ಯಾಲ ಪತ್ರ ಯುದ್ ಮಂಥ್ಯಾಲ್ಯಾನಿ ಲಿವ್‌ಲ್ಯಾ. ಯುದ್ ಆಪ್‌ಲ್ಯಾಲಾ ಆಪ್ನುಸ್ ಯೇಸುಚಾ಼ ಬಾಹು ಜಾ಼ಲ್ಯಾಲಾ ಯಾಕೊಬಾಚಾ಼ ಬಾಹು ಮನ್ಹುನ್ ಗೆಥೊ. ಮನ್ಹುನ್ ತ್ಯೊ ಸಾಹಿತ್ ಯೇಸುಚಾ಼ ಬಾಹು ಮನ್ಹುನ್ ಇಸ್ವಾಸ್ ಹಾ.1ಹ್ಯ ಪತ್ರ ಲ ಕರುನ್ ಯಕ ಸಭೆಲಾ ಲಿವ್‌ಲ್ಯಾ ಮನ್ಹುನ್ ಆಮಾನಾ ಸಮಜು಼ನ್ ಆಲ ನಾಹಿ ಆನಿ ಜು಼ನ್ಯಾ ಕರಾರಾಚಾ ಥೊಡ್ಯಾ ಖನ್ಕತಿ ಹ್ಯಾ ಪತ್‌ರ‍್ಯಾತ್ ಉಪೇಗ್ ಕೆಲ್ಯಾಲ ಬಗ್ಲ ತವಾ ಹ್ಯಾ ಪತ್‌ರ‍್ಯಾಚ಼ಾ ಮುಖ್ಯಾ ವಾಚಿವ್ನಾರ ಯೆಹುದಿ ಜಾ಼ಲ್ಯಾತ. ತರಿಬಿ ಯುದಾನಿ ಹ್ಯ ಪತ್ರ ಹಾಕಟ್‌ಲ್ಯಾಲ್ಯಾ ಸಗ್‌ಳ್ಯಾನಾ ಬಾ ಜಾ಼ಲ್ಯಾಲ್ಯಾ ದೇವಾಚೆ ಮಾಯೆಚಾ ಲೊಕಾನಾ ಆನಿ ಯೇಸು ಕ್ರಿಸ್ತಾಸಾಟಿ ಥೆವ್‌ಲ್ಯಾಲ್ಯಾನಾ ಮನ್ಹುನ್ ಲಿವ್‌ಲ್ಯಾ 1:1 ಹ್ಯ ಪತ್ರ ಖುಬ್ ಕರುನ್ ಕ್ರಿಸ್ತ್ ಜ಼ಲ್ಮುನ್ ಸಾಟ್‌ವ್ಯಾ ವರ್ಸಾತ್ ಲಿವ್‌ಲ್ಯಾ.
ಹ್ಯ ಪತ್ರ ಲಿವಾಚ಼ ತ್ಯಚಾ಼ ಉದ್ದೇಶ್ ಲಬಾಡ್ ಸಾಂಗ್‌ತ್ಯಾಲ್ಯಾಂಚಿಪ್ನಿ ಚು಼ಕಿಚೆ ವಾಟವ ಜಾ಼ವು ನಾಹಿತ ಮನ್ಹುನ್ ಸಗ್‌ಳ್ಯಾ ಇಸ್ವಾಸಿ ಲೊಕಾನಾ ಹುಶಾರ್ಕಿ ದಿಯಾಚಿ ಜಾ಼ಲ್ಥಿ 1:1-4ತ್ಯನಿ ಆಪ್ಲ್ಯಾ ಬೊಲ್ಯಾನಾ ಬಳ್ ದಿಯಾಸಾಟಿ ಜು಼ನ್ಯಾ ಕರಾರಾಚಾ ಘಟ್ನಾ ಉಪೇಗ್ ಕರ್ತೊ. ಹ್ಯ ಪತ್ರ 2 ನವ್ಯಾ ಪತರ‍್ಯಾತ್ ಆಸ್‌ಲ್ಯಾಲ್ಯಾ ಲಬಾಡ್ ಸಾಂಗ್‌ತ್ಯಾಲ್ಯಾಂಚೆ ಆಡ್ವ ಹುಶಾರ್ಕಿ ದೇವ್ದುತ್ ಆನಿ ಸೊದೊಮ್ ಗೊಮೊರ್ ಪೆಠಚಾ ಗುಶ್ಟಿ ಮಿಳಾಲ್ಯಾಚೆಗತ್ ಖುಬ್ ಗುಶ್ಟಿ ಹ್ಯಾ ಪತ್‌ರ‍್ಯಾತ್ಬಿ ಬಹಾಯಾ ವ್ಹತ 1:4,2 ಪೇತ್ರ 2:1
ಭಾಗ್‌
1. ಯುದ್ ಆಂದಿ ಆಪ್ಲ್ಯಾ ವಾಚಿವ್‌ತ್ಯಾಲ್ಯಾನಾ ದಾವುನ್ ಗೆಥೊ1:1-2
2. ನಂತರ್ ತ್ಯೊ ಲಬಾಡ್ ಸಾಂಗ್‌ತ್ಯಾಲ್ಯಾಂಚೆ ಆಡ್ವಾ ತ್ಯನಾ ಹುಶಾರ್ಕಿ ದೆತ್ಯಾಚೆಗತ್ ಲಿವಾಚ಼ ಕಾರನ್ ಸಾಂಗ್ತೊ1:3-4
3. ನಂತರ್ ಜು಼ನ್ಯಾ ಕರಾರಾತ್‌ಲ್ಯಾ ಲೊಕಾಂಚ಼ ಆನಿ ಘಟ್ನಾಂಚ಼ ಉದಾಹರನ್ ದೆತೊ 1:5-16
4. ನಂತರ್ ತ್ಯೊ ಹೆ ಹುಶಾರ್ಕಿಲಾ ತ್ಯಂಚಾ಼ ಪ್ರತಿ ಉತ್ತರ್ ಕ್ಯಾ ರಾಹ್ಯಾ ವ್ಹಯಿ ಮನ್ಹುನ್ ಸಾಂಗ್ತೊ 1:17-23
5. ಸರ್ತ್ಯಾಲಾ ದೇವಾಲಾ ಸ್ತುತಿ ಕರುನ್ ಆಪ್ಲ ಪತ್ರ ಸುಪಿವ್ತೊ1:24-25
1
1 ಯೇಸು ಕ್ರಿಸ್ತಾಚಾ಼ ಸೇವಕ್, ಯಾಕೊಬಾಚಾ಼ ಬಾಹು ಜಾ಼ಲ್ಯಾಲ್ಯಾ ಯುದಾನಿ ಹಾಕಟ್‌ಲ್ಯಾಲ್ಯಾನಾ, ಬಾ ದೇವಾಚಾ ಮಾಯೆಂಚಾನಾ, ಯೇಸು ಕ್ರಿಸ್ತಾಟಿ ರ‍್ಯಾಕ್‌ಲ್ಯಾಲ್ಯಾನಾ ಲಿವಾಚ಼ ಕ್ಯಾ ಮಂಜೆ,
2 ತುಮಾನಾ ಕರ್ನಾ, ಥಂಡ್ಪನ್, ಮಾಯಾ ಖುಬ್ ಗಾಹುನಿ.
