1 ಮಾಜಾ ಭನ್ಹಿ ಭಾವ್ಹಾನು, ಮಾಜಿ ಲೋಕ ರಕ್ಷನ್ ಗಿಹ್ಯಾ ವ್ಹಯಿತ ಮನ್ಹುನ್ ಮನಾ ಖುಬ್ ಆಶಾ ಹಾ. ಮೀ ದೇವಾಪ ತ್ಯಂಚಿಸಾಟಿ ಮಾಗ್ನ ಕರ್ತೊ. 2 ತ್ಯನಾ ದೇವಾಪ ಖುಬ್ ಭಕ್ತಿ ಹಾ ಹ್ಯಲಾ ಮೀ ವಳಕ್ ದೇತೊ. ಫನ್ ತ್ಯಂಚಿ ಭಕ್ತಿ ಖರ‍್ಯಾಚಾ ಗಿನ್ಯಾನಾವ ಟಿಕುನ್ ನಾಹಿ. 3 ದೆವಾಪ್ನಿ ಗಾವತ್ಯಾಲಿ ನೀಯತ್ ತ್ಯನಾ ಠಾವಿ ನಸ್ತಾನಾ ಸ್ವತಾಚಿ ನಿಯೆತ್ ಸ್ತಾಪನ್ ಕರಾಯಾ ವ್ಹಯಿ ಮನ್ಹುನ್ ದೆವಾಚೆ ನಿಯೆತಿಲಾ ವಾಕ್ಲಿ ನಾಹಿತ. 4 ಆಪ್ಲಿವ ಇಸ್ವಾಸ್ ಥೆವ್ನಾರಾ ಪರತೇಕ್ ಜಾ಼ನ್ ನೀತಿಚಾ಼ ತೀರ್ಮನ್ ವ್ಹಯಾಸಾಟಿ ಕ್ರಿಸ್ತಾನಿ ದರ್ಮಶಾಸ್ತಾರ್ ಪೂರ್ನ ಕೇಲ.

5 ಧರ್ಮಶಾಸ್ತಾರಾಚ಼ ಐಕುನ್ ತ್ಯಚಿಗತ್ ಚಾ಼ಲತ್ಯಾಲಾ ನಿಯತಿಚಾ಼ ಮನ್ಹುನ್ ಗೆಥ್ಯಾಲ್ಯಾಸ್ ಲಾಗುನ್ ಮೊಶೆನಿ ಆಸ ಲಿವ್‍ಲ್ಯಾ “ಧರ್ಮಶಾಸ್ತಾರ್ ಕೊನ್ ಪ್ಯಾಳ್ತೊ ತ್ಯೊ ಜೀವ್ನಾ ಕರ್ತೊ. ” 6 ಫನ್ ಇಸ್ವಾಸಾನಿ ದೇವಾಚೆ ಮೊರ‍್ಹ ನೀಯತಿಚ಼ ಮನ್ಹುನ್ ಗೆಥ್ಯಾಲ್ಯಾಸ್ ಲಾಗುನ್ ಪವಿತ್ರ ಪುತೀಕ್ ಆಸ ಸಾಂಗ್ತ, “ತು ತುಲಾಸ್ ಕಾಯ್ ಆಸ ಇಚಾರು ನಕೊಸ್ ಕ್ರಿಸ್ತಾಲಾ ಸ್ವರ್ಗಾತ್ನಿ ಖಾಲ್ ಹಾಕ್ಟುನ್ ಆನಾಯಾ ಕೊನ್ ಜಾ಼ನಾರ್? 7 ನಾಹಿತ ತುಲಾಸ್ ತು ಆಸ ಇಚಾರು ನಕೊಸ್ ಕ್ರಿಸ್ತಾಲಾ ಮೇಲ್ಯಾಲ್ಯಾತ್ನಿ ಆನಾಯಾ ಪಾತಾಳಾತ್ ಕೊನ್ ಜಾ಼ನಾರ್?

