Makitu kɨ dɔkete kɨ Pol ndangɨ adɨ
Tesalonikɨ’gɨ
Ta kɨ dɔ makitu’tɨ kɨ dɔkete kɨ Pol ndangɨ adɨ Tesalonikɨ’gɨ
Pol ndangɨ makitu kin adɨ Njekawnan’gɨ kɨ ində ginn’de kagilo ngayn el ɓay me ɓebo’tɨ kɨ Tesalonikɨ. Tesalonikɨ in burədɔ ɓe’gɨ kɨ dɔnangɨ Maseduwann’tɨ kɨ Rɔm onɓe dɔ’de. Go k’ɔr kɨ Timote ɔr poyta kɨ maji kɨ ɔjidɔ njekawnan, Pol ndangɨ makitu kadɨ ra’n oyo Luwə tadɔ kuwətɔgiba lə’de me kunme’tɨ, me ndigɨ’tɨ me kindəmedɔtɨ tɔ. Ta kɨ dɔ təl Jeju Kirisitɨ’tɨ tulə de’gɨ nan’tɨ. Be ə Pol un ta el ɔr’n ginn’ə adɨ ar njay. Njekawnan’gɨ indəi me’de dɔ təl Burəɓe’tɨ nan təl el ɓay ə ra adɨ de’gɨ dəji nan ta kɨ ta’a ta’a eyina: «Ndɔ kɨ ra’tɨ ə Burəɓe a təl re wa? Ri ə a te dɔ njekunme’gɨ’tɨ kɨ oyi kete non re’ə’tɨ wa?» Pol ində hangal Njekawnan’gɨ bo tokɨ Burəɓe a təl re inɓe (4.16), ningə njekunme’gɨ pətɨ a sii kɨ dɔ’de taa nan’tɨ si’ə (5.10). Kagilo kɨ re’n el ɓay, Luwə ndigi kadɨ njekunme’gɨ rai kulə adi’ne kum’de in kete kɨ rɔnel. (5.14,15).
Kon ta’gɨ kɨ me’tɨ: Ra oyo kɨ pitɨ 1-3. Kisikidɔtaa kigo ndigɨ’tɨ lə Luwə 4.1-12. Təl Burəɓe 4.13-5.11. Kulə’gɨ kɨ kadɨ njekunme’gɨ rai 5.12-22. Dɔboy ta 5.23-28.
1
Kuwəji nan
1 M’in Pol, nan’tɨ kɨ Silasɨ ingɨ kɨ Timote*1.1 KNK 15.22, 16.1, ə jɨ ndangɨ makitu kin j’adɨ’se in Njekawnan’gɨ lə Luwə kɨ Baw’je, kɨ indəi rɔ’se nan’tɨ kɨ Burəɓe Jeju Kirisitɨ, kɨ sii Tesalonikɨ’tɨ†1.1 KNK 17.1-9; 1Te 2.1-2. Kadɨ memajɨ kɨ kisimajɨ lə Luwə in nan’tɨ sese.
Pol ra oyo Luwə tadɔ kunme lə Tesalonikɨ’gɨ
2 Jɨ ra oyo Luwə ta ta tadɔ lə’se pətɨ, lokɨ j’isɨ j’elta kɨ Luwə jɨ ɓar tɔ’se. 3 Takum Luwə’tɨ kɨ Baw’je, me’je sii olo dɔ kunme’tɨ lə’se kɨ sii kum ba, kɨ ndiginan lə’se kɨ tingəbil, kɨ kuwətɔgiba me kindəmedɔ Burəɓe’tɨ lə’je Jeju Kirisitɨ‡1.3 1Ko 13.13. 4 Tadɔ jɨ gər kadɨ Luwə mbətɨ’se, in ngannkon’je’gɨ kɨ ndigɨ’se. 5 Tokɨ rɔta’tɨ, Poyta kɨ majɨ kɨ j’iləmbər’ə dann’se’tɨ, in me ta kɨ kel’tɨ par el, nan in kɨ tɔgɨ kɨ Ndil Luwə adɨ’je kɨ me kɨ tinyi katɨ kɨ uwə’je kɨ ta el. Ingɨ in gəri panjiyə’je kɨ jɨ njiyə’n dann’se’tɨ tadɔ majɨ lə’se kin ɓətɨ. 6 Ningə ingɨ, ndaji’je j’in num, Burəɓe num nga, tadɔ taai ta lə Luwə kɨ rɔnel kɨ Ndil’ə adɨ’se, me kon’gɨ’tɨ kɨ ngayn nga§1.6 KNK 17.5-9. 7 Lo kin’tɨ, in təli nyandajɨ tadɔ lə njekunme’gɨ kɨ dɔnangɨ Maseduwann’tɨ*1.7 2Ko 1. 16 kɨ dɔnangɨ Akay’tɨ†1.7 2Ko 1.1. 8 Kah ta lə Burəɓe ɓar in rɔ’se’tɨ, te dɔnangɨ Maseduwann’tɨ kɨ dɔnangɨ Akay’tɨ par el, nan poy kun kɨ uni me’se adi Luwə kin sanan kɨ lo’gɨ pətɨ. Sanan sanan kɨ j’awi kɨ ndoo kadɨ j’elita’a ɓay taa el. 9 De’gɨ kare kare elita kɨ dɔ’tɨ ɔjidɔ kuwə kɨ uwəi’je kɨ rɔ’se’tɨ, kɨ təl kɨ in təli gidɨ’se adi kagɨ yo’gɨ lə’se, ə tur kum’se dɔ Luwə’tɨ kɨ rɔta’tɨ, kɨ nje kisɨ kumngayira ba, kadɨ rai ɓər li’ə kin. 10 Kadɨ rai ɓər li’ə, nginəi ngonn’o kɨ un’ə taa dann njekoy’gɨ’tɨ. Ngonn’o Jeju kɨ nje taa’je ta wongɨ’tɨ kɨ a re.