ಲಬಾಡ್ ಸಿಕ್ಷನ್ ದೆನಾರ
3 ಮಾಯೆಂಚಾನು, ಆಮಾನಾ ಗಾವಲ್ಯಾಲೆ ರಕ್ಷನಾಚೆ಼ ಗುಶ್ಟಿತ್ ತುಮಾನಾ ಲಿವಾಯಾ ಪುರ‍್ಯಾ ಮನಾನಿ ತಾಕ್ತಿನಿ ಯತ್ನ ಕರ್ತಾನಾ, ದೇವಾಚಾ ಲೊಕಾನಾ ಶಾಶ್ವತ್ ರಾತ್ಯಾಸಾರ ಯಂಗ್ದಾಸ್ ತಾಬ್ಯಾತ್ ದಿಲ್ಯಾಲಾ ಇಸ್ವಾಸ್ ರಾಕಾಯಾ, ತುಮಿ ಲಡಾಯಾ ವ್ಹಯಿಸಾ ಮನ್ಹುನ್ ಜಾ಼ಗ್ರುತ್ ಕರುನ್ ಲಿವಾಚ಼ ಮನಾ ಗರಜ಼್ ಹಾ ಆಸಿ ದಿಸ್ಲಿ. 4 ಕಾ ಮಂಝೆ ಭಕ್ತಿ ನಸ್‌ಲ್ಯಾಲ, ಆಮ್ಚಾ ದೇವಾಚಿ ಕ್ರಪಾ ನೆವಾ ಕರುನ್ ವ್ಯಬಿಚಾರಾಚಿ ಕಾಮ ಕರ್ನಾರ, ಆಮಚಾ಼ ಯಕ್ಲಾಸ್ ದನ್ಯಿ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಚಿ ನಕ್ವಾಟ್ ಕರ್ತ್ಯಾಲಿ ಥುಡಿ ಲೊಕ ಬುರ್ಸೆ ತರನಿ ಮಂಡಳಿತ್ ಬರ್ಲ್ಯಾತ. ತೆ ಶಿಕ್ಷಾ ಸಾಟಿ ಆಂದಿಸ್ ಥರಿವ್‌ಲ್ಯಾತ ಮನ್ಹುನ್ ಪವಿತ್ರ ಗ್ರಂಥಾತ್ ಲಿವ್‌ಲ್ಯಾ.
5 ತುಮಿ ಸಗ್ಳ ಆಂದಿಸ್ ಸಮಜು಼ನ್ ಗೆತ್ಲಸಾ ತರಿ, ಮಿ ಮಾಗ್‌ಲ್ಯಾ ಥೊಡ್ಯಾ ಖನ್ಕತಿ ತುಮಾನಾ ಯಾದ್ ಕರಾಯಾವ್ಹಯಿ ಮನ್ಹುನ್ ಮನ್ ಕರ್ತೊ, ಪ್ರಭುನಿ ಆಪ್ಲ್ಯಾ ಲೊಕಾನಾ ಐಗುಪ್ತದೇಶೆತ್ನಿ ರ‍್ಯಾಕ್ಲಿತ, ನಂತರ್ ಇಸ್ವಾಸ್ ನಸ್‌ಲ್ಯಾಲ್ಯಾನಾ ನಾಸ್ ಕೆಲಿತ. 6 ಆಪ್ಲಾ ಹುಕ್ಮಾಚಾ಼ ಜಾ಼ಗಾ ರಾಕಾಚೆ ಆಂದಿ, ಆಪ್ಲಾ ಸ್ವಂತಾಚಾ಼ ಜಾ಼ಗಾ ಶೊಡ್‍ಲ್ಯಾಲ್ಯಾ ದೇವ್ ದುತಾನಾ ದೇವಾನಿ ಖಾಯಿಮ್ಚಾ ಸರ್ಪೊಳ್ಯಾ ಬಾಂದುನ್, ಮೊಟ್ಯಾ ದಿಸಾತ್ ವ್ಹತ್ಯಾಲ್ಯಾ ತೀರ್ಮಾನಾ ಸಾಟಿ ತ್ಯನಾ ಆಂದಾರಾತ್ ಥೆವ್‌ಲ್ಯಾತ. 7 ತೇಸ್ ತರನಿ ಸೊದೊಮ್ ಗೊಮೊರ್ ಪೆಟ್ಟತ್ಲಿ, ತ್ಯಂಚೆ ಸರಬವ್ಹಾರೆ ಪೆಟ್ಟತ್ಲಿ ತ್ಯಾ ದುತಾಚೆಗತ್ ಚಾ಼ಲುನ್ ಆಪ್‌ಲ್ಯಾನಾ ನೀಯತ್ ನಸ್‌ಲ್ಯಾಲ ಶಾರೀಕ್ ಸಂಬದ್ ತಾಬ್ಯಾತ್ ದಿವುನ್, ಆನಿ ಬುರ್ಸ ಜಾ಼ಲ್ಯಾಲ ಪೊದ್ಡಿ ಕಾಮ ಕರಾಯಾಲಾಗ್ಲ ಮನ್ಹುನ್ ತೇ ಶಾಶ್ವತ್ ಇಸ್‌ಥ್ಯಾತ್ ಶಿಕ್ಷಾ ಗಿಹಿತ್, ವಾಯಿಟ್ ವಾಟವಲ್ಯಾನಾ ಹೆ ಯೆಕ್ ಉದಾರನ್ ಜಾ಼ಲ್ಯಾತ.
