7
Wanmanchǝ Yesu fǝr wandǝ Kit kǝ anchi wa
1 Kǝrsǝ thleya, Yesu wiˈyankan hahi Galili. Yah wasi kǝ para tǝ hur Yahudiya wa, kǝthlǝm paktechi Yahudawechiɗi nech minni tandǝ kaa ndi kǝ ɓǝlanda. 2 Mbǝnfati Yahudawecha fartǝ ɗi thlǝ tahǝstǝ ndǝ kuwurcha ɓi nduk.*7:2 Lfr 23:34; Msh 16:13 3 Wanmanchǝ Yesu ndang kanda wa, “Thlaˈu mǝɗiya kǝ ɗin kǝ hahi Yahudiya, kǝthlǝm kǝmsichiɗiˈyo minni kǝ nandǝ tarchiɗi thlǝ natu chita. 4 Nat thla yahchǝ kǝ sǝn fee ǝna chitˈyan wuɓawa indan wa. Peˈko chit ichiɗiya, kǝmchansi kǝ pinin indiyo kǝthlǝm kǝ sǝn heshi wechi.” 5 Chika wanmanchi Yesu fǝrwandǝ kit kǝ anchi wa.
6 Ndang kǝ Yesu tanda wa, “Saˈwu wanshengnan inchi wa, kǝɗu mǝɗ yowun chik yen wanshengnan keˈkeˈ. 7 Nafchǝ heshiɗiya fee sǝn wakchǝ Farta nandǝ karwunchi wa, nggǝt natndǝ karta, kǝthlǝm thlǝ nechi mbuˈanda ichiɗi thlǝ chit nda ɓǝɓiˈan. 8 Kun ɗam kǝ mǝt mbǝnfaɗan. Nggǝt nggi ɗǝ kǝ mǝt mbǝn faɗiya wa, kǝthlǝm wanshengnan inchi ndiiɗ wa ha kwaɗǝn wa.” 9 Kǝrsǝ ndiktiyan chok kan ha ǝ hahi Galili.
Yesu ɓi kǝ mbǝn faɗan
10 Kǝrsǝ pǝɗati wanmanchaˈan kafǝr kǝ mǝt raˈaɗan, ɗǝkan kafǝr paɗ ǝ kǝrsa, tǝ mban ɗi nawak tǝ nafchǝ naandi, ɗǝkan tǝ wuɓtǝ fa. 11 Yahudawecha kaa ndi mǝt mbǝnfaɗan, nakandǝ chiha mee tǝ ndat wa, “Mǝthlan ayi?”
12 Hur nggomnan nak nafchǝ wushekta kǝ ɗar Yesu. Fowun ndat wa, “Kaa nef nakan.”
Fowun paɗ nakandǝ ndat wa, “Ngga kǝɗu wa, tǝn lǝm nafchǝ ndak.” 13 Nefsi mbahǝnchǝ ndiktǝ kǝ indi Yesu ɗarat wa, kǝthlǝm tandǝ lekandǝ paktechi Yahudawecha.
Chaˈan Yesu kaɗ ǝ mǝt mbenfata
14 Far foɗɗatǝ mǝn mbǝfaɗan, yim kǝ Yesu kǝ hur Wiri Farta nggakkan chaˈandǝ nafchǝ har. 15 Tǝrkǝ paktechi Yahudawechaˈan kafǝrta nda kanda wa, “Tamwu nafɗa ɗǝt kǝ mǝt chaˈata wa, chichan in kǝni tǝ hur indǝf kǝ ɗaya?”
16 Nggǝman kǝ Yesu tanda wa, “Ichiɗi nati chaˈandǝ kaɗi ngga yina wa, chaˈati thla thlǝnchi nenchi. 17 Chika wun yahchǝsi kǝ chit ǝnɗi yahtǝ Farta, nan sǝnda maa chaˈaɗiya yi Farta, ndu yi indinchi. 18 Thla thlǝ nech ndikta tǝ alkǝt indiyan tǝn kaa maandǝ kǝ indiyan. Kǝɗu nat thla nech ka maanandǝ thla thlǝnchi anchi, mǝthlan nech tǝ kit fa, kumi kit fiyan wa. 19 Awi, ngga Musa fǝrowunchi Kusiˈ wa? Chika kǝɗu yowunsi thlǝ perech kusiˈ taˈan hur wun wa. Kǝthlǝm mǝi natwun kata kǝ ɓǝlichǝwun?”
