1 “Kǝ sǝɓ hurchiˈyowun kaɗ wa. Fǝrwun kit kǝmɗi Farta, fǝram kit kǝ nenchi paɗ. 2 Ə hur wiri Papa mǝt chokchǝsi terchan, manga tǝn kǝɗu wa mǝ ni mbuˈowun nda wa chi tahsowun mǝtsǝ wa? 3 Ma paɗ ɗinchi kǝ tahsowun mǝtsi, ni ɓat kaɗi kǝ ɗi tǝ wunchi kǝmɗinchi, kǝthlǝm kun paɗ kǝ chokwun mǝɗi nati. 4 Kǝɗu, mǝɗi nati ɗǝta kun sǝnwun mbanan.” 5 Kǝn Toma nda ndǝ Yesu wa, “Ai Chinmǝn, sǝn wa ǝn mǝɗi natu ɗǝta wa. Necha ǝn sǝn mbanan wa kǝni?”

6 Ndan kǝ Yesu wa, “Nggǝt nech kǝ mbanda, nggǝt nech kǝ kit taˈan, nggǝt paɗ nech kǝ shishingnda. Yowunsi nech ɗǝta kǝmɗi Papa wa, mangga tǝmɗinchǝ ndak wa. 7 Mam wa tǝ sǝn wun nenchi, mǝ sǝn wun Papa paɗ. Kǝɗu thlaˈ tǝ nakanya sǝn wun anchi, paɗ niwun anchi.”

8 Kǝɗu Filibus ndan kan wa, “Ai Chinmǝn, pǝna ǝn ndǝn Chinda, kǝthlǝm kǝ wathlaˈanchǝ ha.” 9 Nggǝman kǝ Yesu wa, “Filibus chokinchi tǝ wunchi nggǝ nduk wa, chika kǝɗu shin wen nenchi wa? Nat thla nech nenchi ǝ nitǝ Chinan. Chichan in kǝni naa tu ndat wa, ‘Pǝnaˈǝndǝn Chinan’? 10 Kǝɗu fǝr wakno kit kǝ nechi wa, nechi huri Chinda, paɗ Chinda nechan hurinchi. Ndiktǝɗi nati mbuˈowunda, ngga kǝthlǝm indinchi nati mbuˈta wa, Papa tǝɗi nech chok tǝ hurinchi nech chit tarchiˈyan. 11 Fǝram kit kǝ nenchi, nechi huri Chinda, Chindǝ paɗ hurinchi, ndu kǝ fǝr wun kit kǝ tarchaˈan ndak. 12 Kǝɗu kittaˈan nati mbuˈowunda, nat thla fǝrichǝ kit kǝ nenchi, tarchǝɗi thlǝ chiti mǝthlan paɗ nechan chit kǝɗu. Nan chit paktǝ tarcha thla pǝɗanchǝ thleya ha, kǝthlǝm tǝni nggǝrandǝ in kǝmɗi Chinda. 13 Nat ǝnɗi shitǝ wun tǝ thlǝmna paɗ ni chita, kǝthlǝm kǝ manan fee Chinan tǝmɗi Wanan. 14 Chika mǝ shitǝ wun tǝ thlǝmna ni fǝrowunda.

15 “Ma thlǝ chichowun thlǝrɗakta, kǝ nowun para ǝnɗi mbuˈti. 16 Nggǝt paɗ ni shiyandǝ Chinda, nan fǝrowun thla nech kǝsowun ndǝsi kǝ chok hur wun kǝ poriˈ. 17 Mǝthlan nech kǝ Shemata yi kit, thla nawak nafchi heshi nggǝm anchi fa, kǝthlǝm nawa anchi wa, paɗ sǝn wa anchi wa. Kun ǝ sǝn wun anchi kǝthlǝm mǝthlan chokta tǝ wunchi mǝt arta, nan nat paɗ hur wanɗǝkaɗech ˈyowun.

18 “Ni mal wunchi kǝ wan wemǝrcha wa, ni ɓat kǝmɗi yowun. 19 Takchan wanshengnan ngguɗyeh kǝɗa peˈ wu nafchi heshi nggǝr naa nenchi wa. kǝɗu, kun nowun naa nenchi. Kǝthlǝm nggǝta nechi tǝ shishingndǝ fa, kun paɗ nowun nat tǝ shishingndǝ fa. 20 Ə fartǝ inni taˈan nat wun sǝnda wa nggǝt nechi hwiri Chinda, kun paɗ ǝ hwirinchi, nggǝt paɗ ǝ hurˈyowun. 21 Nat thla sǝnchǝ kusiˈ chinchi, paɗ mǝthlan parat har, mǝthlan thlǝ pǝnichǝ thlǝrɗakta. Thla thlǝ pǝnichǝ thlǝrɗak tǝ paɗ, naa Papa pǝnan thlǝrɗaktǝyan, nggǝt paɗ ni pǝnan thlǝrɗakta, kǝ pǝni indinchi kǝmɗiyan.”

22 Kǝɗu Yahuda (Ngga Iskariyoti wa) ndan kan wa, “Ai Chinmǝn, michicha natu pǝn indiyo kǝmɗiyaˈan, kǝɗu ngga kǝmɗi nafchi heshi wa?” 23 Nggǝman kǝ Yesu nda kan wa, “Nat thla thlǝ pǝnichǝ thlǝrɗakta, nan para ndiktinchǝ har. Papa paɗ nan pǝnan thlǝrɗakta, nggǝt tǝ Chinda naa ǝn ɓata kǝ chok ǝn tǝ anchi. 24 Thla thlǝ pǝni wakchǝ thlǝrɗakta, nech para ndiktinchǝ har wa. Ndiktǝɗi nat wun sǝktiya paɗ ngga yina wa, yi Chinda thla thlǝnchi nenchi.

25 “Mbuˈowunchi ichiɗiya kǝ peˈ ka mǝn tǝ wunchi. 26 Kǝɗu thlǝ Kǝsandǝ nafchǝsi, Shemeti Farta, thla naa chinɗǝ thlǝnda hur thlǝmna. Mǝthlan nech chaˈowun chika mǝ har, paɗ kǝ kuɗ kowun tǝ nat ǝnɗi mbuˈowundi. 27 Malchi wunchi tǝ kǝɓi kaɗi. Kǝɓi kaɗi inchi nati fǝrowunda. ngga kǝɗ thla thlǝ fǝrtǝ heshi nati fǝrowunda wa. Kǝ thlaˈ hur inchiyowun wa, paɗ kǝ lekǝwun wa. 28 Ə sǝk wun ndinchǝ wa ndowunchi wa ni pǝɗata, paɗ kǝ ɓi kaɗ kǝm ɗiyowun. Mam wa thlǝ pǝni chowun thlǝrɗakta mǝ nowun chit mbǝnfata kǝthlǝm tǝni kǝmɗi Chinda, kǝthlǝm paɗ Chinda mbǝrichi ha. 29 Kǝɗu nakanya mbuˈowunchi kǝna sǝɓta, kǝthlǝm fartǝɗi sǝɓtǝn, kǝ fǝrwun kit. 30 Peˈ wi ndikta tǝ wunchi kaˈan wa. Kǝthlǝm thla nech chit kuturakti heshiɗiya mǝthlan ɗar ɓata. Alkǝtˈyansi kǝ indinchi wa. 31 Kǝɗu taˈan, kǝthlǝm heshi kǝ sǝn wa thlǝ yahchi Chinda. Paɗ thlǝ chichi ichǝ kǝɗ ǝnɗi mbuˈtǝ Chinda. Thlaˈama kǝ pǝɗamǝn mǝɗiya.”