1 Kǝɗu, nakanya paɗ, wanmanchina, kǝ ɓǝra fǝr pafǝn i Shemeti Farta, yahwesi kǝ chokwun tǝ kumi sǝnda wa. 2 Sǝnwun wa ǝ fartǝɗi nawak tǝ wun kǝ fǝ kumi fǝr kit cha, lǝm fee wunchi, yimkowun kǝ manandǝ ɗǝhachǝɗi thlǝ shenuˈ wakcha. 3 Kǝthlǝm ndaˈan yahǝnchis kǝ sǝnwun tǝ ndat wa, yowunsi nech shenuˈtǝ tǝ alkǝt Shemeti Farta, nech ndat wa, “Yesu sǝɓtǝ nefa wa.” Yowunsi paɗ nech mbahǝn ndat wa, “Yesu Chinda,” Mangga thla naa Shemeti Farta parat har tǝ ndǝ wa.

4 Kǝɗu, mbǝr ichǝs samǝn samǝn, paɗ Shemet arta thlǝ fǝrchǝ tandǝ nat. 5 Tarchǝs thlǝ chandǝ fee Yesu samǝn samǝn, paɗ Chinɗi thlǝ chandǝ fee mǝthlan arta. 6 Mbanchǝs samǝn samǝn thlǝ chǝt fee tarcha, Fartǝɗi thlǝ fǝranchǝ chika wun nef alkǝt chǝt tarchǝ inni nat, mǝthlan arta.

7 Shemeti Farta thlǝ pǝnchan indiyan tǝ mbanchǝ samǝn samǝn ǝ hur chika wun nefa, kǝthlǝm nef ini kǝ chǝt tersi kǝ kǝsantǝ nafchi Fartǝsi. 8 Yowun fǝranchi fee pafǝn tǝmɗi Shemeta, kǝ shenuˈ ǝ hur mbǝrˈǝna. Kǝmǝn Shemeˈinni, fǝrantǝ yowun alkǝt kǝ chaˈantǝ ǝnɗi kaɗ pǝnandǝ Farta. 9 Yowun fǝ ranchi fee mbǝrˈǝna yi fǝr kit tǝmɗi Shemeɗiya, yowun paɗ mbǝrˈǝna yi kǝnandǝ nafchi kaɗi tǝmɗi Shemeɗiya. 10 Yowun paɗ mbǝrˈǝna yi chit ǝna saka inda. Yowun paɗ mbǝrˈǝna yi mbuˈ ǝnɗi mbuˈtǝ Farta nech sǝɓta. Yowun paɗ yi mbǝr chakandǝ Shemeti Farta ha, tǝ thla nawakchǝ kǝ yi Farta. Yowun paɗ yi mbǝr shenuˈta tǝ wan shenuˈtǝ samǝn samǝn. Yowun paɗ yi mbǝr mbaˈ wan shenuˈcha thla sǝn waktǝ fee. 11 Nat mbǝr ichiˈini, Shemet arta nech parat tǝ tanda. Mǝthlan paɗ thlǝ chakanchǝ chika wuni kǝɗ thla yahtǝn.

12 Kǝɗu, kǝɗ ǝnɗi naa fat arta, tanggathlechǝs terchan. Chika nakan wa tanggathlechˈyan terchan, kǝɗu kǝmndǝ ha kǝ fat arta. Kǝɗu, natǝn tǝ Kǝristi. 13 Kǝthlǝm natmǝn chamǝn chi fee baptisma tǝmɗi Shemet arta, kǝ hur fat arta. Fowunsi hurmǝn Yahudawecha, fowun paɗ ngga Yahudawecha wa. Fowun mafecha, fowun paɗ ngga mafecha wa. Natmǝn Shemet arta fǝranmǝn ndǝ fee kǝ samǝn.

