1 Ə fartǝɗiya fowun Farisiyawecha tǝ fǝ chaˈandǝ kusiˈ i Musa kaɗi ɓech kǝmɗi Yesu, thlaˈtǝ ǝ Urshelima. Chihankandǝ Yesu wa, 2 “Michicha thlǝ fǝr waktǝ kimsichiyo maanda kǝ ǝnɗi chaˈamǝndǝ kakechmǝn har wa kǝ chǝmǝn? Chapawandǝ harchiyandǝ kǝɗ ǝnɗi chaˈaˈandǝ kaakechˈyaˈan har wa, kǝ nandǝ sǝm ɗǝsǝmnda wa.”

3 Nggǝmangkǝ Yesu wa, “Michicha thlǝ chenduwun kusiˈ i Farta kaɗi kǝthlǝm raˈatˈyowun? 4 Ɗowun wu Farta wa, ‘Kǝ fǝrawun maandǝ chindǝ tǝ manda wa’? Nggǝrkan ndat paɗ wa, ‘Nat thla mbuˈanchi ɓǝɓi mee chinan ndu manan, kǝ ɓǝlan fee wa’? 5 Paɗ thlǝnechowun ndat wa, ma ndan yowun chinan ndu manan wa, ǝnɗi kǝmchǝs mǝ kǝ kǝsowun chǝsi tapi fǝrani Farta. 6 Kǝthlǝm ndaˈan, kǝmwasi kǝ kǝsantǝ chinansi tǝ ǝnaɗan wa. Karkowun para ǝnɗi mbuˈtǝ Farta kǝthlǝm para raˈatˈyowun. 7 Kun koha nafcha, ǝnɗi mbuˈtǝ Ishaya, thlǝ shenuˈtǝ tǝ yahti Farta kǝ ɗar indiyowun kit. Ndatǝn wa.

10 “Ndang kǝ Yesu nggomnan wa mbǝham nduk kǝ thlǝmanna. Ndangkan tanda wa, “Kam thlǝmat ha kǝ wathlowunchǝ ǝnɗi nati mbuˈtǝ ya. 11 Ngga ǝnɗi yimchǝ kǝ meˈi nef kǝ yim kǝ hwirˈyan ndaˈan thlǝ tǝk manchi nef kaɗ wa. Paɗ ǝnɗi thlǝ chech kesh i meˈi nefa ndaˈan thlǝ tǝkmanchi kaɗi.”

12 Ɓak kǝmsichiyan mbǝs ndi chihan kanda wa, “Shinin wa fen Farisawecha, sǝɓ hwirˈyandǝ kaɗ kǝ sǝkkandǝ ndiktǝɗiya wa?”

13 Nggǝman kǝ Yesu wa, “Nat ɗǝftǝɗi paˈwaktǝ Papa hulafǝrta, naa fee kǝtandǝ kaɗi. 14 Mallaman tanda. Nechandǝ kǝ komǝn nafcha, fee thlǝ parech tǝ komincha. Maa na komnda kǝs kalati komnda, nat nda nandǝ hǝmndǝ kǝ hur kwiya.”

15 Ndak Biturus wa, “Mbuˈaˈandǝn saktǝ wuɓtǝ ndiktǝɗiya.”

16 Ndak Yesu wa, “Paˈkǝ nakanya kun paɗ wathlowonwu ǝnɗi ha nati ndiktǝ kǝ ɗaran wa? 17 Sǝnwowun wa ǝnɗi yimchǝ kǝ meˈi nefa, thlǝ mbǝrchan ha kǝ hwirˈyan. Nee nǝ minni kǝ poriˈ wa, paɗ kǝ kǝrsa kǝ kǝtang fee kesh. 18 Paɗ ichiɗi thlǝ ɓech kesh meˈi nefa, thlǝ chechandǝ kesh hur wanɗǝkaɗatˈyan. Fen thlǝ tǝkmanchi nef kaɗi. 19 Kǝthlǝm hur wanɗǝkaɗati nefa thlǝ ɓa ɓǝɓi kaɗecha. Ɓǝɓi ichi kǝɗ, ɓǝlfata, fǝlaukǝta hur reta, fǝlaukǝta hur kumi reta, yarkǝta, mbuˈlekcha, tǝ sǝɓandǝ thlǝm fowun kaɗi. 20 Ichiɗiya thlǝ tǝkmanchi nef kaɗi. Sǝm ǝn ngga tǝ chapandǝ her kaɗ kǝɗ ǝnɗi mbuˈtǝ raˈata, nee ɗǝf nef kǝ tǝkǝmǝn kaɗ pangngǝn Farta wa.”

