1 ನಂತರ್ ಸಮಿಂದೊರಾತ್ನಿ ಯಾಕ್ ಜ಼ನಾವಾರ್ ಬಾಹಿರ್ ಯತ್ಯಾಲ ಮೀ ಬಗ್ಲ ತ್ಯಲಾ ಧಾ ಸಿಂಗ ಸಾತ್ ಡೊಯಾ ತ್ಯಚಾ ಪರತೇಕ್ ಸಿಂಗಾವ ಯಾಕ್ ಯಾಕ್ ಕಿರಿಟ್ ಹುತ್ತ ಪರತೇಕ್ ಡುಯಿವ ದೇವಾಲಾ ಕಳಂಕಾ ಆಂತ್ಯಾಲ ನಾವ್ ಲಿವ್ಲಹುತ್ತ. 2 ಹ್ಯ ಜ಼ನಾವಾರ್ ಬಗಾಯಾ ನ್ಯಾನ್‌ಗ್ಯಾಚೆಗತ್ ಹುತ್ತ. ತ್ಯಚ಼ ಪ್ಯಾ ಆಸ್ವಲಿಚಾ ಪಾಯಾಚೆಗತ್ ಹುತ್ತ ತ್ಯಚ಼ ತ್ವಾಂಡ್ ಸಿವಾಂಚಾ ತೊಂಡಾಚೆಗತ್ ಹುತ್ತ. ಖತರ್ನಾಕ್ ಸಾಪಾನಿ ತ್ಯಾ ಜ಼ನಾವಾರಾಲಾ ಆಪ್ಲ ಬಳ್ ಆನಿ ಸಿಂಹಾಸನಾವ ಖುಬ್ ಹುಕುಮ್ ದಿಲಾ.

3 ಜ಼ನಾವಾರಾಚೆ ಡುಯಿತ್ ಯೇಕ್ ಡುಯಿ ಜ಼ಖಮ್ ವ್ಹವುನ್ ಮರ್ತ್ಯಾಚೆಗತ್ ದಿಸ. ಫನ್ ತ್ಯೊ ಜ಼ಖಮ್ ಬರ ಜಾ಼ಲ್ಹ. ಹೇ ದುನೆತ್ಲಿ ಲೊಕ ಸಗ್ಳಿ ಗಾಬ್ರುನ್ ತ್ಯಾ ಜ಼ನಾವಾರಾಚೆ ಮಾಗ್ನಿ ಗಿಲಿತ. 4 ಖತರ್ನಾಕ್ ಸಾಪಾನಿ ಆಪ್ಲ ಬಳ್ ಸಗ್ಳ ತ್ಯಾ ಜ಼ನಾವಾರಾಲಾ ದಿಲ್ಯಾ ಮನ್ಹುನ್ ಲೊಕ ಸಗ್ಳಿ ತ್ಯಾ ಸಾಪಾಲಾಬಿ ಆನಿ ಜ಼ನಾವಾರಾಲಾಬಿ ವವ್ಯಾಳುನ್, “ಜ಼ನಾವಾರಾವ್ನಿ ಖುಬ್ ಬಳ್ ಆಸ್‌ಲ್ಯಾಲಿ ಕೊನ್ ಹಾತ್ತ? ತ್ಯಚಿ ಸಂಗ ಕೊನ್ ಲಡ್ನಾರ್? ಮನ್ಹಿತಿತ.

