Η Καινή Διαθήκη ΠΡΑΞΕΙΣ 21

1 Ὡς δὲ ἐγένετο ἀναχθῆναι ἡμᾶς ἀποσπασθέντας ἀπ᾽ αὐτῶν, εὐθυδρομήσαντες ἤλθομεν εἰς τὴν Κῶν, τῇ δὲ ἑξῆς εἰς τὴν Ῥόδον, κἀκεῖθεν εἰς Πάταρα· 2 καὶ εὑρόντες πλοῖον διαπερῶν εἰς Φοινίκην, ἐπιβάντες ἀνήχθημεν. 3 Ἀναφανέντες δὲ τὴν Κύπρον, καὶ καταλιπόντες αὐτὴν εὐώνυμον, ἐπλέομεν εἰς Συρίαν, καὶ *⸂κατήχθημεν⸃ εἰς Τύρον· ἐκεῖσε γὰρ *⸉ἦν τὸ πλοῖον⸊ ἀποφορτιζόμενον τὸν γόμον. 4 *⸂Καὶ ἀνευρόντες⸃ *⸆ μαθητάς, ἐπεμείναμεν αὐτοῦ ἡμέρας ἑπτά· οἵτινες τῷ Παύλῳ ἔλεγον διὰ τοῦ πνεύματος, μὴ *⸂2ἀναβαίνειν⸃ εἰς Ἱερουσαλήμ. 5 Ὅτε δὲ ἐγένετο *⸉ἡμᾶς ἐξαρτίσαι⸊ τὰς ἡμέρας, ἐξελθόντες ἐπορευόμεθα, προπεμπόντων ἡμᾶς πάντων σὺν γυναιξὶν καὶ τέκνοις ἕως ἔξω τῆς πόλεως· καὶ θέντες τὰ γόνατα ἐπὶ τὸν αἰγιαλὸν *⸂προσηυξάμεθα. 6 Καὶ ἀσπασάμενοι ἀλλήλους,⸃ *⸂ἐπέβημεν⸃ εἰς τὸ πλοῖον, ἐκεῖνοι δὲ ὑπέστρεψαν εἰς τὰ ἴδια.

7 Ἡμεῖς δέ, τὸν πλοῦν διανύσαντες ἀπὸ Τύρου, κατηντήσαμεν εἰς Πτολεμαΐδα, καὶ ἀσπασάμενοι τοὺς ἀδελφοὺς ἐμείναμεν ἡμέραν μίαν παρ᾽ αὐτοῖς. 8 Τῇ δὲ ἐπαύριον ἐξελθόντες *⸂οἱ περὶ τὸν Παῦλον ἦλθον⸃ εἰς Καισάρειαν· καὶ εἰσελθόντες εἰς τὸν οἶκον Φιλίππου τοῦ εὐαγγελιστοῦ, *⸆ ὄντος ἐκ τῶν ἑπτά, ἐμείναμεν παρ᾽ αὐτῷ. 9 Τούτῳ δὲ ἦσαν θυγατέρες *⸉παρθένοι τέσσαρες⸊ προφητεύουσαι. 10 Ἐπιμενόντων δὲ *⸋ἡμῶν⸌ ἡμέρας πλείους, κατῆλθέν τις ἀπὸ τῆς Ἰουδαίας προφήτης ὀνόματι Ἄγαβος. 11 Καὶ ἐλθὼν πρὸς ἡμᾶς, καὶ ἄρας τὴν ζώνην τοῦ Παύλου, δήσας *⸂τε αὐτοῦ⸃ *⸉τοὺς πόδας καὶ τὰς χεῖρας⸊ εἶπεν, Τάδε λέγει τὸ πνεῦμα τὸ ἅγιον, Τὸν ἄνδρα οὗ ἐστιν ἡ ζώνη αὕτη, οὕτως δήσουσιν ἐν Ἱερουσαλὴμ οἱ Ἰουδαῖοι, καὶ παραδώσουσιν εἰς χεῖρας ἐθνῶν. 12 Ὡς δὲ ἠκούσαμεν ταῦτα, παρεκαλοῦμεν ἡμεῖς τε καὶ οἱ ἐντόπιοι, τοῦ μὴ ἀναβαίνειν αὐτὸν εἰς Ἱερουσαλήμ. 13 *⸂Ἀπεκρίθη τε⸃ ὁ Παῦλος, Τί ποιεῖτε κλαίοντες καὶ συνθρύπτοντές μου τὴν καρδίαν; Ἐγὼ γὰρ οὐ μόνον δεθῆναι, ἀλλὰ καὶ ἀποθανεῖν εἰς Ἱερουσαλὴμ ἑτοίμως ἔχω ὑπὲρ τοῦ ὀνόματος τοῦ κυρίου Ἰησοῦ. 14 Μὴ πειθομένου δὲ αὐτοῦ, ἡσυχάσαμεν εἰπόντες, *⸉Τὸ θέλημα τοῦ κυρίου⸊ *⸂γενέσθω.⸃

