1 Kǝrsǝ mǝndǝ michcha, tǝ nda ɗi nda Biturus wa, Yesu nech kǝ Kǝristi. Pǝɗak Yesu tǝ Biturus, tǝ Yakubu, tǝ Yohana mbuˈtǝ Yakubu, kǝ ɓǝra ngwell njang, fen ichǝt nanda. 2 Minni ɓeɗak fatˈyan ha pangngǝn nanda. Nak chǝmandiyan chǝm ndǝf kǝɗ watfarta. Kapatˈyan paɗ chǝkan kaɗ heɗiɗi kaan. 3 Chat nak kǝmsichiyan Musa, tǝ Iliya ɓindǝ kǝ thlǝma Yesu, paɗ tandǝ ndikta tǝ ndi.

4 Ndangkǝ Biturus Yesu wa, “Chinda, ndiˈchansi nat ǝn mǝɗya. Maa nggǝminfa, ni tahǝs kuwurchǝ mahkan, arta yuwa, arta yi Musa, arta paɗ yi Iliya.”

5 Biturus ɗar shenuˈta, chat ɓak husamba heɗiɗi nggǝlandǝ tanda. Sǝkkandǝ ɓǝratǝ hur husambiyan, ndat wa, “Thleya Waˈinchi yahǝnchi anchi, thlǝ mbindi fat kǝ anchi kaan. Kam thlǝmat kǝ ndiktiyan.”

6 Kǝ sǝk kǝ kǝmsichaˈan kǝɗuyu, lekǝkandǝ kaan. Hunakandǝ ha chǝp kandǝ hwir ha. 7 Ɓak Yesu kǝ thlǝmat nanda tǝkan kan her tandǝ fa ndangkan tanda wa, “Thlaˈama, mǝ lekuwun wa.” 8 Kǝ thlaˈan kandǝ inda, ɗǝmbakandǝ ha, nawandǝ yowun wa, Yesu ichiɗan.

9 Kǝ nakandǝ ɓat kah ɓǝra ngwallan, tǝɗankǝ Yesu thlǝmatˈyanda. Ndakan wa, “Kǝ mbuˈawun nǝf ǝnɗi natwun wa, se kǝrsǝ fartǝɗi thlaˈandǝ fee nggǝta Waˈi Nefa ǝ mǝrta.”

10 Chihankǝ kǝmsichiyan wa, “Maa kǝɗu, kǝthlǝm mǝ nda fǝ chaˈandǝ kusiˈ i Musa kaɗ wa, waat kǝ ɓǝ thlǝ shenuˈtǝ tǝ yahti Farta Iliya kwaɗǝn. Kǝn Kǝristi ɓata?”

11 Nggǝmankǝ Yesu wa, “Kittaˈan kǝɗuyu, na Iliya ɓat kǝ nggǝrandǝ chika mǝ kaɗ ndiˈchan, kǝɗ thla natǝn choh. 12 Paɗ nggǝt mbuˈowunda, tapi ǝ ɓi Iliya, fen paɗ sǝnwanda wa mǝthlan wa. Chankandǝ nat ɓǝɓi ichiɗi yahtǝnda kǝ chanda. Kǝɗu paɗ na nggǝta Waˈi Nef saa ɓahtǝ ǝ harˈyanda.” 13 Chat sǝnkǝ kǝmsichaˈan wa nechan ndiktǝ tǝ tanda kǝ ɗar Yohana thlǝ chǝt baptisma.

14 Kǝ ɓakandǝ kaɗ kǝ thlǝma nggomnan, ɓak yowun nef mbǝs Yesu kopkan ha pangngǝn nan. 15 Ndakan wa, “Chinda, kǝ haɗuchǝ waˈinchi fa, hatǝfa chandartǝ fiyan paɗ mǝthlan ɓahtǝ ha kaan. Thlǝ kurɓanchan hǝmndǝ kǝ wata fartǝyowun paɗ kǝ hur ema. 16 Ɓǝnchi taˈanchi kǝmɗi kǝmsichiyo, paɗ mbahǝnwandǝ kǝnandǝ kaɗ wa.”

17 Nggǝmankǝ Yesu wa, “Kun nafcha fǝ kumi fǝr kit cha, yi ɓǝɓi yuwa heshiɗiya. Kǝ kwati nati choktǝ tǝ wunchi? Kǝ kwat paɗ nati kǝrǝs wunchi? Ɓamatǝn ndi.” 18 Yanankǝ Yesu hwaˈran ha, paɗ chek hwaˈran kesh fi waanan, chat kǝn kǝ waanan kaɗi.

19 Kǝmsichaˈan ɓakandǝ kǝ thlǝma Yesu fartǝɗi natǝn ichǝɗan, chǝhan kanda wa, “Kǝthlǝm mǝ mbahǝnwaktǝˈin chendǝ kesh?”

20 Nggǝrangkan tandǝs wa, “Kǝthlǝm fǝr kit ˈyowun ngguɗyeh. Kittaˈan nati mbuˈowunda, maa fǝr kit ˈyowunsi ngguɗyeh kǝɗ wan mustad. Nowun mbahǝn ndandǝ nggwal ɗa wa, ‘Thlaˈu mǝɗya kǝ mǝɗi,’ paɗ nan thlaˈta. Paɗ ǝnsi nech wulowun nda wa. 21 [weˈtǝ ǝnɗa chewa kesh kǝɗu wa, maangga tǝ shiyandǝ Farta, tǝ kǝr kuchumnda wa.]”

22 Kǝ kǝmkǝ kǝmsichiyan kǝ thle Galili, ndangkǝ Yesu tanda wa, “Naa fee fǝr nggǝta Waˈi Nefa kǝ hari nafcha. 23 Nandǝ ɓǝlita, paɗ kǝrsǝ mǝndǝ mahkan nii thlaˈtǝ tǝ shishingnda.” Paɗ sakan kǝ indǝ kǝmsichiyan.

24 Kǝrsǝ ɓati Yesu tǝ kǝmsichiyan kǝ Kaparnahum, ɓak fǝ thlǝt chaminchi chap kǝthlǝm Wiri Farta mbǝs Biturus. Chǝhan kanda wa, “Thlǝ tichǝ thlǝ chaˈananˈyowun chamndǝ kǝthlǝm Wiri Farta kuɗa wa?”

25 Nggǝmang kǝ Biturus wa, “Aa, thlǝ tichan.”

Kǝ yimkǝ Biturus kǝ hur wuran, Yesu nggakchǝ ndiktǝ tǝ ndi. Chihan kan wa, “Mǝ nech kǝ kaɗatˈyo Biturus? Mǝɗi micha thlǝ thlǝt kutǝrchǝ wanɗǝɓithl icha ndu chamnda? Mǝɗi wanchiyanda wa, ndu mǝɗi fowun wa?”

26 Nggǝman kǝ Biturus wa, “Mǝɗi ramcha.”

Ndangkǝ Yesu wa, “Wanchǝ hahiˈan tiwanda wa hacha. 27 Paɗ kǝthlǝm kǝ sǝɓandǝ hwirkaɗ tǝ nggǝmnan wa. Ɗu kǝ kufa kǝ mikin nggalkǝm ˈyo. Kǝ tirin yirif ɗi latu kǝsta, kǝ i neen meˈyan ha. No naa wanɗǝɓǝthl tipesha thla saˈchǝ ndǝnari foɗɗa hwirˈyan. Tǝrko fǝranko tanda, chamndinchi tǝ yuwa.”