20 Nggǝman kǝ nggomnan wa, “Hwaˈarchǝ fiyo. Wun yahchisi kǝ ɓuluchi?”
21 Nggǝman kǝ Yesu tanda wa, “Chichi ǝna saka indǝ artǝ ndak, natwun tǝrwun kafǝrta kǝ ɗaran. 22 Ɗǝfowunchǝ Musa kusiˈ kǝ hecha wun wanchi yowun (ngga mǝthlan nggakcha wa saˈarchǝ wun.) Chika kǝɗu thlǝ hechan chowun wanchi yowun fartǝ Yipta. *7:22 Far 17:10; Lfr 12:3 23 Maa ǝ hechan fee waa ǝ fartǝ Yipta kǝthlǝm kǝ chen fee ǝnɗi kaɗ mbuˈtǝ Kusiˈ i Musa wa. kǝthlǝm mǝi natwun sǝɓandǝ hwir kaɗi kǝthlǝm wa kǝna ni nef kaɗi ndiˈchan fartǝ Yipta? *7:23 Yoh 5:9 24 Kǝ chak wun mee kǝ ɗar ichiɗi thlǝ naa wenitǝ heshi wa, kǝɗu chakam mee kǝ ɗar ǝnɗi nech ke kit.”
Chak indi nafchǝ ha kǝ ɗar ndu wun nech kǝ Kǝristi
25 Kǝn fowun nafchi Urshelima chihata wa, “Awi, ngga nafɗiya nat ndǝ kat kǝ ɓǝlandiya wa? 26 Mǝthlan ya, mǝthlan ndiktǝ hayang chika wun sǝkta, paɗ mbuˈa wa ndǝ ǝna wa. Ndu tǝ sǝn paktechaˈan tǝ ndat wa mǝthlan nech kǝ Kǝristi hacha wa? 27 Tapi sǝn ǝn mǝɗi ɓa nafɗiya, kǝɗu ma ɓi Kǝristi, nefsi nech mbahǝn sǝn mǝɗi ɓatǝn wa.”
28 Fartiˈini Yesu ɗar chaˈandǝ nafchǝ har hur wiri Farta, thlaˈankan ɓǝrata nda kana, “Tapi sǝnwun nenchi, paɗ sǝnwun mǝɗi ɓati. Kǝɗu ɓawi tǝ alkǝti indinchi wa. Thla thlǝnchi nenchi thlǝ kit nakan, paɗ kun sǝnwowun anchi wa. 29 Nggǝta sǝninchi anchi, kǝthlǝm ɓechi mǝɗiyan, mǝthlan paɗ thlǝnchi nenchi.”
30 Kǝthlǝm ndaˈan, yah kandǝsi kǝ kǝsanda. Kǝɗu nefsi tǝkan chi her fa wa, kǝthlǝm saˈwu wanshengnanˈyan kwaɗǝn wa. 31 Chika kǝɗu terchan nafcha hur nggomnan fǝrndǝ kit kǝ anchi. Nakan ndǝ ndat wa, “Fartǝɗi naa Kǝristi taˈan ɓata, nan chit ǝna saka incha kǝ pǝɗan tǝ thla chit nafɗi ha ya wa?”
Paktechi Yahudawecha thlǝn ndǝ nafcha kǝ kǝsandǝ Yesu
32 Sǝk kǝ Farisiyawecha nafchǝ wushekta tǝ raˈan kǝ ɗar ichiɗiya. Kǝthlǝm ndaˈan, fen tǝ paktǝ panggǝnchaˈan thlǝn kandǝ fee nech pǝk mii kǝtǝn Wiri Farta har kǝ kǝsandǝ Yesu. 33 Ndang kǝ Yesu tanda wa, “Takchan wanshengnan nguɗyǝh nati nat tǝ wunchi, kǝni nggǝrandǝ in kǝmɗi thla thlǝnchi nenchi. 34 Nowun kaa nenchi, paɗ no wun mbǝsichǝ wa. Mǝɗi nati ɗǝta nowun mbahǝn ɗa wa.”