15 Μετὰ δὲ τὰς ἡμέρας ταύτας *⸂ἐπισκευασάμενοι⸃ ἀνεβαίνομεν εἰς Ἱερουσαλήμ. 16 Συνῆλθον δὲ καὶ τῶν μαθητῶν ἀπὸ Καισαρείας σὺν ἡμῖν, ἄγοντες παρ᾽ ᾧ ξενισθῶμεν, Μνάσωνί τινι Κυπρίῳ, ἀρχαίῳ μαθητῇ.

17 Γενομένων δὲ ἡμῶν εἰς Ἱεροσόλυμα, ἀσμένως *⸂ἐδέξαντο⸃ ἡμᾶς οἱ ἀδελφοί. 18 Τῇ δὲ ἐπιούσῃ εἰσῄει ὁ Παῦλος σὺν ἡμῖν πρὸς Ἰάκωβον, πάντες τε παρεγένοντο οἱ πρεσβύτεροι. 19 Καὶ ἀσπασάμενος αὐτούς, ἐξηγεῖτο καθ᾽ ἓν ἕκαστον ὧν ἐποίησεν ὁ θεὸς ἐν τοῖς ἔθνεσιν διὰ τῆς διακονίας αὐτοῦ. 20 Οἱ δὲ ἀκούσαντες ἐδόξαζον *⸂τὸν κύριον,⸃ *⸂2εἰπόντες⸃ αὐτῷ, Θεωρεῖς, ἀδελφέ, πόσαι μυριάδες εἰσὶν *⸂3Ἰουδαίων⸃ τῶν πεπιστευκότων· καὶ πάντες ζηλωταὶ τοῦ νόμου ὑπάρχουσιν· 21 κατηχήθησαν δὲ περὶ σοῦ, ὅτι ἀποστασίαν διδάσκεις ἀπὸ Μωϋσέως τοὺς κατὰ τὰ ἔθνη πάντας Ἰουδαίους, λέγων μὴ περιτέμνειν αὐτοὺς τὰ τέκνα, μηδὲ τοῖς ἔθεσιν περιπατεῖν. 22 Τί οὖν ἐστιν; Πάντως *⸂δεῖ πλῆθος συνελθεῖν·⸃ ἀκούσονται *⸋γὰρ⸌ ὅτι ἐλήλυθας. 23 Τοῦτο οὖν ποίησον ὅ σοι λέγομεν· εἰσὶν ἡμῖν ἄνδρες τέσσαρες εὐχὴν ἔχοντες *⸂ἐφ᾽⸃ ἑαυτῶν· 24 τούτους παραλαβὼν ἁγνίσθητι σὺν αὐτοῖς, καὶ δαπάνησον ἐπ᾽ αὐτοῖς, ἵνα *⸂ξυρήσωνται⸃ τὴν κεφαλήν, καὶ *⸂2γνῶσιν⸃ πάντες ὅτι ὧν κατήχηνται περὶ σοῦ οὐδέν ἐστιν, ἀλλὰ στοιχεῖς καὶ αὐτὸς *⸉τὸν νόμον φυλάσσων.⸊ 25 Περὶ δὲ τῶν πεπιστευκότων ἐθνῶν ἡμεῖς *⸂ἐπεστείλαμεν,⸃ κρίναντες *⸋μηδὲν τοιοῦτον τηρεῖν αὐτούς, εἰ μὴ⸌ φυλάσσεσθαι αὐτοὺς *⸂2τό τε εἰδωλόθυτον καὶ τὸ αἷμα καὶ πνικτὸν καὶ πορνείαν.⸃ 26 Τότε ὁ Παῦλος παραλαβὼν τοὺς ἄνδρας, τῇ ἐχομένῃ ἡμέρᾳ σὺν αὐτοῖς ἁγνισθεὶς εἰσῄει εἰς τὸ ἱερόν, διαγγέλλων τὴν ἐκπλήρωσιν τῶν ἡμερῶν τοῦ ἁγνισμοῦ, ἕως οὗ προσηνέχθη ὑπὲρ ἑνὸς ἑκάστου αὐτῶν ἡ προσφορά.