5 ತ್ಯಾ ಜ಼ನಾವಾರಾಲಾ ಬಡಾಯಿಚಾ ಬೊಲ್ಯಾ ಅವ್ಮಾನಾಚಾ ಬೊಲ್ಯಾ ಬೊಲಾಯಾ ಹುಕುಮ್ ದಿಲ್ತಾ. ತ್ಯಾ ಜ಼ನಾವಾರಾಲಾ ತ್ಯಚ಼ ಬಳ್ ಚಾಳ್ಸಾವದೋನ್ ಮೈನ್ಯಾ ಪರತ್ ವಾಪ್ರಾಯಾ ಹುಕುಮ್ ದಿಲ್ತಾ. 6 ತ್ಯಾ ಖತರ್ನಾಕ್ ಜ಼ನಾವಾರಾನಿ ದೇವಾಲಾ ತ್ಯವ್ಡಸ್ ನವ್ಹ ತ್ಯಚಾ ನಾವಾಲಾ ತ್ಯೊ ರಾಥ್ಯಾಲ್ಯಾ ಜಾ಼ಗ್ಯಾಲಾ ಆನಿ ಸ್ವರ್ಗಾತ್ ಆಸ್‌ಲ್ಯಾಲ್ಯಾ ಲೊಕಾನಾ ಸಗ್‌ಳ್ಯಾ ನಿಂದಾ ಕೆಲಿ. 7 ದೇವಾಚಾ ಲೊಕಾಂಚೆ ಆಡ್ವಿ ಲಡಾಯಿಕರುನ್, ತ್ಯನಾ ಪ್ಯಾಡ್‌ತ್ಯಾಲ ಬಳ್ ಜ಼ನಾವಾರಾಲಾ ದಿಲ್ಯಾ ಸಗ್ಳೆ ದೆಶವ ಸಗ್‌ಳ್ಯಾ ಕುಳಾವ ಸಗ್ಳೆ ಬಾಶೆವ ಆನಿ ಲೊಕಾಂಚಿವ ಹುಕುಮ್ ತ್ಯಾ ಜ಼ನಾವಾರಾಲಾ ದಿಲ್ತಾ. 8 ದುನೆತ್ ಜೀವ್ನಾ ಕರ್ತ್ಯಾಲಿ ಲೋಕ ಸಗ್ಳಿ ತ್ಯಾ ಖತರ್ನಾಕ್ ಜ಼ನಾವಾರಾಲಾ ವವ್ಯಾಳ್‌ತ್ಯಾತ ದುನೆ ಸುರ್ವಾತ್ ಜಾ಼ಲ್ಯಾದರ್ನಿ ಮಾರುನ್‍ಟ್ಯಾಕ್‌ಲ್ಯಾಲ ಮಿಂಡುರ್ ಜಾ಼ಲ್ಯಾಲ್ಯಾಚಾ ಜೀವಾಚಾ ಪುಸ್ತಕಾತ್ ಕುನಾಚಿ ನಾವ ಲಿವ್ಲಿ ನಾಹಿತ ತೀಸ್ ಹಿ ಲೊಕ.

9 ಕುನಾಲಾ ಕಾನ್ ಹಾತ್ತ ತ್ಯೊ ಐಕುನಿ: 10 ತುರುಂಗಾತ್ ನೆನ್ಹಾರಾ ತುರುಂಗಾತುಸ್ ಜಾ಼ನಾರ್ ಥಲ್ವಾರಾನಿ ಮ್ಯಾರ್ನಾರಾ ಥಲ್ವಾರಾನಿಸ್ ಮರ್ನಾರ್

11 ನಂತರ್ ದರ್ಥಿವ್ನಿ ಬಾಹಿರ್ ಯತ್ಯಾಲ ಆನಿ ಯಾಕ್ ಖತರ್ನಾಕ್ ಜ಼ನಾವಾರ್ ಮೀ ಬಗ್ಲ. ತ್ಯಲಾ ಮೆಂಡ್ರಾಚೆಗತ್ ದೊನ್ ಸಿಂಗ ಹುತ್ತಿತ ಫನ್ ತ್ಯ ಖತರ್ನಾಕ್ ಸಾಪಾಚೆಗತ್ ಬೊಲತ. 12 ಹ್ಯ ಖತರ್ನಾಕ್ ಜ಼ನಾವಾರ್ ಪೈಲ್ಯಾ ಜ಼ನಾವಾರಾಚಾ಼ ಹುಕುಮುಸ್ ವಾಪ್ರಿತ. ದರ್ಥಿವ ಜೀವ್ನಾ ಕರ್ತ್ಯಾಲಿ ಲೊಕ ಸಗ್ಳಿ ಪೈಲ್ಯಾ ಜ಼ನಾವಾರಾಲಾ ವವ್ಯಾಳ್‍ತ್ಯಾಚೆಗತ್ ಕರಾಯಾ ತ್ಯ ಆಪ್ಲಿ ಬಳ ಸಗ್ಳಿ ವಾಪ್ರಿತ ಜ಼ಖ್ಮತ್ನಿ ಬರ ಜಾ಼ಲ್ಯಾಲಸ್ ಪೈಲ ಜ಼ನಾವಾರ್. 13 ಹ್ಯ ದೊನ್ವ ಜ಼ನಾವಾರ್ ಮೊಟಿ ಚಮತ್ಕಾರಾಚಿ ಕಾಮ ಕರ್ತ. ತ್ಯ ಲೊಕಾಂಚೆ ನದ್ರ ಮೊರ‍್ಹ ಇಸ್ಥು ಆಬ್ಳಾತ್ನಿ ದರ್ಥಿವ ವತ್ತ.

