1 Takchǝ mǝndǝ michcha kǝ mbǝnfa Tathla, ɗǝk Yesu kǝ Betani, mǝɗi naa Liˈazarus thla thlaˈandǝn ǝ mǝrta. 2 Minni nǝhan kǝ fee ɗǝsǝmndǝ si yi far wita, Marta ferchǝ ɗǝsǝmnan, Liˈazarus paɗ mǝthlan artǝ hur fee sǝmchǝ ɗǝmsǝmnan tǝ Yesu. 3 Tǝr kǝ Maryamu kwastǝ fiɗeta thla nech ˈyang ˈyang kaan hur wan kuruɓta. Thla chit fee tǝ ɗǝftǝ nardi saˈ taˈan mbinchan, paˈkan kǝ sarchi Yesu, kǝ naa paˈandǝ kaɗi tǝ waas indiyan. Mbǝn saˈ taˈan ndiiɗan tǝ hur wuran kaɗ nat.*12:3 Luk 7:37-38 4 Kǝɗu Yahuda Iskariyoti, artǝ hur kǝmsichiyan, thla nech hiyandǝ kaɗi. Ndakan wa, 5 “Kǝthlǝm mǝi nawak tǝ fee hiyandǝ fiɗeɗi kaɗiya ǝ ɗar wanɗǝɓǝthl tipesh aruˈ mahkan (3,000) kǝ fǝran fee fǝ ɓahcha?” 6 Mbuˈchan kǝɗuyu ngga wa tǝthl ɗǝpa fǝ ɓahcha wa, auwa, kǝthlǝm tǝn kǝ yera. Nakan paɗ kǝ thla thlǝ kǝschǝ wanɗǝɓǝthl chiyandǝ har, thlǝ kǝsanchan fatˈyansi ǝ huran.

7 Ndak Yesu wa, “Malan nuɗa kǝɗu, ɗǝfchan ha kǝthlǝm tahǝstǝfa kǝ fartǝɗi naa fee thlohita. 8 Fǝ ɓahcha tandǝ tǝ wunchi chik yen parta. Nggǝta ninǝ tǝ wunchi chika yen parta wa.”*12:8 Msh 15:11

9 Kǝ sǝkkǝ Yahudawech terchan wa Yesu minni, ɓakanda. Ngga wa kǝthlǝm kǝ naandǝ Yesu ichaɗan wa, kǝɗu tǝ yahndǝsi kǝ naandǝ Liˈazarus thla thlaˈandǝn hur mǝmatecha. 10 Kǝthlǝm ndaˈan, paktǝ pangǝnchǝ wuman kandǝ mee kǝ ɓǝlandǝ Liˈazarus paɗ. 11 Kǝthlǝm Liˈazarus, Yahudawech terchan tandǝ kar pangǝncha nakandǝ fǝr kit kǝ Yesu.

12 Walwurtaˈan tertǝ nggomndi nafcha fee ɓech kǝ Mbǝnfa Tathla, sǝkkan ndǝ wa Yesu ɗar mbanda kǝ Urshelima. 13 Kǝthlǝm ndaˈan, thlǝthlaha kandǝ wan har kenggera chekandǝ kesh, nakandǝ chan marapa, nakandǝ thlaˈandǝ ɓǝratǝ nakandǝ ndata wa.

14 Mbǝskǝ Yesu wan kwaari tǝrkan si chokkan kǝ ɗaran, kǝɗ thla yarandǝ fee ha tǝ ndat wa.

16 Tǝrkwathl kanan wathla wa kǝmsichiyan ǝnɗi nech sǝɓta wa. Kǝrsǝ manaaɗi manaandǝ fee Yesu, kuɗuk kandǝ tǝ ndat wa, yaran fee ha kǝ ɗaran, paɗ sǝɓkǝ ichaˈan keˈke kǝɗ ǝnɗi yarandǝ fee ha.