27 Ὡς δὲ ἔμελλον αἱ ἑπτὰ ἡμέραι συντελεῖσθαι, οἱ ἀπὸ τῆς Ἀσίας Ἰουδαῖοι, θεασάμενοι αὐτὸν ἐν τῷ ἱερῷ, συνέχεον πάντα τὸν ὄχλον, καὶ ἐπέβαλον *⸉τὰς χεῖρας ἐπ᾽ αὐτόν,⸊ 28 κράζοντες, Ἄνδρες Ἰσραηλῖται, βοηθεῖτε. Οὗτός ἐστιν ὁ ἄνθρωπος ὁ κατὰ τοῦ λαοῦ καὶ τοῦ νόμου καὶ τοῦ τόπου τούτου πάντας πανταχοῦ διδάσκων· ἔτι τε καὶ Ἕλληνας εἰσήγαγεν εἰς τὸ ἱερόν, καὶ κεκοίνωκεν τὸν ἅγιον τόπον τοῦτον. 29 Ἦσαν γὰρ *⸂ἑωρακότες⸃ Τρόφιμον τὸν Ἐφέσιον ἐν τῇ πόλει σὺν αὐτῷ, ὃν ἐνόμιζον ὅτι εἰς τὸ ἱερὸν εἰσήγαγεν ὁ Παῦλος. 30 Ἐκινήθη τε ἡ πόλις ὅλη, καὶ ἐγένετο συνδρομὴ τοῦ λαοῦ· καὶ ἐπιλαβόμενοι τοῦ Παύλου εἷλκον αὐτὸν ἔξω τοῦ ἱεροῦ· καὶ εὐθέως ἐκλείσθησαν αἱ θύραι. 31 Ζητούντων *⸂δὲ⸃ αὐτὸν ἀποκτεῖναι, ἀνέβη φάσις τῷ χιλιάρχῳ τῆς σπείρης, ὅτι ὅλη *⸂2συγκέχυται⸃ Ἱερουσαλήμ· 32 ὃς ἐξαυτῆς παραλαβὼν στρατιώτας καὶ ἑκατοντάρχους, κατέδραμεν ἐπ᾽ αὐτούς· οἱ δέ, ἰδόντες τὸν χιλίαρχον καὶ τοὺς στρατιώτας, ἐπαύσαντο τύπτοντες τὸν Παῦλον. 33 *⸂Ἐγγίσας δὲ⸃ ὁ χιλίαρχος ἐπελάβετο αὐτοῦ, καὶ ἐκέλευσεν δεθῆναι ἁλύσεσιν δυσίν· καὶ ἐπυνθάνετο τίς *⸋ἂν⸌ εἴη, καὶ τί ἐστιν πεποιηκώς. 34 Ἄλλοι δὲ ἄλλο τι *⸂ἐβόων⸃ ἐν τῷ ὄχλῳ· μὴ *⸂2δυνάμενος δὲ⸃ γνῶναι τὸ ἀσφαλὲς διὰ τὸν θόρυβον, ἐκέλευσεν ἄγεσθαι αὐτὸν εἰς τὴν παρεμβολήν. 35 Ὅτε δὲ ἐγένετο ἐπὶ τοὺς ἀναβαθμούς, συνέβη βαστάζεσθαι αὐτὸν ὑπὸ τῶν στρατιωτῶν διὰ τὴν βίαν τοῦ ὄχλου. 36 Ἠκολούθει γὰρ τὸ πλῆθος τοῦ λαοῦ *⸂κρᾶζον,⸃ Αἶρε αὐτόν.

