Makitu kɨ nja joo kɨ Pol ndangɨ adɨ
Tesalonikɨ’gɨ
Ta dɔ makitu’tɨ kɨ nja joo kɨ Pol ndangɨ adɨ Tesalonikɨ’gɨ
Pol ndangɨ makitu kin asɨ nanyi’gɨ bann wa ba be go nje kɨ kete’tɨ. Takasinan el kɨ ɔjidɔ təl Burəɓe tulə njekunme’gɨ kɨ Tesalonikɨ nan’tɨ ɓay. Njekunmə’gɨ kin isɨ nginəi təl Burəɓe kagilo kisikidɔtaa lə’de; Kɨ madɨ’gɨ eli eyina Burəɓe re ə binəm nga. Pol tɔjɨ tokɨ kete ta kadɨ Burəɓe a re, «nje mendul» kɨ isɨ tanrɔ Luwə, kɨ el tokɨ n’inɓe ə n’in Luwə, a te bus ə binəm ta. A ra adɨ tanrɔ Luwə rosɨ dɔnangɨ. Be ə maji kadɨ njekunme’gɨ uwəi tɔgɨ’de ba, rai kulə lə’de kum’de in kete um inyəi ta ra majɨ el (3.12-13).
Kon ta’gɨ kɨ me’tɨ: Takigangɨ kɨ dɔboy’tɨ lə njeramajel’gɨ 1. Təl Burəɓe 2. Ɓar nan kɨ lo kelta’tɨ kɨ Luwə kum kɨ kete kɨ kɨ lo kulə’tɨ tɔ 3.1-15. Majikur 3.16-18.
1
Kuwəji nan
1 M’in Pol, nan’tɨ kɨ Silasɨ kɨ Timote, ə jɨ ndangɨ makitu kin j’adɨ’se in *Njekawnan’gɨ lə Luwə kɨ Baw’je, kɨ Burəɓe lə’je Jeju Kirisitɨ, kɨ sii Tesalonikɨ’tɨ*1.1 1Te 1.1. 2 Kadɨ memajɨ kɨ lapiya lə Luwə kɨ Baw’je kɨ Burəɓe lə’je Jeju Kirisitɨ in nan’tɨ sese.
Takigangɨ kɨ a re ndɔ təl Jeju’tɨ
3 Ngannkon’gɨ, majɨ kadɨ jɨ ra oyo Luwə kɨ dɔkagilo’gɨ pətɨ tadɔ lə’se. Ningə in gorow’ə’tɨ kadɨ jɨ ra be tadɔ kunme lə’se aw kete kɨ tɔgɨ’ne ngayn, taa ingɨ pətɨ, ndiginan kɨ dann’se’tɨ kaa in kɨ dɔ mad’a’tɨ dɔ mad’a’tɨ tɔ. 4 Ningə in tadɔ kin ə, j’un’se j’isɨ j’ində’n gu’je kɨ rɔ Njekawnan’gɨ’tɨ lə Luwə, tadɔ kuwətɔgiba kɨ kunme lə’se me kindəkumndoo’tɨ kɨ me kon’tɨ kɨ te dɔ’se’tɨ.
5 Kon’gɨ kin tɔjɨ kadɨ Luwə in njegangɨ ta kɨ dana, ningə a tɔjɨ kadɨ in de’gɨ kɨ asi ta kadɨ oyi Konɓe lə Luwə kɨ isɨ ingəi kon’a kin tɔ. 6 Tokɨ rɔta’tɨ, Luwə in de kɨ dana, adɨ a adɨ kon de’gɨ kɨ nje kadɨ’se kon tɔ, 7 ningə ingɨ kɨ adi’se kon, a ingəi lo kɔrkon se’je, lokɨ Burəɓe Jeju a te dɔran’tɨ bus to re kɨ malayka’gɨ lə’ne kɨ nje tɔgɨ. 8 A re me por’tɨ kɨ on bilim bilim kadɨ adɨ kon de’gɨ kɨ gəri Luwə el, kɨ de’gɨ kɨ nje mbətɨ Poyta kɨ majɨ li’ə, in Burəɓe lə’je Jeju. 9 Kon kɨ a ingə’de, in tujɨ kɨ bitɨ kɨ non’tɨ. A in sanyi ngayn takum Burəɓe’tɨ, kɨ gidɨ tɔgɨ’tɨ li’ə, 10 lokɨ a re ndɔ’a’tɨ kin kadɨ de’gɨ li’ə uləi tɔjɨ dɔ’a’tɨ, kadɨ de’gɨ pətɨ kɨ a uni me’de adi’ə piti’ə. Nga ningə, ingɨ kaa a in dann’de’tɨ non tɔ, tadɔ ingɨ taai mannajɨ kɨ jɨ man dann’se’tɨ.
11 In tadɔ kin ə, jɨ isɨ j’elta kɨ Luwə kɨ ndɔ’gɨ pətɨ tadɔ lə’se, kadɨ Luwə oo’se to de’gɨ kɨ asi ta kulə kɨ ɓar’se tadɔ’a. Kadɨ Luwə ra sese kɨ tɔgɨ’ne kadɨ ndigɨ ra majɨ kɨ to me’se’tɨ kin tɔlta’ne majɨ ə kadɨ kunme lə’se isɨ kumngayira ba tɔ. 12 Lo kin’tɨ, a uləi tɔjɨ dɔ Burəɓe Jeju’tɨ, ningə in a ulə tɔjɨ dɔ’se’tɨ tɔ, kigo memajɨ’tɨ lə Luwə lə’je kɨ, Burəɓe Jeju Kirisitɨ.