1 Ngamǝn tǝɗi nech kwaˈkwa hur fǝr kit ˈyamǝn, kǝmchansi kǝ tǝrmǝn heˈti fee nawaktǝ alkǝtˈyandǝsi hur fǝr kit, kǝthlǝm kǝ kǝsamǝn tandǝsi hur kumi fǝr kit ˈyanda, paɗ kǝ chǝmǝn ǝnɗi nech mbǝnadǝ fatˈyamǝn fa ichǝtmǝn wa. 2 Chikwuni kǝ tǝrantǝ wanɗǝkaɗati wanmanan ha kǝthlǝm ǝnɗi nech kǝsandǝsi tǝ paɗ tǝnandǝ fǝr kit ˈyan. 3 Kǝthlǝm chika Kǝristi, ǝnɗi chǝtǝn ngga yi yah indiyan wa. Kǝɗ thla yarandǝ fee, ndat wa, “ˈYaraɗi thlǝ ˈyara fee wechi, chokkan nggǝt thlǝ ˈyara fee.” 4 Ənɗi yarandǝfee choh hur laulawati Farta, yaranchǝ fee kǝthlǝm kǝ chaˈamǝn chǝfee har, ndat wa, tǝmɗi kǝrǝsiˈyamǝn tǝ ndǝkǝsǝfa tǝ ndikti Farta kǝ chokmǝn tǝ ɗǝf wanɗikaɗata. 5 Malan Farta thla thlǝ fǝrchǝ kǝrǝsa tǝ ndǝkǝsǝfa, kǝ fǝrowunchǝ hashaskǝt tǝ raˈan kǝɗ thla thlǝ parat wun Kǝristi Yesu. 6 Tǝ kǝɗu natwun kǝ chokwun mee arta, tǝ wanɗǝkaɗatˈyamǝn artǝ paɗ, kǝthlǝm kǝ manawun Fartaˈan, mǝthlan nech kǝ Farta tǝ chinda, yi chinmǝn Yesu Kǝristi.

7 Kǝthlǝm ndaˈan, thlam raˈan tǝ harchǝ chap-chap kǝɗ ǝnɗi thlǝt Kǝristi wunchǝ tǝ harchǝ chap-chap yu, kǝthlǝm kǝ mananfee Farta. 8 Ngǝt mbuˈowun saktǝɗi chich choktǝ Yesu kǝ mafata kǝmɗi Yahudawecha, kǝthlǝm kǝ pǝntǝ kit i Farta, kǝ sǝnadech ɗǝfmiɗi chandǝ Farta kaakech kaakech nandǝ choh, Farta nan ndiiɗa ndǝ ha. 9 Kǝ ɗǝftǝ fee nawakchǝ kǝ Yahudawecha kǝ maanandǝ Farta kǝthlǝm kaakǝtˈyan. Kǝɗ thla yarandǝfee ha hur laulawata, ndat wa, “Kǝthlǝm kǝt ndaˈan chinda, nii chǝm wechi hur fee nawakchǝ kǝ Yahudawecha, nii in emsa kǝ maanani thlǝmwa.” 10 Kǝ ɓukiya ndech ndikti Farta wa, “Kuntǝɗi nawakchǝ kǝ Yahudawecha, mbǝnam fa raˈanfa tǝ nafchǝ Farta.” 11 Laulawa ɗan nggǝrkan ndat paɗ wa, “Chimam chinda nat kun tǝɗi nawakchǝ kǝ Yahudawecha. Chimamndi nat kun nafchiɗi nech hahichǝ samǝn samǝn.” 12 Ndak Ishaya paɗ wa, “Yowun hur wanchi Yesse nan ɓata, nan chit kuturakta ti nafchǝɗi nawakchǝ kǝ Yahudawecha kǝmɗiyan naa ɗǝf wanɗǝkaɗata.”

13 Malaman Farta, thla thlǝ ɗǝfchǝ nefa kǝ ɗǝftǝ wanɗǝkaɗata kǝ ɗar ǝna, kǝ ɗǝftǝ wanɗǝkaɗat ˈyowun kǝ chok tǝ mbǝnfata kaˈan. Kǝ fǝrowunchǝ kǝɓikaɗi, thla nech terchan kǝthlǝm kǝt fǝr kitˈyowun. Kǝthlǝm kǝ chekowun tǝ ɗǝf wanɗǝkaɗata kǝmɗiyan, tǝmɗi alkǝtǝ Shemeti Farta.

