1 ಸರ್ತೆ ಪಾವ್ಟಿ, ಮಾಜಾ ಬನ್ಹಿ ಬಾವ್ಹಾನು, ಪ್ರಭುಪ ಸಂತೊಶಾನಿ ರಾವ್ಹಾ, ಆಂದಿ ಸಾಂಗ್‌ಲ್ಯಾಲ್ಯಾ ತ್ಯಾ ಗುಶ್ಟಿ ಪರ್ತುನ್ ತುಮಾನಾ ಲಿವಾಯಾ ಕಂಟಾಳಾ ಕರಿತ್ನಾಹಿ, ಫನ್ ತ್ಯ ತುಮಾನಾ ಜ಼ಪುನ್ ಥೆವ್ನಾರ್. 2 ತ್ಯ ಬುರ್ಸ ಕಾಮ್ ಕರ್ತ್ಯಾಲ್ಯಾ ಕುತ್‌ರ‍್ಯಾಂಚಿಪ್ನಿ ಹುಶಾರ್ ರಾವ್ಹಾ, ಮುಂಜಿ ಮನ್ಹುನ್ ಸಾಂಗುನ್ ಶರೀರ್ ಬಲಿ ದೆತ್ಯಾಲ್ಯಾಂಪ್ನಿ ಹುಶಾರ್ ರಾವ್ಹಾ. 3 ಖರ‍್ಯಾನಿ ಮುಂಜಿ ಕೆಲ್ಯಾಲ ಕೊನ್ ಮಂಜೆ, ದೆವಾಚಾ ಆತ್‍ಮ್ಯಾನಿ ಬರ‍್ಹುನ್ ವವ್ಯಾಳ್ನಾರ ಯೆಸು ಕ್ರಿಸ್ತಾಪ ಸಂತೊಶ್ ವ್ಹತ್ಯಾತ ಆನಿ ಶರಿರಾಲಾ ಜು಼ಡುನ್ ಆಸ್‍ಲ್ಯಾಲ್ಯಾವ ಆಶಾ ಥೆವ್ನಾರ ಇಸ್ವಾಸ್ ನಸ್ನಾರ ಜಾ಼ಲ್ಯಾಲ ಆಮಿಸ್. 4 ಮಿ ತರಿ ಶರಿರಾಲಾ ಸಮ್ಮನ್ ಆಸಲ್ಯಾಲ್ಯಾವ ಇಸ್ವಾಸ್ ಥೆವಾಯಾ ಆವ್ಕಾಸ್ ಹಾ. ದುಸರ್ಯಾನಿ ಕುನಿತರಿ ಶರಿರಾಲಾ ಸಮನ್ಆಸ್‌ಲ್ಯಾಲ್ಯಾವ ಆಶಾ ಥೆವಾಯಾ ವ್ಹಯಿ ಮನ್ಹುನ್ ಯವಜಾ಼ಚ಼ ಜಾ಼ಲ್ಯಾವ ತ್ಯಚಿವ್ನಿ ಆಗಾವ್ ತಸ ಯವಜಾ಼ಯಾ ವ್ಹಯಿಲ್. 5 ಜ಼ಲಾಮ್‌ಲ್ಯಾಲ್ಯಾ ಆಟ್ವೆ ದಿಸಿ ಮಾಜಿ ಮುಂಜಿ ಜಾ಼ಲಿ, ಮಿ ಇಸ್ರಾಯೆಲ್ ಲೊಕಾತ್ಲಾ, ಬೆನ್ಯಾಮಿನ್ ವಂಶಾತ್ಲಾ, ಇಬ್ರಿಯಾಂಚಿಪ್ನಿ ಜ಼ಲಾಮ್‍ಲ್ಯಾಲಾ ಇಬ್ರಿಯ, ದರ್ಮಶಾಸ್ತಾರಾಚೆಗತ್ ಬಗ್‍ಲ್ಯಾವ ಮಿ ಪರಿಸಾಯ್. 6 ಫನ್ ಧರ್ಮಾನಿ ಬಗಾಯಾ ವ್ಹಯಿತ ಮಿ ಕ್ರಿಸ್ತ ಮಂಡಳಿಲಾ ತರಾಸ್ ದಿಲ್ಯಾಲಾ, ದರ್ಮಶಾಸ್ತಾರಾತ್ ಸಾಂಗ್‍ಲ್ಯಾಲಿ ನೀಯತ್ ಬಗ್‍ಲ್ಯಾವ ಮಿ ದೊಸ್ ನಸ್ನಾರಾ. 