14 Fata ngga tanggathlat arta wa, tanggathlech terchan. 15 Maa naa sartǝ ndat wa, “Kǝthlǝm ngga her nakǝ wa, ngga tanggathla fat naki wa,” thleya nee njanchi sartaˈan choktǝ kǝ tanggathla fata wa. 16 Kǝɗu paɗ, maa ndi thlǝmata wa, “Nakan wa ngga wenitǝ naki wa, kǝthlǝm ndaˈan ngga tanggathla fat naki wa,” thleya nee njanchi thlǝmaɗan choktǝ kǝ tanggathla fata wa. 17 Maa fat nat kǝ wenitǝ ndak, tǝ mǝ naa fee sǝk ndikta? Maa fat nat kǝ thlǝmat ndak, tǝ mǝ naa fee saˈandǝ icha? 18 Paɗ tahsanchi Farta chika yen tanggathlata ǝ fi fata chǝka yen hurnanda kǝɗ thla yahtǝn. 19 Maa nat nda tanggathlat arta, mǝ nǝ fat nǝss wa? 20 Kǝɗ ǝnɗi natǝn, tanggathlechǝs terchan, paɗ fat arta.

21 Mbandǝs naa wenitǝ nda ndǝ hera wa, “Kǝ mi wu ǝn tǝ wech wa.” Paɗ, mbandǝs naa inda ndandǝ sarcha wa, “Kǝ mi wu ǝn tǝ wunchǝ wa.” 22 Ngga kǝɗu natǝn wa, tanggathlechiɗi naa fee kǝɗ nggǝ kwaˈkwaˈ wa, fen naa terˈyandǝsi. 23 Tanggathla fechiɗi thlǝ ɗǝpandǝ mǝn kǝɗ saˈa wa ndǝ taki chaˈan tǝ tera wa, ndaˈan thlǝ manandǝmǝn kaˈan. Tanggathlechiɗi nawakchi ndiˈchan ǝ wenita, ndaˈan thlǝ nggǝrtǝmǝn wuɓaanda. 24 Tanggathlech ˈyamǝn fee nech ndiˈchan ǝ wenita ngga nwaat kǝ chan fee ǝn tanda wa. Paɗ Farta tahsanchi fata, thlǝ fǝranchan maandǝ tanggathlaɗi nawakchi ndiˈchan ǝ wenita. 25 Chich Farta kǝɗu, kǝthlǝm kǝn kumi wum indǝs fi fata wa. Tanggathlechaˈan kǝ ɗǝpandǝ har tǝ raˈan, ɗǝpata weˈtǝ thla arta. 26 Kǝthlǝm kǝt ndaˈan, maa yowun tanggathlat si mbǝschi mǝrya, nat nda sǝk kandǝ hataˈan ɓukwa, maa kwal fee faa yowun tanggathlat arta hur nanda, nat nda mbǝn kandǝ fat ɓukwa.

27 Kun nech kǝ fati Kǝristi, chika wun artǝ hur wun paɗ tanggathla fat ˈyan. 28 Hur nafcha fǝ fǝr kit cha kǝmɗi Farta, ɗǝf Farta nafcha kǝthlǝm tarchǝ samǝn samǝn. Tatǝ kǝmsicha kǝ chok ndǝ ǝ tǝrkwathl kanan. Fǝ shenuˈtǝ tǝ yahti Farta kǝ chok ndǝ kǝ chapataˈan. Fǝ chaˈanchǝ kaɗ paɗ kǝ chok ndǝ kǝ yi mahkanan. Ə kǝrsǝ nanda, fǝ chǝt tar ǝna saka inda, tǝ fǝ mbǝr kǝnandǝ nafchi kaɗi. Mǝ fǝ kǝsandǝ nafchǝsi, tǝ fǝ ɗǝpat har tǝ tarcha, tǝ paɗ fǝ shenuˈcha tǝ wan shenuˈtǝ samǝn samǝn. 29 Nat ndǝ nech kǝ tatǝ kǝmsicha wa? Nat ndǝ fǝ shenuˈta tǝ yahti Farta wa? Nat ndǝ fǝ chaˈanchǝ kaɗ wa? Ndu nat ndǝ fǝ chǝt tar ǝna saka inda wa? 30 Nat ndǝ thlǝ chǝt tar kǝnandǝ nafchǝ kaɗ wa? Nat ndǝ thlǝ shenuˈchǝ tǝ michǝ samǝn samǝn wa? Ndu nat ndǝ thlǝ nggǝranchǝ shenuˈtǝ kaɗ wa? 31 Nakanya ɗǝfam wanɗǝkaɗatsi kǝ kaa fǝr kǝnau pafǝn i Farta, thla nech manchan.

Nii pǝnowun mbanɗi nech ndiˈchan nat.