1 Kǝ saˈkandǝ nduk tǝ Urshelima. Tandǝ nduk tǝ Betafaji tǝ Betani ǝ kǝlaar ngwalɗi thlǝ ˈyafewa Zaitun. Thlǝnkǝ Yesu kǝmsichiyan chap, 2 ndang kan tanda wa, “Ɗam kǝ wan mǝrǝɓɗi pangngǝn wunya, paɗ maa nggǝwun yimnɗǝsi, nowun mbǝsandǝ wan kwaari sǝ thlang ǝ minni, thla tamwak tǝ nef pǝrtǝsi. Kǝ kwasawun ha kǝ ɓowun taˈanchi kǝmɗiya. 3 Maa ǝ chǝhowunchǝ yowun na, ‘Mǝ chich nat wun kwasandǝ ha?’ Ndankowun wa, ‘Thlǝwiryaˈan yahcha tǝ paɗ nan thlǝndǝ kaɗ chat chat ya.’ ”

4 Ɗǝchan ndǝ ɓǝssandǝ wan kwaari taˈan kǝnan fee ha mii mbeya, nduk tǝ kǝlaar mbanda. Nakandǝ kwasandǝ wan kwaari taˈan ha, 5 fowun nafchǝs kit kit minni chǝhan kandǝ mee tanda, “Mǝ nat wun chǝta natwun kwasandǝ wan kwaari taˈan ha?”

6 Mbuˈan kandǝ tanda ǝnɗi mbuˈandǝ Yesu tanda. Minni malangkǝ nafchaˈan tanda. 7 Ɓakandǝ tǝ wan kwaari taˈan kǝmɗi Yesu, tǝr kandǝ ǝna chiptiyanda chip kandǝ kǝ ɗar wan kwaari taˈan, tǝ paɗ tǝr kǝ Yesu kǝ ɗaran chokkansi. 8 Nafchi terchan chip ǝna chiptiyandǝ ha kǝ hur mbanan, fowun paɗ chichekandǝ saˈchǝ ǝ hǝngga nakandǝ sǝt ha hur mbanan. 9 Fee nech pangnga tǝ fee nech kǝrsaˈan nakandǝ thlaˈandǝ ɓǝrata tǝ ndat wa,

11 Yimkan kǝ hur Urshelima, ɗǝkan kǝ Wiri Farta. Wiˈkan ha, ɗǝpang kan ichaˈan nat. Paɗ nakan fartǝ nduk hǝmnda, chekan kesh tǝ kǝmsichiyan kum nggǝrsǝ chap pǝɗa kandǝ kǝ Betani.

12 Əssaɗan kǝ nakan ndǝ mal Betani ha, nak mitǝ fi Yesu. 13 Nakan ɗǝftǝ shukwata langnga tǝ saˈchǝ ndiˈchan, ɗǝkan ɗǝpanda ndu nan mbǝs wan ɗǝftaˈan ɗaran. Kǝ saˈkan, mbǝs wa wanan wa saˈchi ndak, kǝthlǝm ngga fartǝ nggǝttǝyan wa. 14 Ndang kan ɗǝftaˈan wa, “Mǝ nggǝr yowun kan wan chiyo paɗ wa.” Paɗ sǝkkǝ kǝmsichiyan ǝnɗi mbuˈtǝn.

15 Kǝ saˈkandǝ kǝ Urshelima, yim kǝ Yesu kǝ hur Wiri Farta, ngakkan rǝkandǝ nafchǝ kesh fee nech hiyandǝ ichi kaɗi tǝ fee nech hita. Nakan pǝpakandǝ tebǝr i fee nech mbeɗa wanɗǝɓǝthl kaɗi tǝ mǝt chokchi fee nech hiyandǝ ɗiikuturchǝ kaɗi. 16 Nggǝma wa nef kǝ tǝrtǝ ǝna hiyandiyan kaɗi kǝ mbǝrha tǝ mǝt Wiri Farta wa. 17 Nakan chaˈandǝ tandǝ har, ndang kan tanda wa “Nechan kǝ yaranɗan hur Laulawati Farta wa,

18 Kǝ sǝk kandǝ kǝɗuyu, paktǝ pangngǝnchaˈan, tǝ fǝ chaˈanchǝ kusi i Musa kaɗi, ngakkandǝ kaa mbanɗi nat ndǝ mbǝlanda. Tandǝ kwaranda, kǝthlǝm nggomnan nat sakan indǝ tandǝ tǝ chaˈaɗan ˈyan.