8 ಪವಿತ್ರ ಪುತೀಕ್ ಆಸ ಸಾಂಗ್ತ. “ದೇವಾಚಿ ವಚ಼ನ ತುಮ್ಚೆ ಜ಼ವಳುಸ್ ಹಾತ. ತಿ ತುಮ್ಚಾ ತೊಂಡಾತ್ ತುಮ್ಚಾ ಮನಾತ್ ಹಾತಾ” ಹೀಸ್ ಇಸ್ವಾಸಾಚಿ ವಚ಼ನ ಪರಚಾರ್ ಕರ್ತಾವ್. 9 ಫನ್ ಯೇಸುಸ್ ಪ್ರಭು ಮನ್ಹುನ್ ತುಜಾ ತೊಂಡಾನಿ ಸಾಂಗ್ಲತ ಆನಿ ದೇವಾನಿ ಕುನಾಲಾ ಮರ್ನಾತ್ನಿ ಉಠಿವಲ್ಯಾ ತ್ಯಚಿವ ತುಮಿ ಇಸ್ವಾಸ್ ಥೆವ್ಲಾಸಾತ ತುಮಿ ರಕ್ಶನ್ ಗೆನ್ಹಾರ್. 10 ಕಾ ಮಂಜೆ ವ್ಹಯ್ ಆಮಿ ಆಮ್ಚಾ ಮನಾತ್ ಇಸ್ವಾಸ್ ಥೆವ್‌ಲ್ಯಾಲ್ಯಾಸ್ ಲಾಗುನ್ ನೀಯತಿಚಿ ವ್ಹನಾರ್ ಇಸ್ವಾಸ್ ಥೆವ್ತಾವ್ ಮನ್ಹುನ್ ತೊಂಡಾನಿ ಸಾಂಗ್‌ತ್ಯಾಲ್ಯಾನಿ ರಕ್ಶನ್ ಗೆಥಾವ್. 11 ಪವಿತ್ರ ಪುತೀಕ್ ಆಸ ಸಾಂಗ್ತ. “ಕೋನ್ ತ್ಯಚಿವ ಇಸ್ವಾಸ್ ಥೆವ್ತೊ ತ್ಯೊ ಫಸತ್ ನಾಹಿ” 12 ಕಾ ಮಂಜೆ ಯೆಹುದ್ಯಾನಾ ಯೆಹುದಿ ನಸ್‌ಲ್ಯಾಲ್ಯಾನಾ ಕಾಯ್ ಫರಕ್ ನಾಹಿ. ಸಗ್‌ಳ್ಯಾನಾ ಯೋಕುಸ್ ಪ್ರಭು ದೇವ್. ಕೋನ್ ಹಾಳಿ ಮ್ಯಾರ್ತೊ ತ್ಯಲಾ ತ್ಯೊ ಖುಬ್ ಆಶಿರ್ವಾದ್ ದೇತೊ. 13 ಪವಿತ್ರ ಪುತೀಕ್ ಸಾಂಗ್‌ತ್ಯಾಚೆಗತ್ ಕೋನ್ ಪ್ರಭುಚಾ ನಾವಾನಿ ಹಾಕಟೊ ತ್ಯಲಾ ರಕ್ಶನ್ ವ್ಹನಾರ್. *ಯೋವೆಲ್ 2:32

14 ಫನ್ ಕೋನ್ ತ್ಯಚಿವ ಇಸ್ವಾಸ್ ಥಿವಿತ್ ನಾಹಿ ತ್ಯಲಾ ಕಸಿ ಹಾಳಿ ಮ್ಯಾರ್ನಾರ್? ಕಚಾನಿ ಪ್ರಭುಚ಼ ವಚ಼ನ್ ಐಕ್ಲ ನಾಹಿ ತ ತೀ ತ್ಯಚಿಪ ಇಸ್ವಾಸ್ ಕಸಾ ಥೆವ್ನಾರ್? ಆನಿ ಯಕಾನಿ ಸಾಂಗಾಚೆ ಆಂದಿ ಪ್ರಭುಚೆ ಗುಶ್ಟಿತ್ ಐಕಾಚ಼ ತರಿ ಕಸ? 15 ಪ್ರಚಾರ್ ಕರಾಯಾ ಕುನಾಲಾ ಲಾವುನ್ ದಿಲಾ ನಾಹಿ ಮಂಜೆ ತ್ಯೊ ಪ್ರಚಾರ್ ಕರ್ನಾರ್ ಕಸಾ? ಮನ್ಹುನ್ ಪವಿತ್ರ ಪುತಿಕಾತ್ ಸಾಂಗ್‍ತ್ಯಾ ಶಾರ್ಕ ಚಾಂಗ್ಲಿ ಖಬರ್ ಸಾಂಗ್‍ತ್ಯಾಂಲ್ಯಾಂಚಿ ಪಾವ್ಲ ಕ್ಯವ್ಡಿ ಶಾದ್ರಿ ಹಾತ್ತ! †ಯೇಶಾಯ್. 52:7.

