1 Kǝ tǝɓan kǝ Yesu shii tǝɗiya, chekan kesh, fen tǝ kǝmsichiyan kǝ heshi kufi wanɓǝrti Kidron. Mǝɗi naa yowun hǝngga wandǝfta, paɗ yim kan si tǝ kǝmsichiyan.

2 Yahuda thla fǝrchǝ anchi sǝn tǝ mǝɗan, kǝthlǝm Yesu shin ha tǝ kǝmndǝ ha tǝ kǝmsichiyan ǝ minni. 3 Kǝɗu paɗ Yahuda ɗǝkan kǝ hur hǝngga wanɗǝf taˈan, tǝ nggomǝn fǝ yaanchi Romawecha, tǝ fowun fǝ pǝk mii Wiri Fartǝ har. Tǝ fee thlǝndǝ paktǝ pangǝncha, tǝ Farisiyawecha. Tǝ tǝkaascha ǝ harchiyanda tǝ ɗǝ finda, tǝ ǝna yaancha.

4 Yesu paɗ kǝ sǝn kan ǝnɗi nat nech kǝs anchi, mbǝhakan kǝ panga kǝ mbǝs tanda, ndang kan tanda wa, “Wun nat wun kata?”

5 Nggǝman kanda, nda kanda wa, “Yesu thlǝ Nazarata.” Ndang kǝ Yesu tanda wa, “Nggǝt niya.” Yahuda thla fǝrchǝ anchi mǝthlan kit nat tǝ nanda. 6 Kǝ ndang kǝ Yesu tanda wa, “Nggǝt niya,” nggǝran kandǝ in kǝrsǝn kǝrsǝn hǝmkan ndǝ ha.

7 Kǝɗu nggǝr kan chiha ndata, “Wun nat wun kata?”

Nda kanda wa, “Yesu thlǝ Nazarata.”

8 Nggǝta tapi mbuˈowunchi wa nggǝt niya. “Maa nggǝt nat wun kata malaman nafchiɗiya kǝ pǝɗanda.” 9 Thleya chichan kǝɗu kǝthlǝm kǝ ndiiɗan fee ndiktǝɗi ha choh mbuˈtǝn wa, “Ə hur fee fǝritu mǝkawi yowun kaɗ chika arta wa.”

10 Kǝɗu Siman Biturus paɗ thla naa kapa thlutǝs harˈyan. Kǝtan kan wanthlutaˈan kesh, chathlan kan thlǝma harsǝm i mafati kapa pangnan kaɗi, naa thlǝman wa Malkus.

11 Kǝɗu ndang kǝ Yesu Biturus wa, “Nggǝran thlutiyo kaɗi kǝ hur pamaɗan. Ngga kǝ si wan kongga nggwarkana tǝɗi nda Chinda wa kǝ si wa?”

12 Chat fǝ yaancha tǝ kapat nanda, tǝ paktechi Yahudawecha kǝsan kandǝ Yesu. Kǝnan kanda. 13 tǝrkwathl kanan pǝɗaka ndǝ tǝ Yesu kǝmɗi Hanana, mǝthlan tǝɗi nech kǝ chin nu Kayafa. Kayafa paɗ mǝthlan nech kǝ kapa pangnda ǝ thlǝhaɗan. 14 Kayafa mǝthlan tamchǝ fǝran paktechi Yahudawech sakanan ha tǝ ndat wa, kwechan nef arta kǝ mǝra mǝni nafchǝ nat.

15 Kǝɗu Siman Biturus parakan Yesu tǝ kǝrsa, kǝɗu chit yowun kimsha paɗ. Kǝthlǝm ǝ sǝn kapa pangnan kǝmsiˈini, malan kǝ fee yim kan kǝ hur wuran kendech tǝ Yesu, 16 Biturus paɗ thlarkan ha kit mii kǝnda tǝ heshi. Arti kǝmsiɗi sǝndǝ Hanana anchi yu chekan kesh, ndikkan tǝ wannuwanɗi nech pǝk mii kǝtǝnan har, kǝna yimandǝ Biturus si.

17 Wannuwan ɗi nech thlartǝ mii mbangngan yu, chihan kan mee Biturus ndang kan wa, “Ngga chǝ artǝ hur kǝmsichi nafɗa wa?”

Nda kan wa, “Auwa, nggǝtsǝ huran wa.”

18 Fee chit mbita, kǝthlǝm ndaˈan mafecha tǝ fee thlǝ pǝkchǝ Wiri Fartǝ har yu, njaˈ kandǝ wata nakandǝ hwarta. Biturus paɗ kit tǝ tanda thlǝma waɗan nakan hwarta.

19 Kapa pangnan paɗ chihan kan Yesu miicha kǝ ɗar kǝmsichiyan tǝ chaˈanan ˈyan kaɗi.

20 Nggǝman kǝ Yesu ndakan wa, “Ndikani heshi hayang. Paɗ kǝ pori thlǝ nechi chaˈandǝ kandǝ hur mǝt nggomndi Yahudawecha tǝ hur Wiri Farta mǝɗi thlǝ nggomndǝ nat Yahudawecha. Mbuˈwi ǝn tǝ wuɓtǝ fa wa.” 21 “Mǝ chicha natu chǝhi miicha, chihan fee sǝkchǝ nenchi. sǝndǝ ǝnɗi mbuˈti.”