8 ಆಸ ಆಸ್ಲತರಿ ಹಿ ಲೊಕ ತೆಸ್ ತರನಿ ಸಪ್ನಾತ್ ಆಸಲ್ಯಾಚೆಗತ್ ಆಪ್ಲ ಶರೀರ್ ಬುರ್ಸ ಕರ್ತ್ಯಾತ. ಹುಕ್ಮಾಚಿ ನಕ್ವಾಟ್ ಕರ್ತ್ಯಾತ. ಮೊಟೆ ಪದ್ವಿಚಾನಾ ಅವ್ಮಾನ್ ಕರ್ತ್ಯಾತ. 9 ಫನ್ ಖುಬ್ ಮಹತ್ವಾಚಾ಼ ಫುಡಾರಿ ದೇವ್ ದುತ್ ಜಾ಼ಲ್ಯಾಲಾ ಮಿಕಾಯೇಲಾನಿ ಮೊಶೆಚಾ ಶರೀರಾಚೆ ಗುಶ್ಟಿತ್ ಸೈತಾನಾ ಸಂಗ ವಾದ್ ಕೆಲಾ ತವಾ, ತ್ಯೊ ಸೈತಾನಾಚೆ ಆಡ್ವಾ ಯೊಕ್ ನಿಂದಚಾ಼ ಸಬ್ದ ಬೊಲಾಯಾ ಧೀರ್ ಕೆಲಾ ನಾಹಿ. “ತ್ಯಲಾ ಪ್ರಭು ತುಲಾ ಬ್ಯಾ ದಪಕ್ಯಾವುನಿ” ಮನ್ಲಾ. 10 ಫನ್ ಹಿ ಲೊಕ ಆಪ್‌ಲ್ಯಾಲಾ ಠಾವ್ಯಾ ನಸ್‌ಲ್ಯಾಲೆ ಗುಸ್ಟಿಂಚಾ಼ ರಾಗ್ ಕರ್ತ್ಯಾತ ಆನಿ ಆಪ್ನು ಜ಼ನಾವಾರಾಚೆಗತ್ ಸಾದಾರನ್ ಕ್ಯಾಚೆ ಕ್ಯಾ ಸಮಜು಼ನ್ ತ್ಯಾತ್ ಆಪ್‌ಲ್ಯಾಲಾಸ್ ನಾಸ್ ಕರುನ್ ಗೆಥ್ಯಾತ. 11 ತ್ಯಂಚಿ ಹಾಕಿಗತ್ ಕ್ಯಾ ಮನ್ಹುನ್ ಸಾಂಗು! ಕಾ ಮಂಜೆ ಹ್ಯಚಾಂನಿ ಕಾಯಿನಾಚಿ ವಾಟ್ ದರ್ಲ್ಯಾಲಿ, ಪೈಸ ಗೊಳಾ ಕರಾಯಾ ಸಾಟಿ ಬಿಳಾಮಾಚೆತ್ ಪುರಿ ಪಡ್‌ಲ್ಯಾತ, ಕೊರಹನಾಚೆಗತ್ ಮೊರ‍್ಹ ಬುಲುನ್ ನಾಸ್ ವ್ಹನಾರಿ ಜಾ಼ಲ್ಯಾತ. 12 ತೀ ಸಂಮಿದೊರಾತ್‌ಲ್ಯಾ ಆಡ್‌ಶಾ ಆಸ್‌ಲ್ಯಾಲ್ಯಾ ಅಪಾಯಾ ಶಾರ್ಕ, ತುಮ್ಚಾ ಸುಪ್ತಿ ಪನಾಚ಼ ಜೆವಾನ್ ಖಾತ್ಯಾತ ಪಿತ್ಯಾತ. ದಿರಾನಿ ಸ್ವತಾಚ಼ ಪ್ವಾಟ್ ಬರ್ನಾರ ಜಾ಼ಲ್ಯಾತ. ತೀ ವಾರ‍್ಯಾನಿ ಉಡುನ್ ಜಾ಼ತ್ಯಾಲ ಪಾನಿ ನಸಲ್ಯಾಲ ಢಗ್ ಜಾ಼ಲ್ಯಾತ, ಪೀಕ್ ಯಯಿನಸ್ನಾರ, ಪುರ ಮೆಲ್ಯಾಲ ಮುಳ್ಯಾ ಸಕಟ್ ಉಪಾಟಲ್ಯಾಲ ವಾಂಜೊ಼ಳ ಝಾ಼ಡ ಜಾ಼ಲ್ಯಾತ. 13 ಸ್ವತಾಚಾ಼ ಅವ್ಮಾನ್ ಮಂತ್ಯಾಲಾ ಫ್ಯೊಸ್ ವಕ್ನಾರ‍್ಯಾ ಸಮಿಂದೊರಾಚಾ ಮೊಟ್ಯಾ ಲಾಟಾ ಜಾ಼ಲ್ಯಾತ. ಫಿರ್‌ತ್ಯಾಲ್ಯಾ ಚಾನ್ಯಾ ಜಾ಼ಲ್ಯಾತ ಹ್ಯಂಚಿ ಸಾಟಿ ಖಾಯಿಮ್‌ಚಾ಼ ಆಂದಾರ್ ರಾಖುನ್ ಥೆವ್‌ಲ್ಯಾ.