16 ಫನ್ ಸಗ್‍ಳ್ಯಾಂಚಾನಿ ಬರಿ ಖಬರ್ ಗೀತ್ಲಿ ನಾಹಿ. ಯೇಶಾಯ್ ಸಾಂಗ್ತೊ, “ಪ್ರಭು ಆಮ್ಚಿ ವಚ಼ನ ಕುನಿ ಐಕ್ಲಿತ ಇಸ್ವಾಸ್ ಥೆವ್ಲಾ? ‡ಯೆಶಾಯ್ 53:1 17 ಆಸ ಆಸ್ಥಾನಾ ವಚ಼ನ ಐಕ್‌ನ್ಯಾನಿ ಇಸ್ವಾಸ್ ಯತೊ. ವಚ಼ನ್ ಐಕ್‍ತಾನಾ ಇಸ್ವಾಸ್ ಯತೊ ಆನಿ ಕ್ರಿಸ್ತಾಚಾ ವಾಕ್ಯಾ ಐಕ್ತಾನಾ ಬಾತ್ನಿ ಯತಿ.

18 ಫನ್ ಲೋಕಾಂಚಾನಿ ಬರಿ ಖಬರ್ ಐಕ್ಲಿ ನಾಹಿಕ್ಯಾ? ಮನ್ಹುನ್ ಮೀ ಪ್ರಶ್ನೆ ಕರ್ತೊ. ವ್ಹಯ್ ತೆಂಚಾನಿ ಐಕ್ಲ ಪವಿತ್ರ ಪುತೀಕ್ ಸಾಂಗ್ತ. ತ್ಯಂಚ಼ ನಾದ್ ದುನೆತ್ ಸಗ್ಳ ಪಗಾಳ. ತ್ಯಂಚಾ ಬೊಲ್ಯಾ ಪರಪಂಚಾತ್ ಸಗ್ಳಿಕ್ಡ ಗೇಲ್ಯಾ. 19 ಪರ್ತುನ್ ಮೀ ಐಕ್‍ತ್ಯೊ ಕ್ಯಾ ಇಸ್ರಾಯಲ್ ಲೋಕಾನಾ ಸಮಜ಼ತ್ ನವ್ತ ಕ್ಯಾ?

ಮೊಶೆ ಸ್ವತಾ ಆಪ್ನು ಸಾಂಗ್ತೊ ಮೀ ತುಮ್ಚಾ ಮನಾತ್ ಆಸ್‍ಲ್ಯಾ ಲೋಕಾಂಚಿಸ್ ಲಾಗುನ್ ಖರಿ ನವ್ಹ ಜಾ಼ಲ್ಯಾಲ್ಯಾಂಚಿಪ್ನಿ ತುಮ್ಚಾ ಮನಾತ್ ಖೊಟ ಫನ್ ಯಯಿಜೊ಼ಗ ಕರೀನ್ ಆನಿ ಮೂರ್ಕ ರಾಶ್ಟ್ರಾಂಚಿಪ್ನಿ ತುಮಾನಾ ರಾಗ್ ಯಯಿ ಶಾರ್ಕಾ ಕರ್ತೊ. 20 ನಂತರ್ ಯೆಶಾಯ್ ಧಿರ‍್ಹಾನಿ ಸಾಂಗ್ತೊ. ಮನಾ ಸೊದಾಚೆ ಆಂದಿ ಆಸ್‌ಲ್ಯಾಲ್ಯಾ ಲೋಕಾಂಚಾನಿ ಬಗ್ಲಾ. ಮಾಜಿಸಾಟಿ ಮಾಗಿತ್ ನಸ್‌ಲ್ಯಾಲ್ಯಾ ಲೋಕಾನಾ ಮೀ ದಿಸ್ಲೊ. 21 ಫನ್ ಇಸ್ರಾಯೆಲಾಂಚೆ ಗುಶ್ಟಿತ್ ತ್ಯೊ ಆಸಾ ಸಾಂಗ್ತೊ. “ಮೀ ಸಗ್‍ಳ್ಯಾ ದಿಸಾತ್ ಆಜ್ಞಾ ಪಾಳಿತ್ ನಸ್‍ಲ್ಯಾಲ್ಯಾನಾ ಆನಿ ವಾದಿಂಚೆ ಮೊರ‍್ಹ ಹಾತ್ ಪಗಳುನ್ ರಾಯ್ಲೊ. ”