7 ತರಿಬಿ ಮಾಜ಼ ಫ್ಯಾಯ್‍ದ್ಯಾಚ಼ ಸಗ್ಳ ಕ್ರಿಸ್ತಾಸಾಟಿ ಲುಕ್ಷಾನಿಚ಼ ಮನ್ಹುನ್ ಸಮ್‍ಜ಼ುನ್ ಗೆತ್ಲ. 8 ಯವ್ಡಸ್ ನವ್ಹ, ಮಾಜಾ಼ ಪ್ರಭು ಜಾ಼ಲ್ಯಾಲ್ಯಾ ಕ್ರಿಸ್ತ ಯೆಸುಲಾ ಸಮಜು಼ನ್ ಗಿಹ್ಯಾಚ಼ಸ್ ಖುಬ್ ಬರ ಮನ್ಹುನ್ ಬಾಕಿಚ಼ ಸಗ್ಳ ಲುಕ್ಷಾನಿಚ಼ ಮಂತೊ. ಮನಾ ಕ್ರಿಸ್ತಾಚಾ಼ ಫ್ಯಾಯ್ದಾ ವ್ಹಯಾ ಪ್ಯಾಯ್ದಾ ಜಾ಼ಲ್ಯಾಲ ಬಾಕಿ ಸಗ್‍ಳ್ಯಾಲಾ ಕ್ಯೊರ್ ಮಂತ್ಯೊ. 9 ಹ್ಯಾತ್ ಮಾಜ಼ ಮನ್ಹ ಕ್ಯಾ ಮಂಜೆ, ಮಿ ಕ್ರಿಸ್ತಾಲಾ ಕಮವುನ್, ದರ್ಮಶಾಸ್ತಾರಾಚ಼ ಫಳ್ ಜಾ಼ಲ್ಯಾಲೆ ಸ್ವತಾಚೆ ನೀಯತಿಲಾ ನವ್ಹ, ಕ್ರಿಸ್ತಾವ ಇಸ್ವಾಸ್ ಥೆವಲ್ಯಾಲ್ಯಾಸ್ ಲಾಗುನ್ ಗಾವತ್ಯಾಲ ಮಂಜೆ ಕ್ರಿಸ್ತಾವಲ್ಯಾ ಇಸ್ವಾಸಾಚಾ ಆದಾರಾನಿ ದೆವ್ ದೆತ್ಯಾಲಿ ನಿಯೆತ್ ಗಿಹುನ್ ಕ್ರಿಸ್ತಾಪ ರಾಥ್ಯಾಲಾ ವ್ಹಯಾ ವ್ಹಯಿ. 10 ತ್ಯಲಾ ಆನಿ ತ್ಯಚಾ ಪುನರುತ್ತಾನಾತ್ ಆಸ್‍ಲ್ಯಾಲ್ಯಾ ಬಳಾಲಾ, ತ್ಯಚಾ ತರಾಸಾತ್ ವಾಟದಾರ್ ಜಾ಼ಲ್ಯಾಲೆ ಪದ್ವಿಲಾ ಸಮಜ಼ುನ್ ತ್ಯಚಾ ಮರ್ನಾಚೆ ಗುಸ್ಟಿತ್ ತ್ಯಚಿಗತ್ ವ್ಹಯಾವ್ಹಯಿ ಮನ್ಹುನ್ ಮಾಜ಼ ಮನ್. 11 ಆಸ ಜಾ಼ಲ್ಯಾವ ಮೆಲ್ಯಾಲ್ಯಾತ್ ಥೊಡ್ಯಾನಾ ವ್ಹತ್ಯಾಲ್ಯಾ ಪುನರುಥಾನಾಚ಼ಾ ಅನ್ಬವ್ ಮನಾಬಿ ವ್ಹಯಿಲ್.

12 ಯವ್‌ಡ್ಯಾತ್ ಮಿ ಹ್ಯ ಸಗ್ಳ ಗಿಹುನ್ ಪುರ್ನ ಜಾ಼ಲ್ಯೊ ಮನ್ಹುನ್ ಸಾಂಗಿತ್ನಾಹಿ. ಫನ್ ಮಿ ಕಚ಼ ಗಿಹ್ಯಾಸಾಟಿ ಕ್ರಿಸ್ತ ಯೆಸುನಿ ಮನಾ ದರ್ಲ್ಯಾ ತ್ಯ ಗಿಹ್ಯಾಸಾಟಿ ತ್ಯಚೆ ಮಾಗ ಲಾಗ್‍ಲ್ಯೊ. 13 ಬನ್ಹಿ ಬಾವ್ಹಾನು ಮನಾ ಗಾವಲ್ಯಾ ಮನ್ಹುನ್ ಮಿ ಆಜು಼ನ್ ಸಮಜ಼ುನ್ ಗೆತ್ಲನಾಹಿ. ಫನ್ ಯಾಕ್, ಮಿ ಮಾಗ್‍ಲ್ಯಾ ಗುಸ್ಟಿ ಇಸ್ರುನ್ ಮೊರಲ್ಯಾ ದರಾಯಾ ಶಾತಿ ಫುಗುವುನ್, 14 ದೆವಾನಿ ಕ್ರಿಸ್ತಾಸ್ಲಾಗುನ್ ಆಮಾನಾ ಮೊಟ್ಯಾ ಫನಾಲಾ ಹಾಕ್ಟುನ್ ಆಮಾನಾ ಥೆವ್‌ಲ್ಯಾಲ್ಯಾ ಬಕ್ಷಿಸಾವ್ಲಾ ಮುಜ಼್ರಾ ಪೊಚಾ಼ಯಾಸಾಟಿ ಪಳ್‍ತ್ಯೊ.

