NINA LETA A PAULO VANIGIRA NA TINONI TUTUNI NI
KOLOSE
Na Vuresi Makaliana na Omea Ara Marea Tana Papi Iani
I Kolose na soana kesa na vera i laona na Asia, e tau ao sagata tania i Epesus tana e totu a Paulo kalina e marea na leta iani. Ma Paulo aia e tau sanga na vaturiana na lotu i Kolose. Me boeginigira sosongo nomoa, matena e rongomia laka ara totu visana na tarai peropero i laoqira na tinoni tutuni ni tana. Migira ara turuginigira sosongo na tinoni, mara tsaria vanigira laka ti kesa e kilia ke donaginia manana God me ke tamanina na mauri saliu i baragata, ma nina aqo na tinoni vaga ia ke samasama vanigira “na angelo migira na tidao levolevo sui kolu susuligaqira”. (Reia tana 1.16) Mara tsarigotoa laka nina aqo goto na tinoni vaga ia ke muridougira pipi sui na aqona niqira lotu na Tsiu, vaga na paripapadana, na vali e kalea tana ganiana na mutsa me visana na omea tavosi goto.
Aia nogoria tana rongona vaga ia, te e gini tuu a Paulo me marea kesa na leta vanigira na tinoni tutuni i Kolose, rongona ti ke tukapusiginigira na sasani vaga girani, me ke tu segeni nina sasani manana a Iesu Kristo. Na pukuna na omea e gini mareleta a Paulo, aia nogo laka a Iesu Kristo segenina moa tangomana ke tusua na mauri saliu manana. Migira sui na sasani tavosi kolua niqira aqoaqo, ara sautuligigira moa na tinoni tania nina sasani a Iesu Kristo. Tana mauripata koluana moa a Iesu Kristo i tana segeni moa na tinoni sui kara dona na tsauliginiana na mauri saliu.
A Tikikus e adi baa nina leta a Paulo vanigira na Kolose. Ma Onesimus e dulikolua, aia nogo na tseka a Paulo e gini mamare matena vania a Pilemon.
Na Omea Ara Totu Tana Papi Iani
Nina goko idaida a Paulo 1:1-2
A Paulo e soadoua God mateqira na Kolose 1:3-14
A Iesu Kristo ma nina aqo 1:15–2:19
Na mauri vaolu i laona na Kristo 2:20–4:6
Na susuina nina leta 4:7-18
1
1-2 I kagami inau a Paulo ma Timoti na tasida, ami ka mamare baa vanigamu igamu nina tinoni God, ma ka tasimami tana nida mauripata koluana a Iesu Kristo, igamu amu totu i Kolose. Minau aia God nogo e viliau kau lia kesa nina apostolo a Iesu Kristo.
Kagami ami ka nongia God na Tamada ke vangalaka vanigamu, me ke tusua vanigamu nina rago.
A Paulo e Soadoua God Mateqira na Tinoni ni Kolose
Eo, kagami a Timoti minau, ami ka soadou sailaginia God na Tamana a Iesu Kristo nida Taovia, kalina ami ka nonginongi vanigamu. Rongona ami ka rongominogoa laka igamu amu tutunina manana a Iesu Kristo, mamu galuvegira sui nina tinoni God, mamu vataragini kakaia nimui amesi tana omea God e mololakaa vanigamu nogo i baragata. Igamu amu rongomia na omea iani kalina e laba vaolu i konimui na manana na gokona na Turupatu Dou tana rongona a Iesu Kristo. Ma na Turupatu Dou iani vaga igamu amu vasini rongomia, aia e tavosa me rarasa bamai nogo polia na barangengo popono. Me gini oli niqira mauri na tinoni pipi tana nauna, vaga nogo e nauvanigamu igamu, me gini oli na maurimui tuu tana kesanina dani kalina amu vasini rongomia, mamu gini donaginia na manana nina galuve God vanigamu. A Epapras, aia ka gamami aqokolu galugaluve kagami, ma nina maneaqo madodo sosongo a Iesu Kristo, aia nogo e adibaa vanigamu i votangana na gokona na Turupatu Dou tugumami kagami. Maia goto nogoria e turupatuna mai vanikagami laka na Tarunga Tabu e sangagamu, mamu gini dona na vaigaluvegi manana.
