1 Kun paɗ, choh nechowun kǝɗ mǝmatecha kǝthlǝm kumthlǝmatˈyowun tǝ ɓǝɓifechˈyowun. 2 Ə fartǝˈini thlǝ nechowun para mbanchi nafchi heshiɗiya. Nakowun para kutur ɓǝɓi hwaˈarcha ǝ fǝrta. Thla nech kǝ shemeɗi thlǝ nech chǝt ter hur wanɗǝkaɗati nafchǝɗi thlǝ nech chan kumthlǝmat Farta. 3 Natmǝn chokmǝn kǝɗ tandǝ choh. Nakamǝn chǝt ǝnɗi yahtǝ fatˈyamǝn ndak paɗ tǝ ǝnɗi yahtǝ wanɗǝkaɗechˈyamǝn. Kǝmchansi kǝ ɓǝ sǝɓtǝ hwiri Farta kǝ ɗar indiyamǝn kǝɗ tanda.

4 Paɗaa nakan Farta thlǝ haɗandǝ nef fǝ manchan, yahkan mǝnchǝ kaan, 5 fǝraˈkan shinshingnda tǝ Kǝristi. Chǝka mǝ nakan wa mǝmatechǝ nakamǝn tǝmɗi ɓǝɓifechˈyamǝn. Hǝraˈamǝnchi fee tǝmɗi kaafatˈyan. 6 Kǝthlǝm thlaˈa minchan hur mǝmatecha tǝ Kǝristi. Dǝfkan minchi kǝ chok mǝn kǝ chǝmǝn kuturakta kǝ ɗar shemechi heshi ɓukwaˈ tǝ Kǝristi Yesu. 7 Chich Fartǝ ǝnɗa kǝthlǝm kǝ chokmǝn arta tǝ Kǝristi. Chichan ǝnɗa kǝthlǝm kǝ pangnga, kǝ pǝnamǝnchǝ kaafatˈyan thla nawaktǝ sǝrtaˈansi tǝmɗi Kǝristi Yesu. 8 Kǝthlǝm tǝmɗi kafati Farta mbǝstǝwun hǝraˈta, tǝmɗi fǝr kit. Ənɗiya paɗ ngga chǝt ˈyowun wa, pafǝn mǝɗi Farta. 9 Paɗ ngga tǝmɗi tarcha wa, kǝthlǝm kǝ thlaˈan yowun kirsha wa. 10 Nggǝmǝn tǝ indiyamǝn tar harchiyan. Nggǝrchǝ fee tǝn mǝnchǝ ǝ hur Kǝristi Yesu. Kapaɗan kǝthlǝm kǝ chǝmǝn tarchǝɗi nech ndiˈchan. Thla tahsandǝ Fartǝ ha tǝrkwathl kanan kǝ chǝmǝn.

11 Kǝthlǝm ndaˈan, kuɗukama choh ngga Yahudawech nakowun wa tǝmɗi nggǝtta. Kun tǝɗi thlǝ ˈya Yahudawecha wa, “Hechowowun wu fee wa.” Nakanya, heche ini yi fata, thla thlǝ chǝt fee tǝ hera. 12 Kuɗu kama, fartǝˈini ǝnsǝ wumowunchǝ ha tǝ Kǝrǝsti wa. Paɗ nggikkektǝyowunsi tǝ nafchi Israˈila wa, paɗ ramchǝ nakowun kǝ ɗǝf miɗi chǝt Farta. Chok chowun hur heshiɗiya ɗǝf wandǝkaɗatˈyowun su wa, paɗ Fartiyowun su wa. 13 Paɗaa nakanya nggun hur Kǝrǝsti Yesu. Kuntǝɗi choh nech langngan tǝ Farta, nakanya ɓi fee tǝ wunchǝ nduk tǝ ndi tǝmɗi mǝrti Kǝrǝsti.

14 Kǝthlǝm Kǝristi mǝthlan ɗǝfchǝsi kǝ chokmǝn hur kǝɓikaɗi, mǝthlan tǝɗi nggǝranchǝ Yahudawecha tǝ fee nawakchǝ kǝ Yahudawecha kaɗ arta. Paɗ tokan kan thlartǝɗi chakan chǝ tandǝ ha tǝmɗi fatˈyan, ndat wa karraˈan tǝɗi nech pǝthlǝrwun. 15 Chichan ǝnɗa tǝmɗi tǝrandǝ kusiˈ i Musa kaɗi tǝ ɓuˈchiyan paɗ tǝ ndikchiyan tǝmɗi fǝr fatˈyan. Chichan kǝɗu kǝthlǝm kǝ tǝntǝ yuwa kwathla thlaˈtǝ ǝ kwathlchiɗi chap ya. Tǝ kǝɗu paɗ ɓatǝn tǝ kǝɓi kaɗi pǝthlǝr nanda. 16 Tǝmɗi mǝrtǝɗiˈyan ɗar palangndiya Kǝristi ɓenganchǝ karraˈan tǝɗi kaɗ nech pǝthlǝr mǝn tǝ raˈan. Paɗ tahsankan pǝthlǝr nafchǝɗi kaɗ chap ya tǝ Farta. Tǝ kǝɗu ɓengankan karraˈan tǝɗi chakanchǝ tandǝ ha choh.

17 Ɓakan ɓasowun kǝɓikaɗi, kǝmɗi kun tǝɗi nech langngǝ tǝ Farta tǝ fee nech nduk tǝ ndǝ paɗ. 18 Kǝthlǝm tǝmɗiyan natmǝn chap namǝn mbahan ɗǝt kǝmɗi Farta tǝ mbandǝ arta. Ndat wa Shemeti Farta.

19 Kǝthlǝm ndaˈan, nakanya kun tǝɗi nawakchǝ kǝ Yahudawecha ngga ramchǝ nakowun paɗ wa. Paɗaa wanchǝ haha ɓukwa tǝ nafchi Farta. Wanchǝ wurchǝyan, kǝɗ ǝnɗi naa takǝɗ nafchi wirˈyan. 20 Tǝnowunchǝ fee nat ɗar chǝma tǝnɗi ɗǝf tǝ taatǝ kǝmsicha tǝ fǝ shenuˈchǝ tǝ yahti Farta. Kǝrǝsti Yesu tǝ indiyan mǝthlan nech kǝ ɗakwanɗi kǝschǝ tǝnan har. 21 Tǝmɗiyan naa tǝnan nat kǝ wumnan, ɗǝf kǝ fee ndǝsi kǝ maana kǝ Wiri Farta tǝmɗi Chinda Yesu Kǝristi. 22 Ə hwirˈyan paɗ tǝnowun ndǝ fee tǝ takichaˈan, kǝthlǝm kǝ chokwun kǝ wira mǝɗi thlǝ choktǝ Farta tǝmɗi Shemetˈyan.