37 Μέλλων *⸂τε⸃ *⸉εἰσάγεσθαι εἰς τὴν παρεμβολὴν⸊ ὁ Παῦλος λέγει τῷ χιλιάρχῳ, Εἰ ἔξεστίν μοι εἰπεῖν *⸆ πρός σε; Ὁ δὲ ἔφη, Ἑλληνιστὶ γινώσκεις; 38 Οὐκ ἄρα σὺ εἶ ὁ Αἰγύπτιος ὁ πρὸ τούτων τῶν ἡμερῶν ἀναστατώσας καὶ ἐξαγαγὼν εἰς τὴν ἔρημον τοὺς τετρακισχιλίους ἄνδρας τῶν σικαρίων; 39 Εἶπεν δὲ ὁ Παῦλος, Ἐγὼ ἄνθρωπος μέν εἰμι Ἰουδαῖος, Ταρσεὺς τῆς Κιλικίας, οὐκ ἀσήμου πόλεως πολίτης· δέομαι δέ σου, ἐπίτρεψόν μοι λαλῆσαι πρὸς τὸν λαόν. 40 Ἐπιτρέψαντος δὲ αὐτοῦ, ὁ Παῦλος ἑστὼς ἐπὶ τῶν ἀναβαθμῶν κατέσεισεν τῇ χειρὶ τῷ λαῷ· πολλῆς δὲ σιγῆς γενομένης, *⸂προσεφώνει⸃ τῇ Ἑβραΐδι διαλέκτῳ λέγων,

*21:3 ⸂ κατήχθημεν RP f 35 TR ¦ κατήλθομεν TNT2 WH NA NIV SBL

*21:3 ⸉ ἦν τὸ πλοῖον RP f 35 TR ¦ τὸ πλοῖον ἦν TNT2 WH NA NIV SBL

*21:4 ⸂ Καὶ ἀνευρόντες RP f 35 TR ¦ Ἀνευρόντες δὲ TNT2 WH NA NIV SBL

*21:4 ⸆ – RP f 35 ¦ τοὺς TR TNT2 WH NA NIV SBL

*21:4 ⸂2 ἀναβαίνειν RP f 35 TR ¦ ἐπιβαίνειν TNT2 WH NA NIV SBL

*21:5 ⸉ ἡμᾶς ἐξαρτίσαι RP f 35 TR NA27+28 NIV ¦ ἐξαρτίσαι ἡμᾶς TNT2 WH NA25 SBL

*21:5 ⸂ προσηυξάμεθα. Καὶ ἀσπασάμενοι ἀλλήλους RP f 35 TR ¦ προσευξάμενοι, ἀπησπασάμεθα ἀλλήλους, καὶ TNT2 WH NA NIV SBL

*21:6 ⸂ ἐπέβημεν RP f 35 TR ¦ ἐνέβημεν TNT2 WH NA25 SBL ¦ ἀνέβημεν NA27+28 NIV

*21:8 ⸂ οἱ περὶ τὸν Παῦλον ἦλθον RP TR ¦ ἤλθομεν f 35 NA NIV SBL ¦ ἤλθαμεν TNT2 WH

*21:8 ⸆ – RP f 35 TNT2 WH NA NIV SBL ¦ τοῦ TR

*21:9 ⸉ παρθένοι τέσσαρες RP f 35 TR ¦ τέσσαρες παρθένοι TNT2 WH NA NIV SBL

*21:10 ⸋ ἡμῶν RP f 35 TR ¦ – TNT2 WH NA NIV SBL

*21:11 ⸂ τε αὐτοῦ RP f 35 TR ¦ ἑαυτοῦ TNT2 WH NA NIV SBL

*21:11 ⸉ τοὺς πόδας καὶ τὰς χεῖρας RP f 35 TNT2 WH NA NIV SBL ¦ τὰς χεῖρας καὶ τοὺς πόδας TR

*21:13 ⸂ Ἀπεκρίθη τε RP f 35 ¦ Ἀπεκρίθη δὲ TR ¦ Τότε ἀπεκρίθη TNT2 WH NA NIV SBL

*21:14 ⸉ Τὸ θέλημα τοῦ κυρίου RP f 35 TR ¦ Τοῦ κυρίου τὸ θέλημα TNT2 WH NA NIV SBL