22 Kǝ mbuˈ kǝ Yesu kǝɗu, yowun hur fǝ pǝk wiri Fartaˈan har thla nat ndǝ nduk, mbalakandi. Nda kan wa, “Kǝɗu natu nggǝmaandǝ kapa pangnda wa?”

23 “Nggǝman kǝ Yesu ndakan wa, maa ǝ mbuˈinchǝ ɓǝɓi ǝna, fǝrko sǝnansi tǝ ndat wa ngga kǝɗu wa. Maa paɗ mbuˈinchi ǝnɗi nech keˈkeˈ, mǝchicha natu mbala nenchi?” 24 Kǝɗu Hanana pǝkkan Yesu tǝ harchiyan kǝ kǝnan kǝmɗi Kayafa kapa pangnda.

25 Fartaˈan Siman Biturus peˈchan kit ǝ hwarta thlǝma wata, “Fe nat ndǝ mǝt arta chihan kanda wa, chǝpaɗ ngga necho artǝ hur kǝmsichiyan wa?”

Chat askan inda nda kan wa, “Auwa, nggǝtsǝ huran wa.”

26 Kǝɗu artǝ hur mafati kapa pangnan, thla nggitik tǝ ndǝ tǝ thla chalathla ndǝ Biturus thlǝmat ˈyan kah yu. Chihan kan nda kan wa, “Awi, nawi wech tǝ anchi hur hǝngga wanɗǝftǝɗi wa?” 27 Nggǝrkǝ Biturus as inda. Chat kǝɗu kǝn chakkartǝ kwarta.

28 Walwurtǝ pung, paktechi Yahudawecha tǝrkan ndǝ Yesu thlaˈ tǝ mǝɗi Kayafa. Ɗǝkandǝ tǝ anchi kǝ wur kuturakti kapa nafan kǝthlǝm kǝ chakan fee mee. Fen Yahudawechaˈan yim wandǝ kǝ hur wur kuturaktaˈan wa, kǝthlǝm kǝ tǝkǝmndǝ kaɗ kǝ wulandǝ sǝmǝn mbǝnfa tathla wa. 29 Kǝthlǝm ndaˈan Bilatus chekan kesh kǝmɗiyanda nda kan wa, “Mii sǝɓandǝ nafɗi kaɗ ya?”

30 Nggǝman kandǝ ˈyan, nda kanda wa, “Mamwa nafɗa chǝwa ɓǝɓi ǝna wa, mǝ naˈǝn ɓǝ taˈanchi kǝmɗiyo wa.”

31 Ndang kǝ Bilatus tanda wa, “Pǝɗam taˈanchi kun tǝ indiyowun, kǝ thle wun chak meˈyan ha kǝɗ nda kusiˈ ˈyowun.”

Chat Yahudawechaˈan ndang kan nda wa, “Auwa, alkǝt ˈyaˈansǝ kǝ thle ǝn chak meeˈi nef ha kǝ mǝrta wa.” 32 Thleya chich fee kǝthlǝm kǝ ndiiɗan fee ndikti ha nda Yesu choh, kǝ ɓǝra weˈtǝ mǝrtǝɗi natǝn chita. 33 Chat Bilatus nggǝran kan in kǝ hur wur kuturaktaˈan, ˈyakan Yesu ndang kan wa, “Chǝ nech kǝ kwitiri Yahudawecha wa?”

34 Nggǝman kǝ Yesu nda kan wa, “Thleya mbuˈtǝ yo wa, ndu fowun mbuˈuchǝ kǝ ɗar indinchi wa?”

35 Nggǝman kǝ Bilatus nda kan wa, “Nggǝt thlǝ Yahudawata? Nafchiyowun tǝ Paktǝ pangncha fen ɓech tǝ wechi kǝmɗinchi. Mǝ chitu?”

36 Nggǝman kǝ Yesu nda kan wa, “Kuturaktinchi ngga yi heshi ɗiya wa. Mamwa kuturaktinchi yi heshiɗiya, mǝna mafechichi yaandǝ fa kǝ njaandǝ paktechi Yahudawech kǝ kǝsichǝnda. Kǝɗu kittaˈan, kuturaktinchi ngga thlaˈtǝ hur heshiɗiya wa.”

37 Nggǝman kǝ Bilatus wa, “Awi kwitir nako wa?”

Nggǝman kǝ Yesu nda kan wa, “Kǝɗ thlenni mbuˈtu yu, kwitir naki. Kǝthlǝm ndaˈan che fee nggǝt nenchi, ɓati kǝ hur heshi, kǝthlǝm kǝ mbuˈi kit. Chika wun thlǝ mbuˈchǝ kittaˈan, nan kan thlǝmat shenuˈtinchi.”

38 Nggǝman Bilatus ndan kan wa, “Mǝ nech wa kǝ kittaˈan tina?”

Kǝ mbuˈkan kǝɗu, nggǝrkan chet kesh kǝmɗi Yahudawecha, ndang kan tanda wa, “Nggǝt ya, mbǝsa wi tǝ ǝnfa wa. 39 Nakan tar raˈat ˈyowunsi, ma ǝ chǝ fartǝ Mbǝnfa Tathla, thlǝ kalowunchi nef ha arta. Kǝɗu, yah wunsi kǝ kallowunchi Kwitiri Yahudawech ha wa?”

40 Chat thlaˈan kandǝ mǝk wanhera nakandǝ ndat wa, “Auwa, ngga thleya wa, kalaˈan Barabas ha.” Barabas tiˈini tamtǝ thlaˈandǝ mbata thla ɗǝcha kǝ ɓǝlan fee nefa.