17 Nafchiɗi nech mǝɗiyan fartǝɗi ˈyatǝn Liˈazarus kesh hur kwi mǝrtaˈan, paɗ thlaˈankan hur mǝmatecha. nakandǝ mbuˈandǝ nafcha ichiɗi chit Yesu. 18 Nafchi terchan ɗǝkandǝ chan marapa Yesu kǝthlǝm sǝk ndǝ ǝnɗi chitǝn yi sakainda. 19 Chat nak Farisiyawecha ndiktǝ tǝ raˈan wa, “Ɗǝpaman, nggǝmǝn chektǝ hur ǝnɗiya wa, ɗǝpaman heshi nat parandi.”

20 Hur nafchiɗi ɓech kǝ tǝrandǝ Fartǝ ha ǝ mbǝnfaɗan, fowun Helenawecha. 21 Ɓakan ndǝ kǝmɗi Filibus, nefi Betsaida thla nech ǝ hahi Galili. Ndang kanda wa, “Thlǝ Maanda, yah ǝn ndiktǝ tǝ Yesu” 22 Ɗǝk Filibus mbuˈandǝ Andrawus, kǝɗu fen chap ɗǝkandǝ mbuˈandǝ Yesu.

23 Nggǝman kǝ Yesu tanda wa, “Saˈ fartǝɗi nafee maanandǝ Wa ˈi Nefa. 24 Kittaˈan nati mbuˈowunda, mangga tǝ teshan fee wan pǝkata kǝ mǝr wa, nan choktǝ ichiɗan. Ma ǝ mǝri nan fǝr wanchi kaˈan. 25 Nat thla yahchi shishingndiyan nan kuɓata, Thla karchi shishingndiyan hur heshiɗiya kǝ panga nan mbǝs shishingnda kǝ poriˈ. 26 Nat thla nech chi tera, nwaat kǝ paranenchi. Nat mǝɗi nati, minni naa mafatinchi nat paɗ. Chika wun nech chi tera, naa Papa mananda.”

27 “Nakanya nggǝt sǝk lǝklǝk kǝta hur shishingndinchi. Mǝ nati mbuˈtǝ hacha? Kǝ ndi wa ‘Ai Chinda, kǝ ɓǝ Fartaˈan kǝ indinchi wa? Kǝthlǝm fartǝɗiya ɓati. 28 Ai Chinda, kǝ meneni thlǝm wa.’ ”

Sǝkkan ndǝ ɓǝratǝ hulafǝrta ndat wa, “Tapi maanani, paɗ ni nggǝr maananda.” 29 Kǝ sǝkkǝ nafchiɗi thlarchǝ minni ɓǝrataˈan, nda kan nda wa, “Ə yan ˈyer ha.” Fowun paɗ nda kan nda wa, “Thlǝ thlǝnndi Farta ndikchǝ tǝ anchi.”

30 Ndankǝ Yesu tanda wa, “Ɓǝratǝɗiya ɓechan kǝthlǝm nggǝwun, ngga kǝthlǝm nggǝta wa. 31 Nakanya nafee chakan mee heshiɗiya, paɗ nafee kǝtandǝ thla ha nech chit kutǝrakti heshiɗiya. 32 Kǝrsǝ thlaˈtǝɗi naa fee thlaˈita hur haha, ni kah nafchi nat kǝmɗinchi.” 33 Mbuˈchi Yesu ndiktiɗiya kǝthlǝm pǝn tǝ weˈtǝ mǝrtǝ ɗi natǝn chita.

34 Kǝthlǝm ndaˈan, nggomnan nggǝman kanda nda kanda wa, “Tapi mbuˈ Kusiˈyaˈan tǝ ndat wa, Kǝrǝsti nan nat ha kǝ kwekǝchi. Tǝ kǝn natu mbuˈta wa, nwaat kǝ thlaˈan fee Wa ˈi Nefa?”*12:34 Zab 110:4; Ish 9:6; Eze 37:25; Dan 7:14 Wun nech kǝ Waˈi Nef na?