14 ಆಸ್‌ಲ್ಯಾಂಚೆ ಗುಶ್ಟಿತ್ ಆದಾಮಾ ದರ್ನಿ ಸಾತ್ ಪಿಡಿಚಾ ಹನೊಕ್ ಸಾಹಿತ್, “ಬಗಾ, ಪ್ರಭು ಹಾಜಾ಼ರಾನಿ ಪರಿಶುದ್ಧಾನಾ ಗಿಹುನ್ ಯತ್ಯೊ, ಧರ್ಮೋಪದೇಶ 33:2 15 ಸಗ್‌ಳ್ಯಾಂಚಾ಼ ನ್ಯಾಯಿ ನಿವ್ಡಾಯಾ, ತ್ಯಂಚಾತ್ ಭಕ್ತಿ ನಸ್‍ಲ್ಯಾಲ್ಯಾ ಸಗ್‌ಳ್ಯಾಚಾಂನಿ ಕೆಲ್ಯಾಲಿ ಭಕ್ತಿ ನಸ್‌ಲ್ಯಾಲಿ ತ್ಯಂಚಾ ಸಗಳ್ಯಾ ಕಾಮಾಂಚೆ ಗುಶ್ಟಿತ್ ಆನಿ ಭಕ್ತಿ ನಸ್‌ಲ್ಯಾಲ ಪಾಪಿಂಚಾನಿ ಆಪ್ಲೆ ಆಡವ್ಯಾ ಸಾಂಗಲ್ಯಾಲ್ಯಾ ಸಗಳ್ಯಾ ಬಿರುಸ್ ಬೊಲ್ಯಾಂಚೆ ಗುಶ್ಟಿತ್ ತ್ಯನಾ ಚು಼ಕ್ ದಾವಾಯಾ ಆಲ್ಯಾ. ”
16 ಹಿ ಟುರ್ ಟುರ್‌ತ್ಯಾಲಿ, ಚಾ಼ಡಿ ಸಾಂಗ್ನಾರಿ, ಆಪ್ಲಿ ವಾಯಿಟ್ ಇಚೆಸಾರಿ ಚಾ಼ಲ್ನಾರಿ, ಬಡಾಯಿ ಸಾಂಗ್ನಾರಿ ಆಪ್ಲೆಸಾಟಿ ವವ್ಯಾಳ್ನಿಚಾ ಬೊಲ್ಯಾ ಬೊಲ್ನಾರ ಜಾ಼ಲ್ಯಾತ.
ಹುಶಾರ್ಕಿ ಆನಿ ಬಡಾಯಿ
17 ಮಾಯೆಚಾನು, ತುಮಿ ತರಿ ಆಮಚಾ಼ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಚಾ಼ ಅಪೊಸ್ತಲಾಂಚಾನಿ ಆಂದಿ ಸಾಂಗ್‌ಲ್ಯಾಲ್ಯಾ ಬೊಲ್ಯಾಂಚಿ ಯಾದ್ಕರಾ.