21 Malkǝ Yesu mǝɗan ha pǝɗakan kǝ thle wanmǝrǝɓchi Taya tǝ Sidon. 22 Kǝɗ kwishya nunefa thlǝ Kanˈana, thla nech tǝ choktǝ ǝ thle mǝɗan, ɓakan kǝmɗi Yesu, nakan tǝta. Nakan ndat wa, “Ai Chinda, Waˈi Dauda, kǝ haɗuchi fa. Ɓǝɓi hweˈrǝ ɓahandǝ waˈinchi kǝ nuwaa kaan.”

23 Mbuˈawu Yesu nunafan ǝna wa. Chika tǝ kǝɗu, nunafan malawa paraˈ tandǝ tǝ shita wa. Minni ɓak kǝmsichiyan, shiyan kandǝ Yesu, ndat wa, “Ndandǝn nuɗa wa, kǝ pǝɗa, kǝthlǝm mǝthlan ɓilla mǝnchǝ kǝrsa tǝ tǝta.”

24 Ndak Yesu wa, “Nggǝtta thlǝnchǝ fee nenchi kǝmɗi nafchi Israˈilawechǝ ndak. Nechandǝ kǝɗ chaap chohrecha fee sakecha.”

25 Ɓak nunafan nduk. kopkan ha shiyankan, “Komkom kǝsisi, Chinda.”

26 Nggǝrkǝ Yesu sǝ wa, “Ɗǝɗ wa sǝwa kǝ tǝr fee ɗǝsǝmndi wancha paɗ kǝ fǝran fee yiɗcha wa.”

27 Ndak nunafan wa, “Ənɗi mbuˈtu ndaˈan nech kǝ kittaˈan Chinda. Paɗ yiɗcha thlǝ mbǝschandǝ fishirtǝ ɗǝsǝmǝnɗi hǝmchǝ kah fartǝɗi na thlǝ wirˈyandǝ sǝm ǝna.”

28 Nggǝman kǝ Yesu wa, “Chǝ nunefa, thla na fǝr kitˈyan manchan. Ənɗi yahtǝ wanɗǝkaɗatˈyo naa fee chuta.” Chat kǝɗuyu, waˈyan kǝ nuwaa, kǝn kan kaɗi.

29 Ə minni, Yesu pǝɗakan kǝ mii hawurti Galili. Minni tǝrkan kǝ kǝlaar tingringnda, chokkan ha. 30 Tertǝ nggommǝn nafcha ɓakandǝ kǝmɗiyan, ɓakandǝ tǝ fee sa fechǝyandǝ kaɗi, tǝ komincha, tǝ tǝraɗcha, tǝ ɓamcha, tǝ fowun terchan. Sǝkandǝ tandǝ ha kǝ pangngǝn Yesu, kǝnankan tandǝ kaɗi. 31 Nafchaˈan sakandak inda, kǝ nakandǝ. Nafchiɗi tamwakchǝ shenuˈta tandǝ ndikta. Tǝraɗcha kǝndǝ kaɗi, fee sa fechiyandǝ kaɗi tandǝ wiˈta, paɗ komincha tandǝ namǝta. Manankandǝ Farta i Israˈla.

32 ˈYak Yesu kǝmsichiyan kǝ ɓandǝ nduk kǝ thlǝmaɗan. Ndangkan tanda wa, “Nggomǝn nafchǝɗa haɗi tǝfa. Kǝthlǝm ɓukwiya mǝnyandǝ mahkan thlǝman naa, paɗ ɗǝsǝmndes kǝ sǝm nda wa. Ə yahwisi kǝ kali tandǝ ha ǝ mita wa. Kǝthlǝm yahwisi kǝ kǝt fowun hur nandǝ ǝ mbanda wa.”

33 Ndak kǝmsichaˈan ˈyan wa, “Nechamǝn mbǝs ɓilshet ǝ ayi thla natmǝn sǝman ǝn tertǝ nggomǝnɗiya, ǝ chanje kǝ ɗa ya?”

34 Chihankǝ Yesu mee tanda wa ɓilshet kurmi nessiyowun. Nggǝrkandǝs wa, “Ɓilshet muɗ nessi tǝ wan yirǝfchǝ ngguɗyeh.”

35 Ndangkǝ Yesu nafcha wa, kǝ chokndǝ ha kǝ haha. 36 Kǝ tǝrkǝ Yesu ɓilsheɗi muɗyu tǝ yirfan, chǝkan usoko kǝmɗi Farta, chǝchen kan ha, fǝrankan kǝmsichiyan. Kǝmsichaˈan nakandǝ fǝrandǝ nggommǝn nafchaˈan.

37 Nat nda sǝmkanda nggal kanda. Nggomankǝ kǝmsichiyan fishirchaˈan paktǝ inafchǝ muɗ. 38 Fee sǝmcha hǝssǝ aruˈ foɗɗa, shengngawu fee tǝ nǝssǝ, tǝ wancha wa. 39 Kǝ welankǝ Yesu tertǝ nggomnan ha, chat yimkan kǝ hur kombawal pǝɗakan kǝ hahi Magadan.