Makitu kɨ dɔkete kɨ Pol ndangɨ adɨ
Timote
Ta kɨ dɔ makitu’tɨ kɨ dɔkete kɨ Pol ndangɨ adɨ Timote
Makitu’gɨ kɨ joo kɨ Pol ndangɨ adɨ Timote eke nje kɨ kare kɨ adɨ Titɨ in makitu’gɨ kɨ Pol ulə’n sɔw dɔ’de inɓe’gɨ kɨ joo kin um njekawnan’gɨ el. Makitu’gɨ kɨ mutə kin eli ta’gɨ kɨ ɔjidɔ nya’gɨ kɨ majɨ kadɨ njekɔrnon njekawnan’gɨ rai dann njekawnan’gɨ’tɨ. Ginn’ə kin ə ɓari makitu’gɨ kin eyina «makitu’gɨ lə njekul njekawnan’gɨ» adɨ in makitu’gɨ kɨ ndangɨ kadɨ njekul njekawnan’gɨ.
Me makitu’tɨ kin Pol ulə dingəm me Timote’tɨ kadɨ uwə tɔgɨ’ne ba me kunme’tɨ ə oro rɔ’ne nan’tɨ kɨ njendo de’gɨ nya kɨ ngom kɨ isɨ tuləi njekawnan’gɨ nan’tɨ kin el. Majɨ kadɨ oo go rɔ’ne majɨ adɨ de’gɨ kɨ ta goto dɔ’de’tɨ kɨ asi rai kulə ə mbətɨ’de to njekɔrnon’gɨ kɨ nje kogo nyamajɨ’gɨ lə njekawnan’gɨ, ningə kadɨ dene’gɨ kɨ de’gɨ manyinajɨ dɔ’de’tɨ majɨ, rai se’de me kulə’tɨ. Təl ɔjɨ ta Timote kadɨ gərɨ’n tokɨ bann ə a ra’n kulə kɨ ɔjidɔ’a ta k’in ə njekuləɓər lə Kirisitɨ.
Kon ta’gɨ kɨ me’tɨ; Kandɨ me ta’tɨ 1.1-2. Ndəjinan ɔjidɔ njendo de’gɨ nya kɨ ngom 1.3-20. Ta kɨ dɔ kelta’tɨ kɨ Luwə kɨ re non Luwə’tɨ 2. Ta kɨ ɔjidɔ njekɔrnon’gɨ kɨ nje kogo nyamajɨ’gɨ lə njekawnan’gɨ 3. Mbərkində’gɨ kadɨ Timote 4. Ta kɨ ɔjidɔ dene’gɨ kɨ njengawkoy kɨ ngatɔgɨ’gɨ 5. Sangɨ go nyakingə kɨ rɔta’tɨ 6.
1
Kuwə ji nan
1 M’in Pol kɨ njekawkulə lə Jeju Kirisitɨ kigo ndigɨ’tɨ lə Luwə kɨ Njekajɨ’je kigo ndu’tɨ lə Jeju Kirisitɨ kɨ in nya kindəmedɔtɨ lə’je. 2 M’ndangɨ makitu kin m’ulə’n m’ad’i in Timote* 1.2 KNK 16.1 kɨ in ngonn’m kɨ rɔta’tɨ, kɨ gorow kunme kɨ un adɨ Jeju Kirisitɨ. M’uwə ji’i, ningə kadɨ memajɨ kɨ k’oo kumtondoo kɨ kisimajɨ lə Baw’je Luwə ingɨ kɨ Burəɓe lə’je Jeju Kirisitɨ in nan’tɨ sə’i.
Ta dɔ nyando’tɨ kɨ ngom
3 Tokɨ ndɔkɨ m’ilə’n ndu’m m’ad’i, lokɨ m’un tarow kɨ dɔnangɨ Maseduwann’tɨ† 1.3 2Ko 1.16, isɨ ɓebo Epejɨ’tɨ non‡ 1.3 2Ko 1.8. Isɨ’tɨ non kadɨ ndɔr mbi de’gɨ madɨ kɨ njendo de’gɨ nya kɨ ngom, kadɨ inyəi ta’a. 4 Kadɨ ko de’gɨ kakin inyəi taa su’gɨ’tɨ kɨ kudə kɨ kɔr ginn nojɨ§ 1.4 Lotum 4-5; 9-11 kɨ ginn’ə gangɨ el, tadɔ lo tɔlta nya kin pətɨ in gakinan par. A ra se’je majɨ dɔ kulə’tɨ kɨ Luwə ulə ji’je’tɨ ne, kɨ gorow kunme kin el. 5 Ndu kin a re kɨ ndiginan kɨ ngarme’tɨ kɨ ar njay njay, kɨ me kɨ majɨ kɨ uwə de kɨ ta el, kɨ kunme kɨ rɔta’tɨ tɔ. 6 De’gɨ madɨ mbeti gorow ta kɔjɨ kɨ majɨ kin ə təli nanyinan ta ta kɨ manjɨ’tɨ kɨ nda’a goto. 7 Rai rɔ’de njendo de’gɨ ndukun’tɨ lə Luwə, nan tokɨ rɔta’tɨ, inɓe’gɨ kaa gəri me ta kɨ isɨ eli el num, taa gəri ginn nyando kɨ isɨ ndoi kɨ tɔgɨ’de kin el num tɔ.