14 ಹ್ಯ ದೊನ್ವ ಜ಼ನಾವಾರ್ ಚಮತ್ಕಾರ್ ಕರಾಯಾ ಆಪ್‌ಲ್ಯಾಲಾ ದಿಲ್ಯಾಲ್ಯಾ ಬಳಾನಿ ದರ್ಥಿವ್‌ಲ್ಯಾ ಲೊಕಾನಾ ಖುಳ ಕರ್ತ. ಪೈಲ್ಯಾ ಜ಼ನಾವಾರಾಚಿ ಸೇವಾ ಕರಾಯಾ ತ್ಯ ಹಿ ಚಮತ್ಕಾರ ಕರ್ತ. ಥಲ್ವಾರಾನಿ ಜ಼ಖಮ್ ಜಾ಼ಲ್ಯಾಲ್ಯಾ ಮರಾಚೆಆಂದಿ ಆಸಲ್ಯಾಲ್ಯಾ ಪೈಲ್ಯಾ ಜ಼ನಾವಾರಾಲಾ ಮರ‍್ಯಾದ್ ದಿಯಾ ಪಾಶಾನ ಬನ್ವಾಯಾಸಾಟಿ ತ್ಯ ಲೊಕಾನಾ ಮೊಸ್ ಕರ್ತ. 15 ಪೈಲ್ಯಾ ಜ಼ನಾವಾರಾಚಾ ಪಾಶಾನಾಲಾ ಜೀವ್ ಯಯಿಸ ಕರಾಯಾ ಬಳ್ ದೊನವ್ಯಾ ಜ಼ನಾವಾರಾಲಾ ದಿಲ್ತ ತವಾ ತ್ಯಾ ಪಾಶಾನಾಲಾ ಬೊಲಾಚ಼ ಬಳ್ ಆಲ್ತ. ತ್ಯನಿ ಆಪ್‍ಲ್ಯಾಲಾ ಪುಜಿತ್ ನಸ್‌ಲ್ಯಾಲ್ಯಾನಾ ಮಾರುನ್ ಟಾಕಾಚಿತ ಮನ್ಹುನ್ ಆಜ್ಞಾ ಕಿಲ್ತಿ. 16 ದೊನ್ವ ಜ಼ನಾವಾರ್ ಸಾಹಿತ್ ಸಗ್‌ಳ್ಯಾನಾ ಮಂಜೆ ಬ್ಯಾರ್ಕ್ಯಾನಾ ಮೊಟ್ಯಾನಾ ಸಾವ್ಕಾರಾ ಗರಿಬಾನಾ ಗುಲಾಮಾನಾ ಆನಿ ತಾಬ್ಯಾತ್ ನಸ್‌ಲ್ಯಾಲ್ಯಾನಾ ಆಪಲ್ಯಾ ಉಜ಼ವ್ಯಾ ಹಾತಾವ ನಾಹಿತ ಆಪ್‌ಲ್ಯಾ ಕಪಾಳಾವ ವಳಕ್ ಕರುನ್ ಗಿಹ್ಯಾ ವ್ಹಯಿ ಮನ್ಹುನ್ ಬಳ್ ಕರ್ತ. 17 ಹಿ ವಳಕ್ ನಸ್ಥಾನಾ ಕುನಿ ಗಿಹು ನಾಹಿ ಆನಿ ಇಕು ನಾಹಿ. ಹೀ ವಳಕ್ ಕ್ಯಾ ಮಂಜೆ ತ್ಯಾ ಜ಼ನಾವಾರಚ಼ ನಾವ್ ನಾಹಿತ ತ್ಯಚಾ ನಾವಾಚಾ಼ ನಂಬರ್.

18 ಸಮಾಜ್ನಾ಼ರಾ ಮಾನುಸ್ ಜ಼ನಾವಾರಾಚಾ಼ ನಂಬರ್ ತ್ಯಚಾ಼ ಅರ್ಥ ಸಮಜು಼ನ್ ಗಿಹುನಿ. ಹಿತ್ತ ಗಿನ್ಯಾನಾಚಿ ಗರಜ಼್ ಹಾ ಹ್ಯೊ ನಂಬರ್ ಯಕಾ ಮಾನ್ಸಾಚಾ಼ ನಂಬರ್ ಜಾ಼ಲ್ಯಾ. ತ್ಯಚಾ಼ ನಂಬರ್ ಸಾಸೆ ಸಾಟಾವ ಸಾ.