4
Kaɗan Hweˈrǝ Yesu
Chat Shemeti Farta ɗǝkan tǝ Yesu kǝ hur chanjeya, kǝthlǝm kǝ kaɗan Hweˈra. Yesu kǝrtǝ kwichimnda mǝnda kumchit foɗɗa (40), witǝ tǝ farta, sǝm wa ǝna wa. Tǝkǝɗu nak mitǝfiyan. Ɓak Hweˈra kǝmɗiyan, ndang kan wa, “Maa chǝ Waˈi Farta, ndandǝn ɗakwanchiɗiya wa, kǝ chǝndǝ kaɗ kǝ njohǝma.”
Nggǝman kǝ Yesu wa, “Yaranchǝ fee ha hur Lawlawati Farta ndat wa, ‘Ngga tǝ ɗǝsǝmndǝ ndak naa nef nat ha wa. Nan nat ha tǝmɗi ndiktǝɗi ɓech mǝɗi Farta.’ ”
Pǝɗak Hweˈrǝ tǝ Yesu kǝ Urshelima mǝrɓa thla chiɗ chiɗ. Ɗǝfkan anchi kǝ thlar ha mǝɗi nech njang ǝ Wiri Farta. Ndangkan wa, “Maa chǝ Waˈi Farta, puru kaha. Kǝthlǝm nechan kǝ yaraɗan ndat wa,
‘Nan shenuˈandǝ fǝ thlǝnchiyan kǝ ɓǝratu wa.
Nan ɗǝf tanda kǝ choˈuchǝnda,
kǝthlǝm kǝ thlǝfeen sarchiyo ɗekwena wa.’ ”
Ndangkǝ Yesu wa, “Nechan kǝ yaraɗan paɗ tǝ ndat wa, ‘Kǝ keɗeen Chinda Fartiyo wa.’ ”
Tǝ paɗ, nggǝrkǝ Hweˈrǝ ɗǝt taˈanchi kǝ ɓǝra yowun ngwela thla njang kaˈan pǝnankan nat kutǝrakti heshiɗiya nat tǝ maandiyanda. Ndangkan wa, “Nat ichiɗiya ni fǝruta ma koppin ha pangngǝnna kǝ firichin maanda.”
10 Ndangkǝ Yesu wa, “Pǝɗo mǝɗiya, chǝ Hweˈra. Kǝthlǝm nechan kǝ yaraɗan ndat wa, ‘Kǝ meneen Chinda Fartiyo, mǝthlan ndak natu maananda.’ ”
11 Chat malkǝ Hweˈrǝ anchi ha. Chat fǝ thlǝnchi Farta ɓakanda, nakandǝ maananda.
Nggak Yesu teryan ǝ hahi Galili
(Mar 1:14-15; Luk 4:14-15)
12 Kǝ sǝkkǝ Yesu wa kǝsan fee Yohanna nggǝlan fee ǝ pursuna, chat thlaˈkan nggǝrangkan in kǝ hahi Galili. 13 Malkan mǝrɓi Nazarat ha, nggǝran kan in kǝ mǝrɓi Kafarnahum tǝ chokta. Kafarnahum paɗ, nechan mii hawurta, ǝ sǝrtǝ hahi Zabaluna tǝ Naptali. 14 Chokti Yesu ǝ minni ndiiɗan tǝ ǝnɗi ha mbuˈtǝ thlǝ shenuˈtǝ tǝ yahti Farta Ishaya. Thla ndech wa,
15 “Nafchi hahi Zabaluna tǝ nafchi hahi Naptali.
Kun tǝ ɗi nech ǝ mban hawurta, tǝ paɗ heshi kufi Urdun,
nafchi hahi Galili yi fee nawakchǝ kǝ Yahudawecha.
16 Nafchiɗi thlǝ chokcha hur wuthla,
ni ndǝ kapa ɗaˈkǝta.
Kǝ ɗar fee thlǝ chokchǝ ǝ kanɗǝftǝ mǝrta,
naa ɗaˈkǝt finandata.”
17 Thlaˈtǝ ǝ fartǝˈini, nggakkǝ Yesu ɓasa, nakan ndat wa, “Tǝramha kǝthlǝm kutǝrakti Hulafǝrta nduk ha.”
I Yesu kǝmsichiyan yi tǝrkwathl kanan
18 Kǝ nak Yesu wiˈtǝ kǝlaar hawurti Galili, nakan nafchi chap, Siman (thla thlǝ ˈya fee wa Biturus), tǝ wanmanan Andrawus. Tandǝ cham mapatˈyanda kǝ hur hawurta, kǝthlǝm fen fǝ tǝmǝncha. 19 Ndang kǝ Yesu tanda wa, “Ɓama, param nenchi, ni nggǝrowundǝ kaɗ kǝ fǝ ˈya nafcha, kǝmɗi Farta.” 20 Chat kǝɗuyu malkandǝ mapechˈyandǝ ha parakan ndǝ ndi.
21 Kǝ malkan minni ha, nakan fowun nafchǝ chap wanmankakta, Yakubu waˈi Zabadi tǝ wanmanan Yahaya. Tandǝ ɗas tǝ chinnanda hur kombawalˈyanda, tandǝ tahǝs mapecha. ˈYak Yesu tanda, 22 chat kǝɗuyu malkandǝ kombawaltaˈan ha tǝ chinnanda, parakandǝ ndi.
Chaˈan Yesu nafchi har paɗ kǝnanchi tandǝ kaɗi
23 Wiˈyankǝ Yesu nat hahi Galili. Nakan chaˈandǝ kaɗi ǝ hur kǝtǝn nggomndiyanda, paɗ nakan ɓas kusheˈtǝ ndik tǝ kutǝrakti Farta. Nakan kǝnandǝ fee nech haˈchan kaɗ hurnandǝ nat. 24 Kusheˈtaˈan fen ha chik tǝ yeni hur hahi Suriya. Nak nafchǝ ɓat tǝ fee nech haˈchan nat, tǝ hatǝ fech fǝ samǝn samǝn. Fee nech kofiˈta, fowun paɗ tǝ hwaˈarchǝ fa, tǝ fee tǝ chandarchif yu, ta fee saa fechˈyandǝ kaɗi, kǝnan kan tandǝ kaɗ paɗ. 25 Kapa nggomnda kaˈan thlaˈta ǝ hahi Galili, tǝ mǝrǝɓ chi kum, thla thlǝ ˈya fee wa Ɗikafolis, tǝ Urshelima, tǝ hahi Yahudiya. Nat ta fee nech heshi kufi Urdun, parech ndi.