18 “ಬಕ್ತಿಚೆ ಆಡವ್ಯಾ ಆಸಲ್ಯಾಲ್ಯಾ ಆಪ್ಲೆ ಆಶೆಂಚೆಗತ್ ಚಾ಼ಲತ್ಯಾಲ ಖೆಡ್ಸ ಸರತ್ಯಾ ಯಳಾತ್ ಯನಾರ್ ಮನ್ಹುನ್ ತ್ಯಂಚಾನಿ ತುಮಾನಾ ಸಾಂಗ್ಲ, 19 ಹಿ ಆಪಲ್ಯಾಲಾ ಆಪ್ನುಸ್ ಯಗಳ್ನಾರ್ ಆಪ್ಲ್ಯಾ ಶರಿರಾಚೆ ಆಶೆಚೆಗತ್ ಚಾ಼ಲತ್ಯಾಲಿ ವ್ಹನಾರ್ ತ್ಯಂಚಿಪ ಪವಿತ್ರ ಆತ್ಮ ನಾಹಿ. 20 ಮಾಯೆಚಾನು, ತುಮಿತರಿ ತುಮಾನಾ ಆಸ್‌ಲ್ಯಾಲ್ಯಾ ಖುಬ್ ಪರಿಶುದ್ಧ್ ಕ್ರಿಸ್ತಾಚಾ಼ ಇಸ್ವಾಸಾಚಾ ಆಧಾರಾನಿ ಅಬಿವ್ರದಿ ವ್ಹವಾ, ಪವಿತ್ರಾತ್ಮಾನಿ ಬರುನ್ ಮಾಗ್ನಕರಾ. 21 ಶಾಶ್ವತ್ ಜೀವಾಸಾಟಿ ಆಮ್ಚಾ ಪ್ರಭು ಯೇಸು ಕ್ರಿಸ್ತಾಚಿ ಕರ್ನಾ ಮೊರ‍್ಹ ಬಗಿತ್, ತುಮಾನಾ ದೇವಾಚೆ಼ ಮಾಯಾತ್ ರಾಕಾ.
22 ಆನ್ಮಾನ್ ಖಾನಾರ‍್ಯಾವ್ನಿ ತುಮಿ ಕರ್ನಾದಾವಾ, 23 ಇಸ್‌ತ್ಯಾಚಾ ತೊಂಡಾತ್ ಆಸಲ್ಯಾಲ್ಯಾನಾ ವಡುನ್ ರಕ್ಶನ್ ಕರಾ, ಥೊಡ್ಯಾನಾ ಬೀಹಿತ್ ಕರ್ನಾ ದಾವಾ. ಶಾರೀರಿಕ್ ಚಾ಼ಲ್ನುಕಿತ್ನಿ ಘ್ಯಾನ್ ಜಾ಼ಲ್ಯಾಲ್ಯಾ ತ್ಯಂಚಾ ಕಪಡ್ಯಾಂಚಾ಼ ರಾಗ್ ಕರಾ.
ಸ್ತುತಿಚ಼ ಮಾಗ್ನ
24 ಪಡಾಚೆ಼ ಆಂದಿ ತುಮಾನಾ ರಾಕಿತ್, ಆಪ್ಲೆ ಮೈಮೆಚೆ ಮೊರ‍್ಹ ತುಮಾನಾ ನಿರ್ದೊಷಿ ಕರುನ್, ಖುಬ್ ಸಂತೊಶಾನಿ ಉಬರಾಹ್ಯಾ ತ್ಯೊ ಬಳಿ ಜಾ಼ಲ್ಯಾ. 25 ತ್ಯಲಾ ಆಮಚಾ಼ ರಕ್ಶಕ್ ಜಾ಼ಲ್ಯಾಲ್ಯಾ ಯಕ್‌ಲ್ಯಾಸ್ ದೇವಾಲಾ, ಆಮಚಾ಼ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಸ್ ಲಾಗುನ್ ಮೈಮಾ, ವೈಭವ್, ರಾಜ್ಬಾರ್, ಆನಿ ಅಧಿಕಾರ್ ಸರ್ವ್ಯಾ ಕಾಲಾತ್ ಆಂದಿ ಆತಾ ಆನಿ ಕವಾಬಿ ತ್ಯಲಾಸ್ ವ್ಹವುನಿ. ತಸಸ್ ವ್ಹವುನಿ.
1:14 ಧರ್ಮೋಪದೇಶ 33:2