1 Saktinchi nowun kǝrǝs nenchi tǝ ɓamkǝtɗi nati chǝta. Nggǝt shiyowunda kǝ kǝrǝswun tǝ nenchi. 2 Nggǝt sǝraˈta kǝthlǝm kun, kǝɗ ǝnɗi thlǝ sǝraˈtǝ Farta kǝthlǝm kun. Kun nechowun kǝɗ perra thla sǝnwakchǝ hisnefa. Thla ɗǝfti mee nii fǝrwunchi kǝmɗi Kǝristi, kǝ chok kǝ chǝmatwun mǝthlan ichiɗan. 3 Paɗaa nggǝt lekǝta, kǝ chok ǝnɗi sǝɓchǝ tǝ Hauwawu yu, kǝ kǝstǝ wunchi wa. Lǝm wirɓǝ ndi tǝ ɗathliyan chicha chǝtǝn ɓǝɓifata. Kǝɗu kun paɗ, kǝ sakan fee hur inchiyowun kǝ malawun fǝr kit yi kit, tǝ fǝr indiyown kǝmɗi Kǝristi wa. 4 Kǝthlǝm maa ɓi yowun ɓasowun yowun Kǝristi si samǝn tǝ thla ɓasowundǝ ǝnsi. Ndu maa thlǝwun shemet samǝn tǝ thla thlǝtwun ǝ mǝɗyaˈan, ndu ɓas kwastǝ ndikta thla mbinchan yi sǝkta samǝn tǝ thla thlǝtwun mǝɗyaˈan. Pǝnchan wa nggǝmawun tandǝ hur paˈpaˈ tǝ inda.

5 Paɗaa ǝnatinchi fenni thlǝ ndat wun wa, “Fen tatǝ kǝmsicha thla yowunsi kǝɗ tanda wa,” pǝɗiwandǝ ha tǝ ǝna wa. 6 Chǝk mǝ nawaki kǝ thlǝ mbǝr ndiktǝ kǝɗ tanda, paɗaa sǝn ǝninchisi. Paɗ pǝnowunchǝ ǝn hayan chǝk tǝ yen mbenna, ǝ hur natˈyaˈan ha nat tǝ kun. 7 Awi ɓǝɓifat chǝti manawakti indinchi kǝthlǝm kǝ manowunchi fee wa? Ndat wa, kǝthlǝm kǝɗ ɗinchi ɓasowun ndikti Fartǝs pafǝn wa? 8 Chokchan kǝɗ tǝ thlǝnani ichi fowun fǝ fǝr kitcha tǝ alkǝta, tǝmɗi thlǝt kǝnau pafǝn ǝ mǝɗˈyanda, kǝthlǝm kǝ chowunchi tera. 9 Fartidi nati mǝdyowun, ɗaktinchisi, nat tǝ kǝɗu ɗahowonwi in wa. Wanmanchina fǝ fǝr kit cha fee ɓech thlaˈtǝ Makidoniya fen ɓichǝ ǝnɗi nat yahti. Ɗǝfowunwi heˈtǝ ǝ chǝka yen mbenna wa, paɗ nechi ɗǝt kǝ pang tǝ chǝt kǝɗu. 10 Asˈindǝs wa kǝɗ ǝnɗi naa kit i Keristi wanɗǝkaɗatinchi, nefsǝ hur hahi Akaya nech ˈyati thlaˈ kirsha wa. 11 Kǝthlǝm mǝ nati mbuˈtǝ kǝɗu? Kǝthlǝm yahwakni wunchi wa? Sǝn Farta wa yahinchi wunchi.

12 Paɗ nii ɗǝt kǝ pangnga tǝ ǝnɗi thlǝ chiti, maˈni ˈyatan nafchiɗi thlǝ nech thlaˈandǝ kirsha, ndat wa tarɗi thlǝ chǝt ǝn, ǝn artǝ tǝ yinanda. 13 Kǝthlǝm weˈti nafchǝˈini tatǝ kǝmsichǝ fǝ lekcha, tǝ fǝ lǝm nafcha. Thlǝ tahsan chandǝ fatyandǝ ha kǝɗ tatǝ kǝmsichi Kǝristi. 14 Ngga ǝna saka inda wa, kǝthlǝm chǝka hweˈra thlǝ chanchan indiyan kaɗ kǝɗ thlǝ thlǝndi ɗaˈkǝta. 15 Kǝthlǝm ndaˈan, ngga ǝna saka inda wa, maa chǝ mafechi hweˈrǝ kaɗ kǝɗ mafechi kaakǝta. Ə ndukwaɗan nandǝ mbǝs kǝnau terˈyanda keˈke tǝ ǝnɗi chǝt nda.