35 Ndang kǝ Yesu tanda wa, “Ɗaˈkǝɗan nechan nat hur ɗǝfi tǝ wun kǝ fartǝ nguɗyǝh kǝɗa. Wiˈyama peˈkǝ ɗaˈkǝt ɗiya tǝ wunchi ya, kǝ mbǝsowunchi wuthla wa. Nafɗi nech wiˈtǝ hur wuthla, sǝn wa mǝɗi natǝn ɗǝta wa. 36 Fǝram kit kǝ ɗaˈkǝɗan, peˈtǝn tǝ wunchi ya, kǝthlǝm kǝ chokwun kǝ wanchi ɗaˈkǝɗan.”

Kǝrsǝ ichiɗi mbuˈtǝ Yesu ya, pǝɗakan wuɓandat har. 37 Nat tǝ tertǝ ichiɗi chit Yesu yi saka inda ǝ pangǝn nanda, chika kǝɗu fǝrwandǝ kit kǝ anchi wa. 38 Sǝɓchi ichiɗiya kǝthlǝm kǝ ndiiɗan fee ǝnɗi mbuˈtǝ thlǝ mbandǝ Fartǝ har Ishaya. Ndat wa,

39 Ndaˈan ɗǝfchǝ tandǝ fǝrwandǝ kit wa, kǝɗ ǝnɗi mbuˈtǝ Ishaya mǝt samǝn. Ndakan wa,

42 Nat tǝ kǝɗu terchan nafcha hur paktechaˈan fǝrndǝ kit kǝ anchi. Kǝɗu kǝthlǝm lekandǝ Farisiyawecha, mbuˈ wandǝ ɗarat wa, kǝthlǝm kǝ rǝkan fee tandǝ hur wur nggomnda wa. 43 Kǝthlǝm thlǝ yahchan ndǝ maanɗi thlǝ fǝrtǝ nafcha, kǝ mbǝrantǝ maanɗi ha thlǝ fǝrtǝ Farta.

44 Thlaˈankǝ Yesu ɓǝrata ndakan wa, “Nat thla fǝrchi kit kǝ nenchi, ngga nggǝt fǝrtǝn kit kǝ anchi ndak wa. Fǝrchan kit kǝmɗi thla thlǝnchi nenchi. 45 Nat thla nech nenchi, nii tǝ thla thlǝnchi nenchi. 46 Ɓechi kǝ hur heshi kǝ chokki kǝ ɗaˈkǝti heshi, kǝthlǝm nat thla fǝrchǝ kit kǝ nenchi kǝ chok hur wuthla wa.

47 “Nat thla sǝkchǝ ndiktinchi, paɗ kǝs wa har wa, ngga nggǝt nech chakan mee wa. Ngga kǝthlǝm kǝ chakani mee heshi ɓati wa, ɓechi kǝthlǝm kǝ hǝraˈni heshi. 48 Thla karchi nenchi, paɗ thlǝ wa ndiktinchi wa, thlǝ chakan mee si, ndiktiɗi mbuˈti, ndaˈan nech chakan mee ǝ fartǝɗi naa heshi tǝɓata. 49 Ndikwi tǝ alkǝt indinchi wa, Papa tǝɗi thlinchǝ nenchi tǝ indiyan fǝrichǝ kusiˈ kǝ ɗar ǝnɗi nati mbuˈta, tǝ paɗ shenuˈtǝɗi nati mbuˈta. 50 Sǝninchi wa kusiˈ tǝɗi fǝritǝn ya ndaˈan nech kǝ shenuˈta thla thlǝ saˈchǝ kǝ mbǝs shishingnda yi poriˈ. Kǝthlǝm ndaˈan, ǝnɗi thlǝ mbuˈti, thlǝ mbuˈchi kǝɗ ǝnɗi mbuˈitǝ Papa.”