Mahkaan yarati
Yohanna
Tǝrkwathl kan ndikta
Yohanna yarech ɗelwer tǝɗiya ǝ hur hurat kum chet foɗfoɗa nggǝrsǝ ɗerman (85) kǝ kum chet wanherhaˈarta nggǝrse ɗerman (95) kersǝ nggeti Yesu, kǝmɗi yowun thlǝ pangndi fǝ fǝr kitcha na thlǝman wa Gayus. Ɗelwer taˈan chǝmtǝ Gayus kǝthlǝm kaa tarɗi thlǝ chǝtǝn. Kapaɗan kǝɗ ǝnɗi thlǝ thlǝtǝn fǝ chaˈanchǝ kaɗi yi kit fee thlǝ thlǝndǝn Yohanna kǝmɗiyan. Ə hur ɗelwer taˈan kaɗi fee har tǝ yowun nefa thla na thlǝman wa Diyotarifis thla thlǝ chich atǝkrekǝt tǝ teri Chinda.
1
Nda ǝna
1 Ɗelwer tǝɗiya thlaˈtǝ mǝɗinchi nggǝt shertǝ nefa, Kǝmɗi Gayus thla yahti, thla yahti tǝ kit.
2 Shiketǝna thla yahti, nggǝt shiyutǝsi, kǝ mbishin ɗǝt kǝ pangnga ǝ hur chǝka mǝ nat, tǝ paɗ kǝ chokǝn tǝ has has kǝt fata, kǝɗ ǝnɗi naa shishingndǝyo has has. 3 Mbǝninchi fat kaan kǝ ɓak fowun wanmancha fǝ fǝr kit mbuˈ ǝnɗi sǝndǝ ndǝsi kǝ ɗar kafatˈyo hur kit, kǝɗ ǝnɗi thlǝ wiˈtu hur kit. 4 Ənsi thlǝ mbǝnichǝf kaan thla pǝɗanchǝ kǝ sǝki wa wanchinchi tandǝ nat ha ǝ hur kit wa.
Chǝm fee Gayus
5 Shiketǝna thla yahti, kaakǝt ˈyosi hur tarɗi thlǝ chǝtu nat kǝ ɗar wanmanchu wa fǝ fǝr kit cha, kapaɗan kǝ ɗar fee sǝnwaktu tanda. 6 Nafchiɗi kǝsandu tandǝsi, mbuˈndǝ mǝɗiya mbanɗi thlǝ yahtu fǝ fǝr kit cha. Nan nat ndiˈchan kǝ kǝseen tandǝs hur wiˈtǝyanda ǝ mbanɗi nech mbǝnandǝ Fartǝ fa. 7 Malndǝ wurchandǝ ha kǝthlǝm ɓas ndikti Yesu Kǝristi, thlǝwandǝ ǝn hari nafchǝɗi nawakchǝ kǝ fǝ tǝr mbancha wa. 8 Kǝthlǝm ndaˈan, kǝmchansi kǝ kǝsamǝn weˈtǝ nafchǝ ini si. Kǝ chokmǝn kǝ shikechi tera tǝ tanda kǝthlǝm kittaˈan.
9 Yarani kǝtǝn shitǝyowun ɗelwersi, paɗaa Diyotarifis, thla yahchǝs kǝn manchan hurwun nat, nggǝma wa ndiktiyaˈan wa. 10 Maa ɓinchi, nii mbuˈowun ichiɗi thlǝ chǝtǝn hayang. Mbanɗi thlǝ natǝn sǝɓandǝ thlǝm ǝn kaɗi tǝmɗi sǝɓtǝ shenutǝɗi thlǝ natǝn mbuˈtǝ kǝ ɗar ǝn. Thlenni chaˈawa fa wa, thlǝ nechan kar fǝ fǝr kit chǝɗi ɓecha. Paɗ thlǝ ˈyatanchan fǝ fǝr kit chǝɗi yahchǝ thlǝt tanda. Paɗ thlǝ rǝkchan fee thlich ramchaˈan hur kǝtǝn shita.
11 Shiketǝna thla yahti, kǝ paren sǝɓtǝ nat ha wa, chaˈo kaɗan. Nat thla thlǝ chich kaa ǝna Waˈi Farta. Thla thlǝ chich ɓǝɓi ǝna sǝn wa Farta wa. 12 Chǝkawun thlǝ ndikchan kaɗan kǝ ɗar Dimitiriyus. Kittaˈan tǝ indiyan thlǝ pǝnchan, chǝka nggaˈan paɗ thlǝ mbuˈchaˈan kǝɗu. Shinin paɗ wa ǝnɗi thlǝ mbuˈtǝ ǝn kit.
Nggǝl mii ndikta
13 Ichisi terchan yahti mbuˈuta, yahwisi kǝ yaru chǝsi wa. 14 Ɗǝfinchǝ kǝfatsi nii ɓat kǝmɗiyo ngga tǝ ndǝrǝmnda wa, kǝ ndikmǝn mee tǝ mee.
15 Kǝɓi kaɗi i Farta kǝ chok tǝ wechi.
Shikechǝmǝn fee mǝɗya ndu ǝnfa, kǝ ndeen ǝn shikechǝmǝn fa fee minni, artǝ arta.