8 Jɨ gər kadɨ ndukun lə Luwə in ndukun kɨ majɨ lokɨ de gər lo ra’n kulə kɨ gorow’ə’tɨ. 9 Majɨ kadɨ jɨ gəri ta kin majɨ: In de’gɨ kɨ njera nya kɨ dana ə ndukun re’n tadɔ lə’de el, nan re tadɔ lə nje mendul, kɨ nje tanrɔ, kɨ nje mbətɨ Luwə, kɨ njeramajel, kɨ de’gɨ kɨ njera nya kɨ nəl Luwə el, kɨ nje kɨ ɓoli nya’gɨ kɨ ar njay lə Luwə el, kɨ njetɔl baw’de’gɨ kɨ kon’de’gɨ. *Ndukun re tadɔ njetɔl de’gɨ. 10 Nje ra kaya’gɨ, kɨ dingəm’gɨ kɨ nje sanginan, kɨ nje ndogɨ de’gɨ ɓər’tɨ, kɨ nje ngom’gɨ, kɨ de’gɨ kɨ njetətɨ ta’gɨ. Re tadɔ lə de’gɨ pətɨ kɨ njera nya kɨ ɔsɨ ta nyando kɨ rɔta’tɨ lə Luwə. 11 Nyando kin in kigo Poyta’tɨ kɨ majɨ kɨ Luwə ulə ji’m’tɨ. In Poyta kɨ majɨ kɨ tɔjɨ tɔɓar lə Luwə kɨ nje majɨ.
Memajɨ lə Luwə tadɔ lə Pol
12 M’ra oyo Burəɓe Jeju Kirisitɨ kɨ adɨ’m tɔgɨ kadɨ m’ra’n kulə li’ə. M’ra’a oyo tadɔ k’oo kɨ oo adɨ m’in nje ra nya kɨ low’ə’tɨ ə ulə kulə kin ji’m’tɨ. 13 M’in kɨ kete m’in njekelta kɨ mal dɔ tɔ Luwə’tɨ, m’in nje kadɨ kon de’gɨ li’ə, kɨ nje taj’a. Nan Luwə, oo kumtondoo lə’m, tadɔ m’ra nya kin pətɨ kigo gər’ə’tɨ el, me kunme’tɨ el* 1.13 KNK 8.3, 9.4-5. 14 Burəɓe lə’je, kigo memajɨ’tɨ li’ə kɨ to mbar mbar tadɔ lə’m adɨ’m kunme kɨ ndiginan kɨ gorow kində rɔ nan’tɨ kɨ Jeju Kirisitɨ. 15 Ta kin in ta kɨ rɔta’tɨ kɨ majɨ kadɨ de’gɨ pətɨ taai kɨ me kɨ kareba: Jeju Kirisitɨ re dɔnangɨ’tɨ tadɔ kajɨ njeramajel’gɨ. Njeramajel’gɨ kin, m’in majel lə’m utə’de pətɨ. 16 Nan Luwə oo kumtondoo lə’m. Ra be kadɨ Jeju Kirisitɨ tɔjɨ kisidɔtɨ li’ə sə’m, m’in kɨ majel lə’m utə de’gɨ pətɨ. Tadɔ kadɨ in nya ndajɨ lə de’gɨ kɨ a uni me’de adɨ’ə kadɨ ingəi kajɨ kɨ to bitɨ kɨ non’tɨ.
17 Kadɨ tɔjɨ kɨ tɔɓar in
lə Ngar kɨ nje kisɨ kɨ dɔkagilo’gɨ kɨ dɔkagilo’gɨ,
Kɨ njekoy el,
Kɨ dum k’oo kɨ kum,
Kɨ in kar’ne ba in Luwə. Amen.† 1.17 Amen in ta Ebirə kɨ kɔr me’ə nan in rɔta’tɨ, kadɨ in be.
Pol ulə dingəm me Timote’tɨ
18 Ngonn’m Timote, ndu kɨ m’ad’i ə to kin: Kigo ta’gɨ’tɨ kɨ de’gɨ kɨ njekeltakita Luwə’tɨ eli dɔ’i’tɨ kete, m’ndigɨ kadɨ uwə ta’gɨ kin sə’m, rɔ’n rɔ kɨ majɨ. 19 Rɔ rɔ kɨ majɨ, kɨ me kɨ majɨ kɨ uwə de kɨ ta el. De’gɨ madɨ mbeti kadɨ me’de uwə’de kɨ ta, adɨ kunme lə’de tujɨ. 20 Dann de’gɨ’tɨ kin, Imene ingɨ kɨ Alegijandir in’tɨ non. M’ulə Imene‡ 1.20 2Ti 2.17 ingɨ kɨ Alegijandir§ 1.20 2Ti 4.14 ji Satan’tɨ, kadɨ ndoi kelta kɨ mal dɔ Luwə’tɨ gogɨ el nga.