*21:14 ⸂ γενέσθω RP f 35 TR ¦ γινέσθω TNT2 WH NA NIV SBL

*21:15 ⸂ ἐπισκευασάμενοι RP f 35 TNT2 WH NA NIV SBL ¦ ἀποσκευασάμενοι TR

*21:17 ⸂ ἐδέξαντο RP f 35 TR ¦ ἀπεδέξαντο TNT2 WH NA NIV SBL

*21:20 ⸂ τὸν κύριον RP f 35 TR ¦ τὸν θεὸν TNT2 WH NA NIV SBL

*21:20 ⸂2 εἰπόντες RP f 35 ¦ εἶπόν τε TR NA27+28 NIV SBL ¦ εἶπάν τε TNT2 WH NA25

*21:20 ⸂3 Ἰουδαίων RP f 35 TR ¦ ἐν τοῖς Ἰουδαίοις TNT2 WH NA NIV SBL

*21:22 ⸂ δεῖ πλῆθος συνελθεῖν RP f 35 TR ¦ ἀκούσονται TNT2 WH NA NIV SBL

*21:22 ⸋ γὰρ RP f 35 TR ¦ – TNT2 WH NA NIV SBL

*21:23 ⸂ ἐφ᾽ RP f 35 TR TNT2 NA NIV ¦ ἀφ᾽ WH SBL

*21:24 ⸂ ξυρήσωνται RP f 35 TR ¦ ξυρήσονται TNT2 WH NA NIV SBL

*21:24 ⸂2 γνῶσιν RP f 35 ¦ γνῶσι TR ¦ γνώσονται TNT2 WH NA NIV SBL

*21:24 ⸉ τὸν νόμον φυλάσσων RP f 35 TR ¦ φυλάσσων τὸν νόμον TNT2 WH NA NIV SBL

*21:25 ⸂ ἐπεστείλαμεν RP f 35 TR NA NIV ¦ ἀπεστείλαμεν TNT2 WH SBL

*21:25 ⸋ μηδὲν τοιοῦτον τηρεῖν αὐτούς, εἰ μὴ RP f 35 TR ¦ – TNT2 WH NA NIV SBL

*21:25 ⸂2 τό τε εἰδωλόθυτον καὶ τὸ αἷμα καὶ πνικτὸν καὶ πορνείαν RP f 35 TR ¦ τό τε εἰδωλόθυτον καὶ αἷμα καὶ πνικτὸν καὶ πορνείαν TNT2 WH NA NIV SBL

*21:27 ⸉ τὰς χεῖρας ἐπ᾽ αὐτόν RP TR ¦ ἐπ᾽ αὐτόν τὰς χεῖρας f 35 TNT2 WH NA NIV SBL

*21:29 ⸂ ἑωρακότες RP f 35 ¦ προεωρακότες TR TNT2 WH NA NIV SBL

*21:31 ⸂ δὲ RP f 35 TR ¦ τε TNT2 WH NA NIV SBL

*21:31 ⸂2 συγκέχυται RP f 35 TR ¦ συγχύννεται TNT2 NA NIV SBL ¦ συνχύννεται WH

*21:33 ⸂ Ἐγγίσας δὲ RP f 35 ¦ Τότε ἐγγίσας TR TNT2 WH NA NIV SBL

*21:33 ⸋ ἂν RP f 35 TR ¦ – TNT2 WH NA NIV SBL

*21:34 ⸂ ἐβόων RP f 35 TR ¦ ἐπεφώνουν TNT2 WH NA NIV SBL

*21:34 ⸂2 δυνάμενος δὲ RP f 35 TR ¦ δυναμένου δὲ αὐτοῦ TNT2 WH NA NIV SBL

*21:36 ⸂ κρᾶζον RP f 35 TR ¦ κράζοντες TNT2 WH NA NIV SBL

*21:37 ⸂ τε RP TR TNT2 WH NA NIV SBL ¦ δὲ f 35

*21:37 ⸉ εἰσάγεσθαι εἰς τὴν παρεμβολὴν RP TR TNT2 WH NA NIV SBL ¦ εἰς τὴν παρεμβολὴν εἰσάγεσθαι f 35

*21:37 ⸆ – RP f 35 ¦ τι TR TNT2 WH NA NIV SBL

*21:40 ⸂ προσεφώνει RP f 35 ¦ προσεφώνησε TR ¦ προσεφώνησεν TNT2 WH NA NIV SBL

Public Domain