1 Kǝ tǝɓak fartǝ yipta. Walwurtǝ pung mǝt shimma ǝ tǝrkwathl far mǝn lǝmo Maryamu thlaˈtǝ Magdala tǝ arti Maryamu taˈan ɗǝkandǝ kǝ ɗǝmbandǝ kwiyan. 2 Kǝnndǝ Maryamu thlaˈtǝ Magdala tǝ arti Maryamutaˈan ɗǝta tapi chǝ fee kapa yiraˈti hahǝ fa. Kǝthlǝm tǝɓǝ yowun thlǝ thlǝndi Chindǝ kaha thlaˈtǝ hulafǝrta, ɓakan patandǝ ɗakwanan kaɗ mii kwiyan, chokkan ǝ ɗaran. 3 Fatˈyan chǝmndǝ fa kǝɗ withlwiˈta, kapechˈyan paɗ heɗǝɗa kaan kǝɗ warathlata. 4 Kǝ nak fǝ pǝk kwiyan ndi lekǝkandǝ kaan nak fatˈyandǝ rǝɓtǝ fa, hǝmkandǝ ha kǝ haha kǝɗ mǝmatecha. 5 Paɗ ndangkǝ thlǝ thlǝndi Fartǝɗi nǝssaˈan wa, “Mǝ lekuwun wa, sǝninchi wa tǝ nowun kaa Yesu thla kukwandǝ fee ha. 6 Mǝthlan su wa, ǝ thleˈi, kǝɗ ǝnɗi mbuˈtǝn. Ɓam nam mǝɗi ɗǝf tǝ fee ndi. 7 Ɗam leɗ leɗ kǝ ndawun kǝmsichiyan tǝ ndat wa, ‘Ə thleˈi ǝ mǝrta. Paɗ nan lat mǝ kun kǝ Galili, ǝ minni natwun naa ndi.’ Tapi mbuˈowunchi.” 8 Chat mal kǝ nǝssaˈan mii kwiyan ha leɗ leɗ. Tandǝ lekǝta, paɗ tǝ chiɗ chiɗ tǝ wanɗǝkaɗat kaan. Tandǝ ɗar rakat kǝ ɗǝndǝ mbuˈandǝ kǝmsichi Yesu hacha, 9 chat Yesu tǝ indiyan kǝm kan tǝ tanda, ndangkan tanda wa, “Kǝɓi kǝmɗiyowun.” Mbǝha kandǝ nduk kǝs kandǝ sarchiyan har, manan kanda. 10 Ndangkǝ Yesu tanda wa, “Mǝ lekǝwun wa. Ɗam ndamandǝn wanmanchina kǝ ɗǝndǝ kǝ Galili. Ə minni nat ndǝ naa nenchi.”

11 Kǝ nak nessǝɗi ɗar wita, chat fowun hur fǝ pǝk kwiɗi har yu yim kandǝ kǝ hur mǝrɓan, fǝrang kandǝ pakktǝ pangngǝncha kusheˈtǝ ǝnɗi sǝɓchǝ nat. 12 Chat ndikkǝ paktǝ pangngǝncha tǝ paktechi Yahudawecha, fǝran kandǝ fǝ yaanchaˈan wanɗǝɓithl kaan. 13 Ndangkandǝ tanda wa, “Nda ma ndǝn nafcha wa, ‘Kǝmsichiyan ɓech yarkandǝ mǝrtiyan wita wanshengngǝnɗi nat ǝn saˈena.’ 14 Maa saˈ kusheˈtaˈan kǝmɗi nggomna paɗ, naˈan inan mee paɗ, nowun yim kǝ hur ɓahtǝ ha wa.” 15 Thlǝk fǝ pǝk ichaˈan wanɗǝɓithlan chǝkandǝ kǝɗ ǝnɗi mbuˈandǝ fee tanda kǝ chǝ nda. Tǝkǝɗu kusheˈtǝɗiya welha hur Yahudawecha kǝ ɓukiya.

16 Kǝrsǝ inini, chat kǝmsichiɗi kum nggǝrsǝ artǝ yu pǝɗa kandǝ kǝ Galili, ɗǝkandǝ kǝ kapa tinringǝnɗi nda ndǝ Yesu tanda wa kǝ kǝm nda. 17 Kǝ nakandǝ ndi chat manan kanda, paɗ fowun ǝ hur nanda fǝr wandǝ kit wa Yesu wa. 18 Chat ɓak Yesu nduk ndangkan tanda wa, “Fǝrichǝ fee nat alkǝtɗi nech ǝ hulafǝrta tǝ paɗ ǝ heshi. 19 Kǝthlǝm ndaˈan ɗama kǝmɗi nafchi heshi nat kǝ ɗǝfwun tandǝ kǝ chok ndǝ kǝ kǝmsichinchi. Kǝnowun chan tandǝ baptisma hur thlǝm Chinda, tǝ yi Wanan, tǝ yi Shemeti thla chiɗchiɗ. 20 Kǝ nowun chaˈanda tandǝ har, kǝthl nandǝ parat har tǝ ichiɗi mbuˈowundi nat. Nii nat tǝ wunchi weenmǝta kǝ ndukwa heshi.”