16 Nggǝt nggǝr mbuˈta wa, mǝ kaɗ yowun wa ɓem naki wa. Paɗ maa tǝrwun nenchi kǝɗu, tǝram nenchi kǝɗ ɓema, kǝthlǝm nggǝt paɗ kǝ mbǝsi mban thlaˈ kirsha. 17 Weˈtǝ thlaˈ kǝrǝsɗi thlǝ chiti ya, ngga nechi ndikta ǝ mbanɗi yahtǝ Chinda kǝ mbuˈi wa. Auwa, ǝ ɗar ndiktǝɗiya, thlǝ nechi thlaˈ kirsha kǝɗ ɓema. 18 Nakan nafchǝ terchan thlǝ nechandǝ thlaˈ kirsha kǝɗ weˈtǝ yi heshi, nggǝt paɗ kǝɗu nati chǝta. 19 Kun paɗ tǝnowun ɗathlchan kaan hacha wa, tǝ mbǝnfata thlǝ kǝrǝs tǝwun ɓamcha wa? 20 Kǝthlǝm maa ɗǝf yowun wunchǝ kǝ chǝka yen mafakǝta, thlǝ mbahan chowun kǝrǝs ndi. Ndu tǝ thlǝnowunchǝ ǝn har, ndu tǝ pǝpeh tǝ wunchǝ har, ndu tǝ pǝnowunchǝ wa cheˈsi, ndu tǝ mbalatǝ wunchǝ ǝ chǝmanda. 21 Nggǝt thlǝ kǝsichǝ hartǝ fata kǝ nggǝmani wa, kǝthlǝm kumi alkǝtˈyamǝn, mbahan waktǝmǝn chǝt ichiɗiya.

Paɗaa maa tǝran yowun fata thlaˈtǝ kirshi kǝ ɗar ǝna yowun, nggǝt paɗ nii tǝrandǝ fata kǝchi kǝɗu. Ə mǝɗya nechi ndiktǝ kǝɗ ɓema. 22 Maa fen Yahudawecha, nggǝt paɗ kǝdu. Maa Israilawecha, nggǝt paɗ kǝdu. Maa fen kwathl Ibrahim nakanda, nggǝt paɗ kǝdu. 23 Maa thlǝ nechandǝ thlaˈ kirsha wa fen fǝ tarchi Kǝristi, nggǝt mbǝrani tandǝ ha tǝ chǝt taran. Nechi ndikta kǝɗ tǝ tǝrichǝ hwaˈarcha, kittaˈan pǝɗani tandǝ ha tǝ ter kaan. Kǝnichǝ fee terchan mǝ tanda, thlǝfichǝ fee kaan sǝrtaˈansi wa, kurɓanin yimndǝ kǝ meˈi mǝrta terchan. 24 Ɗǝf paktechi Yahudawecha kǝ thlǝfichǝ fee kumchit mahkan ngǝrsi wanherhaˈartǝ yu, kurɓandǝ ɗǝrman 25 Kurɓanchǝ Romawech thlǝfita mahkan tǝ fangǝncha. Paɗ tam fee mǝmaki tǝf kurɓandǝ arta tǝ ɗakwancha. Kurɓan shirkin tǝ ema fǝfalat kaɗ mahkan nggǝt huran. Kurɓani mǝnda tǝ parta hur hawurta, kǝn fee ɓat kǝti tǝ kesh. 26 Ə hur wiˈchinchi kurɓani yimndǝ kǝ pancha ǝ hur kuficha, kǝminchi tǝ pancha hari fǝ fasa fecha. Kurɓani yimndǝ kǝ pancha ǝ hari wanmanchǝna Yahudawecha, paɗ kurɓani yimndǝ kǝ pancha ǝ hari fee nawakchǝ kǝ Yahudawecha. Kurɓani yimndǝ kǝ pancha ǝ mǝrǝɓcha, kurɓani yimndǝ kǝ pancha ǝ hur wan mǝrǝɓcha, kurɓani yimndǝ kǝ pancha ǝ hur hawurta. Paɗ kurɓani yimndǝ kǝ pancha ǝ hari fǝ fǝr kitcha kǝ fǝ lekcha. 27 Chinchǝ tera, ɓahinchǝ ha, kurɓandǝ terchan saˈwi ena wa. Haɗ metǝ nenchi tǝ kuchimnda. kurɓani ɓah ndǝsǝmda, sǝkinchǝ mbita, paɗ mbǝswi kapaɗi nati pata wa. 28 Ngga tǝ ǝna fowun sam samǝn paɗ wa, weenmǝta nggǝt tǝ heˈta yi ɗǝmbat har tǝ nat nafcha fǝ fǝr kitcha. 29 Wun kuɓech alkǝta, mirwaktǝ fatinchǝ kaɗ kǝthlǝm mǝthlan? Paɗ wun ɗǝftǝ fee kǝ chǝt ɓǝɓifata, thla haɗwaktǝn nenchǝ hur kaan?

30 Maa chok wa nwaat kǝ thlaˈi kirsha, nii thlaˈ kirsha tǝ ichiɗi thlǝ pǝnchi huhuthlkaktinchi. 31 Sǝn Farta wa ngga tǝni lekta wa, mǝthlan tǝɗi nech kǝ Farta, tǝ paɗ Papa Chinda i Yesu Kǝristi. Thla kǝmchǝs kǝ manan fee kǝ kweˈkǝchi. 32 Fartǝɗi nati ǝ Dimaska, nggomna tǝɗi nech kanɗukwati kwitira Aretas ɗǝfsi kǝn fee ɗǝwe mimbanchi mǝrǝɓ Dimaska har kǝthlǝm kǝ kǝsichi. 33 Paɗaa fǝrkǝ fǝ fǝr kitchǝ nenchi kah hur kapa inafta tǝ chuhtǝɗi fi thlarti mǝrɓan. Kǝthlǝm ndaˈan heraˈki harˈyan.