15 ಆಮ್ಚಿಪ ತಯಾರ್ ಆಸ್‍ಲ್ಯಾಲಿ ಸಗ್ಳಿ ಹೆ ಗುಸ್ಟಿತ್ ಹ್ಯಾಸ್ ಇಚಾರಾತ್ ರಾವ್ಹಾ. ಆನಿ ಕಚೆತರಿ ಯಕ ಗುಸ್ಟಿತ್ ದಿಸ್ರಾ ಇಚಾರ್ ಕೆಲಾಸಾತ ತ್ಯೊ ದೆವ್ ತುಮಾನಾ ದಾವುನ್ ದೆನಾರ್. 16 ಆಮಿತರಿ, ಕಚಾ ನೇಮಾನಿ ಇತ್ಪರ‍್ಯಾತ್ ಆಲ್ಯಾವ್ ತ್ಯಾ ನೆಮಾಚೆಗತುಸ್ ಚಾ಼ಲುಯಾ.

17 ಬನ್ಹಿ ಬಾವ್ಹಾನು, ತುಮಿ ಸಗ್ಳಿ ಮಾಜಿ ಸಂಗ ಮಿಳುನ್ ಮಾಜಿಗತ್ ಚಾ಼ಲತ್ಯಾಲಿ ವ್ಹವಾ ಆನಿ ಆಮಿ ಸಾಂಗ್‌ಲ್ಯಾಲ್ಯಾ ನೆಮಾಶಾರ್ಕಿ ಚಾ಼ಲತ್ಯಾಲ್ಯಾಂಚಿವ ಧ್ಯಾನ್ ರಾಹುನಿ. 18 ಕಾಮಂಜೆ ಖುಬ್ ಜಾ಼ನ್ ಕ್ರಿಸ್ತಾಚೆ ಶಿಲಬೆಚ಼ ವಾದಿ ವ್ಹವುನ್ ಚಾ಼ಲತ್ಯಾತ. ತ್ಯಂಚೆ ಗುಸ್ಟಿತ್ ತುಮಾನಾ ಖುಬ್ ಖೆಪಾ ಸಾಂಗ್‍ಲ್ಯಾ ಮನ್ಹುನ್ ಆತಾಬಿ ರಡುನ್ ಸಾಂಗ್ತೊ. 19 ಶೆವಟ್ ತ್ಯಂಚಾ಼ ನಾಸುಸ್, ಪ್ವಾಟ್ ತ್ಯಂಚಾ಼ ದೆವ್, ಲಾಜ಼ಚಾ ಕಾಮಾತ್ನಿಸ್ ತ್ಯನಾ ಮರ‍್ಯಾದ್, ತಿ ದುನೆತ್‍ಲ್ಯಾ ಗುಸ್ಟಿಂಚಾ಼ ಇಚಾರ್ ಕರತ್ಯಾತ. 20 ಆಮಿತರಿ ಸ್ವರಗಾತ್ಲಿ ಪ್ರಜಾ, ಪ್ರಭು ಜಾ಼ಲ್ಯಾಲಾ ಯೇಸು ಕ್ರಿಸ್ತ ತಿತ್ನಿಸ್ ರ‍್ಯಾಕ್ನಾರಾ ವ್ಹವುನ್ ಯಯಾಚಿ ವಾಟ್ ಬಗ್‍ತ್ಯಾಲ ಹಾವ್. 21 ತ್ಯೊ ಸಗ್ಳ ಆಪ್‍ಲ್ಯಾ ತಾಬ್ಯಾತ್ ಗಿಹ್ಯಾ ಬಳ್ ಗಿಹುನ್ ನೀಚ಼್ ಸ್ಥಿತಿತ್ ಆಸ್‍ಲ್ಯಾಲ ಆಮ್ಚ ಶರಿರ್ ಉಜಿಡಾಚಾ ಆಪ್‌ಲ್ಯಾ ಶರಿರಾಚೆಗತ್ ಕರ್ನಾರ್.