19 Chǝk yen farwita, Yesu tǝ kǝmshichiyan thlǝ chechandǝ kesh hur mǝrɓan.

20 Walwurtaˈan nakandǝ mbǝrtǝ ha, nakandǝ ɗǝftǝ shukwaɗan hwerkaɗ thlaˈtǝ thlarchiyan kǝ wan harchiyan. 21 Kuɗuk kǝ Biturus ǝnɗi nda ndǝ Yesu, dǝftǝ shukwaɗan, ndang kan wa, “Thlǝ chaˈanan kaɗi, ɗǝpa ndǝn ɗǝftǝ shukwaɗi ndaa ndu wa no natyu, hwerkaɗi.”

22 Nggǝmang kǝ Yesu wa, “Fǝram kit kǝ Farta,” 23 Kittaˈan nati mbuowunda, maa naa yowun mbahǝn nda ndǝ nggwalɗiya wa, ‘Ɗu, mǝku fatˈyo kǝ hur hawurta,’ paɗ aswa indǝ hur wanɗǝkaɗatˈyan wa, fǝr kan kitsi tǝ ndat wa ǝnɗi mbuˈtǝn nan chok tǝ kǝɗu, nechan nat kǝɗu paɗ. 24 Kǝthlǝm ndaˈan nggǝt mbuˈowunda, nat ǝnɗi shitǝwun hur shenuˈtǝ tǝ Farta, kǝ fǝrwun kitsi wa mbǝswun, nechan nat kǝ yuwun paɗ. 25 Maa thlar wun ha nowun shenuˈtǝ tǝ Farta, maa yowunsi hur wanɗǝkaɗatˈyowun, kalam ndǝ ha. Maˈna Chinwun hulafǝrta, kalowun ɓǝɓifech ˈyowun ha. 26 [Maa kalawowun nafchǝ ɓǝɓifech ˈyandǝ ha wa, chinwun thla hulafǝrta ngech kalawunchǝ ɓǝɓifechˈyowun ha paɗ wa]

27 Nggǝr kǝ Yesu tǝ kǝmsichiyan yimndǝ kǝ Urshelima. Nakan wiˈyandǝ Wiri Farta, ɓak paktǝ pangngǝncha tǝ fǝ chaˈandǝ kusiˈ i Musa kaɗi, tǝ paktechi Yahudawecha kǝmɗiyan. 28 Chǝhan kandǝ Yesu wa, “Mbuaˈandǝn kǝn mbǝstu alkǝt chǝt ichiɗiya. Paɗaa wun fǝruchǝ alkǝt kǝ chin ichiɗa?”

29 Nggǝrang kan tandǝs wa, “Nii chǝhowun mee ǝn arta. Mbuaˈmitǝn, nggǝt paɗ nii mbahǝn mbuˈowunda ndu tǝ weˈtǝ yen alkǝt thlǝ chǝti ichiɗiya. 30 Baptisma i Yohanna, mbǝs chan alkǝt chiɗan mǝɗi Farta wa, ndu mǝɗi nafcha wa?” Fǝramitǝn nggǝmnan.

31 Ndik kandǝ pǝthlǝr nanda, ndang kandǝ raˈan wa, “Maa ǝ ndimǝn wa, ‘Thlaˈtǝ mǝɗi Farta,’ nan chǝha mǝn mee ndat wa, ‘Kǝthlǝm mii fǝrwaktǝ mǝn kit kǝ ndi?’ 32 Paɗaa maa ǝ ndimǝn wa, ‘Ɓechan mǝɗi nafcha’?” (Tandǝ lekandǝ nggomnan kǝthlǝm nat chika wuni fǝr tǝ kit suwa Yohanna thlǝ shenuˈta tǝ yahti Farta nakan.) 33 Nggǝmang kandǝ Yesu wa, “Sǝnwaˈan wa.”

Ndangkǝ Yesu tanda wa, “Nggǝt paɗ nii mbuˈowunchǝ ndu tǝ yen alkǝt naa thlǝ nati chǝt ichiɗiya wa.”