14 Wanmanchǝna ngǝt tǝ indinchi ngǝmǝnchǝ wunchǝ fa, ndat wa kun tǝ indiyowun ndiiɗ wun kaɗ tǝ chǝt icha ndiˈchan, ndiiɗ wun kaɗ paɗ tǝ sǝnda, chaˈwunsi kǝ chaˈawun raˈan har. 15 Nat tǝ kǝɗu yarowunchǝsi kǝ ɓǝra ǝna fowuna tǝ kapa ɓǝrata, kǝthlǝm kǝ kuɗukowunchi, kǝthlǝm maanɗi fǝritǝ Farta. 16 Ɗǝftǝnenchǝ kǝ choki kǝ thlǝ chǝt teri Kǝristi Yesu, kǝ ɓǝra fee nawakchǝ kǝ Yahudawecha. Chokǝnchi kǝ thlǝ ɓas kwastǝ nɗiktǝɗiya yi Farta, kǝɗ thla thlǝ fǝranchǝ Farta icha, kǝthlǝm fee nawakchǝ kǝ Yahudawecha. Kǝ chokndǝ kǝ kǝnau pafǝn, yi thlǝta kǝmɗi Farta, chǝɗchǝɗ tǝmɗi Shemetǝ Farta. 17 Kǝthlǝm ndaˈan thlǝ mbahǝnchi thlaˈandǝ kǝrsha hur kǝristi Yesu kǝ ɗar tarɗi nati chandǝ Farta. 18 Ənsǝ nati mbuˈtawa, maangga ǝnɗi chit Kǝristi tǝmɗinchi wa. Tǝmɗi ɓat tǝ fee nawakchǝ kǝ Yahudawecha, kǝ maanandǝ Farta, tǝmɗi shenuˈtǝnchi tǝ tarchinchi. 19 Tǝmɗi ichiɗi nech kǝ yi saka inda, tǝ paɗ tǝmɗi alkǝti Shemeti Farta, thlaˈtǝ Urshelima kǝ Ilirikun ɓasinchi kwastǝ nɗikti Kǝristi yi sǝkta thla takawakti ǝnha chika ngguɗyeh. 20 Yahtinchi chǝk kwati kǝ ɓasi kwastǝ nɗiktiɗiya yi Farta, mǝɗi tam waktǝ fee sǝk kusheˈtǝ ndikti Kǝristi. Kǝ tǝni kǝ ɗar tǝrkan tǝnɗi ngga yowun chicha wa. 21 Kǝɗ ǝnɗi natǝn kǝ yaraɗan hur ndikti Farta, “Fee tamwaktǝ fee ɓaˈanda kusheˈtǝyan, kǝ sǝndǝ anchi. Fee tamwakchi sǝk kusheˈtǝ ndiktiyan, kǝ sǝnnda.”

22 Ndaˈan chicha fartǝ terchan mbahǝn waktǝ ɓat kǝmɗiyowun.

23 Nakanya pǝˈwu mǝtsi ǝ thle wan mǝrǝɓ ɗiya natǝ chit tera wa. Paɗ nakan hurechǝ terchan yahinchǝs kǝ ɓi nawunchi. 24 Tachsinchǝf nakanya ma ngǝt ɗǝt kǝ hahi Asbaniya, ni parat tǝmɗiyowun. Kǝ mbǝnmǝn fat tǝ raˈan yi wan mǝnchi ngguɗyeh. Kǝrsǝ ndaˈan, kǝ fǝrichiwun ǝnɗi yahti, maa nggǝt pǝɗata. 25 Nakanya tǝni kǝ Urshelima kǝ ɗani fee thlǝ fǝrchǝ kit kǝ Farta, ǝna kǝsandatsi. 26 Wanmanchina hur Kǝristi, fee nǝch ǝ hahichi Makidoniya tǝ Akaya, sǝkndǝ mbǝn ndǝfa kǝ nggomandǝ icha kǝthlǝm fǝ ɓahcha hur fǝ fǝr kit kǝ Farta, fee nech Urshelima. 27 Sǝkndǝ mbǝndǝf kǝɗu, chika nakan chok kǝ heˈtǝ indanda. Kǝthlǝm maa fen tǝɗi nawakchǝ kǝ Yahudawecha, mbǝs ndǝ mbǝs ǝn har yi Shemeta thlaˈtǝ Yahudawa, chanchi tandǝf nwaat kǝ kǝsandǝ Yahudawechisi tǝ kǝnau pafǝn yi ichiɗi nessanda. 28 Ma tǝɓani tarɗa, fǝrandechi kǝsanan tandǝs kǝ har thla fǝrtǝfe kǝthlǝm tanda, ni wiˈyowun ndǝfa maa nggǝt kǝ Asbaniya. 29 Sǝninchǝs ma ɓinchǝ kǝmɗiyowun, ni ɓowun ndiiɗ mbǝs ǝnhar yi Kǝristi.

30 Wanmanchǝna, nggǝt shiyowunda hur thlǝm Chinmǝn, Yesu Kǝristi, tǝ paɗ yahtǝɗi thlǝ fǝr tǝ Shemeta, nggǝt shiyowun nda ndat wa. Kǝsamitǝnsi tǝ shiita tǝ kweˈtǝ ha kǝmɗi Farta, kǝthlǝm ngǝta. 31 Shiyama kǝthlǝm kǝ hǝraˈi heri fǝ kumi fǝr kit ǝ Yahudiya, paɗ kǝnau pafǝn tǝɗi nati fǝrta hahi Urshelima, kǝ chok kǝ ǝna thlǝta kǝmɗi fǝ fǝr kitcha ǝ hahiˈyan. 32 Kǝthlǝm kǝɓi kǝmɗiyowun tǝ mbǝnfata, maa nggǝman Farta, kǝ yipi ǝ mǝɗˈyowun. 33 Malan Farta thla thlǝ fǝrchǝ kǝɓikaɗi, kǝ chok tǝ wunchǝ nat. Kǝ chok kǝɗu.