35 Yahudawechaˈan nggak kandǝ ndiktǝ tǝ raˈan wa, “Kaɗech nafɗiya wa tǝn kǝ kayi, thla naa waktǝmǝn mbahǝn mbǝssanda? Ndu tǝn ɗǝt kǝmɗi Yahudawecha fee welchi ha hur pong nafcha wa, kǝ chaˈan tǝ pong nafchǝ har minni wa? 36 Mǝ natǝn sakta tǝ ndat wa, namǝn ka anchi namǝn mbǝsanchǝ wa? Tǝ ndat paɗ wa ‘Mǝɗi nati ɗǝta, nowun mbahǝn ɗa wa?’ ”
Nafɗi sech ˈyamɗi thlǝ fǝrta Yesu nan mbǝs shishingnda kǝ kwekichi
37 Fartǝɗi nat ndǝ tǝɓandǝ tar raˈati mbǝnfaɗan ndaˈan nech kǝ kaa partaˈan hur tar raˈaɗan. Thlaˈ kǝ Yesu, thlaˈan kan ɓǝratan nda kan wa, “Chika wun nafɗi naa kwichimndǝ fiyan kǝ ɓǝ kǝmɗinchi kǝ saa.”*7:37 Lfr 23:36 38 Ndech Laulawechaˈan wa, “Chika wun fǝrchǝ kit kǝ nenchi, ǝ hur wanɗǝkaɗatˈyan, naa kufi ˈyamcha thla thlǝ fǝrchǝ shishingndǝ rakat ha.” *7:38 Eze 47:1; Zak 14:8 39 Thleya, nech Yesu ndiktǝ kǝ ɗar Shemeti Farta, thla naa fee fǝrchǝ kit kǝ anchi nandǝ thlǝta. Kǝthlǝm paˈ kǝ nakanya, fǝrwu fee Shemeti Farta kwaɗǝn wa, kǝthlǝm manawu fee Yesu kwaɗǝn wa.
Chak tǝ ha yim kǝ pathlǝr nafcha
40 Kǝ sǝkkǝ nafchaˈan ndiktiɗi mbuˈtǝ Yesu yu, fowuna nda kanda wa, “Kittaˈan, nafɗiya nech kǝ thlǝ mbandi Farta.”
41 Fowun paɗ nda kanda wa, “Thleya nech kǝ Kǝristi.” kǝɗu paɗ fowun nda kanda wa, “Mǝi? Awi, Kǝristi nechan ɓat ǝ Galili wa? 42 Ngga ndech Laulawaɗan wa Kǝristi nechan ɓat hur kwathl ndǝ Dauda wa? Ngga nechan ɓat kesh hur Baitalami, wan mǝrǝɓ ɗi choktǝ Dauda wa?” *7:42 2 Sam 7:12; Mi 5:1 43 Kǝthlǝm ndaˈan, yim chak tǝ ha kǝ pǝthlǝr nanda kǝ ɗar Yesu. 44 Fowun yahkan ndǝ si kǝ kǝsandǝ Yesu, kǝɗu yowunsi tǝkanchi herfa wa.
Paktechi Yahudawecha fǝrwandǝ kit kǝ Yesu wa
45 Kǝ nggǝran kǝ fǝ pǝk mii kǝtǝnchaˈan har yi Wiri Farta kǝmɗi paktǝ pangǝncha tǝ Farisiyawecha. Chihan kandǝ tanda “Kǝthlǝm mǝi ɓawaktǝ wun taˈanchi?”
46 Nggǝman kǝ fǝ pǝk mii kǝndi Fartaˈan har wa, “Nefsi tamchi ndiktǝ kǝɗ nafɗiya wa.”
47 Nggǝman kǝ Farisiyawechaˈan fǝ pǝk mii kǝndi Fartaˈan har wa, “Awi, ta kun ǝ lǝmndǝ wunchi wa? 48 Awi, yowunsi arta hur paktechaˈan ndu yi Farisiyawechaˈan tamchǝ fǝr kit kǝ anchi wa? 49 Nggommǝnɗiya ndak fee sǝnwakchǝ Kusiˈ i Musa wa, fen ndak fǝrchǝ kit kǝ Yesu. Sǝɓtǝ nafchǝ nakanda panggǝn Farta.”
50 Nikodimus thla tamchi ɗǝt kǝmɗi Yesu choh. Thla nech artǝ hur Farisiyawecha. Ndang kan tanda wa,*7:50 Yoh 3:1-2 51 “Awi, Kusiˈ ˈyamǝn mbuˈamǝnchǝ wa, kǝ chaka mǝn mee nefa ndat wa sǝɓantǝ ǝn kaɗi. Ə sǝkwa mǝn hur mee ˈyan kwaɗǝn wa?”
52 Nggǝman kandǝ tǝ ndat wa, “Chi paɗ thlǝ Galiliwat nako wa? Tausandǝn kesh kǝ nen tǝ indiyo, nggǝ thlǝ mbandi Fartǝsi nech tam ɓat hur Galili wa.”
53 Nggǝran kǝ chika wun in kaɗ keuriya.