Me tuu kalina ami ka rongomia na turupatu vaga ia i konina a Epapras, mami ka tau kuti na nonginongi sailagi na matemui igamu. Ami ka nongia God ke tusuvanigamu nina Tarunga Tabu, me ke dangaliginigamu nina sasaga loki ti kamu donadouginia na omea aia e kilia kamu naua. 10 Mi tana ti igamu kamu gini tangomana na mauri vaga na Taovia e ngaoa, ma kamu nausailaginia na omea e dou i matana. Ma kamu gini madodo pipi sui tana vatana na aqo na galuve vanigira na tinoni, ma kamu dato babaa tana donadouginiana God. 11 Mami ka nongigotoa God laka aia ke kakaisiginigamu na susuligana segeni nogo ia, ti kamu gini susuliga na tukakai ma na berengiti pipi tana rota sui ara laba vanigamu. 12 Kamu soadoua na Tamada tana magemage, rongona aia e naua me gini tugugamu na tamaniginiana gamui tuva tana omea God e mololakaa vanigira nina tinoni tana vera na marara. 13 Aia nogo e maurisigita tania na susuligana na rodo e tangoli kaputigita i sau, me adigita baa tana verana na Dalena galugaluve, 14 aia nogo e suivisugita, mara gini tanusi nida sasi.
A Iesu Kristo Aia e Loki Liusigira Pipi na Omea Sui
15 A Iesu Kristo aia nogo na nununa God e totu ida nogo, migita a tau dona na reiginiana na matada. Maia nogo na Dalena botsa ida, me loki liusigira baa pipi na omea sui God e volagira. 16 Rongona i konina nogo a Iesu Kristo ti God e vusagira na omea sui i gotu mi lao: igira na omea sui igita a reigira, migira goto na omea sui igita a tau reigira, migira goto na angelo ma na tidao levolevo sui kolu susuligaqira. God e vusagira na omea sui lakalaka kolunogoa a Iesu Kristo, migira sui ara nina tamani nogo aia. 17 A Iesu Kristo, aia e totu idavigira nogo na omea sui, mi tana susuligana segeni moa ia e tangoliginigira pipi sui na omea. 18 Aia e vaga nogo na lovana, migira na saikolu na tinoni tutuni ara vaga na konina aia. Maia nogoria na pukuna na maurina na konina popono. Aia nogo na Dalena God botsa ida, maia goto nogo na kesanina e maurivisutugua tania na mate, rongona ke gini labamaka laka aia segenina moa e ida vanigira na omea sui. 19 God segenina nogo e pedea laka na Dalena ke puku atsa kolunogoa aia. 20 Mi konina nogo na Dalena, ti aia God e pedea laka ke adivisugira i konina na omea sui lakalaka. Eo, tana mateana nogo na Dalena tana gai ulutaligu ti aia God e mologotosiginigira i konina segeni nogo ia igira na omea sui i gotu mi lao. 21 Mi sau igamu amu totu ao tania God, mamu lia gana gala rongona na omea seko amu pada mamu naua. 22 Mi kalina eni, God e mologotosigamu nogo i konina rongona na mateana a Iesu Kristo, maia e valakasigamu kamu gini male ma kamu masidi i matana. 23 Nimui aqo nomoa, kamu tukakai babaa tana nimui tutuni, ma kamu laka na tamivaniaqira kara luvusilea nimui amesi amu tamanina nogo kalina igamu amu rongomi vaolua na gokona na Turupatu Dou, vaga ara gini turupatuna nogo vanigira na tinoni sui tana barangengo popono. Maia nogoria niqu aqo goto inau a Paulo, kau turupatuna bamai na Turupatu dou iani.
A Paulo Nina Maneaqo God I Laoqira na Tinoni Tutuni
24 Mi kalina eni, au gini mage tana rongona niqu rota au vatsangia tana rongomui igamu. Rongona tana rota ara gadovia na koniqu inau, au gini sanga na tovusiana nina rota a Iesu Kristo matena na konina aia, aia nogo na saikolu na tinoni tutuni. 25 God nogo e viliau kau lia nina maneaqo i laona na saikolu na tinoni tutuni. Maia goto nogo e molovaniau na aqo na tsarivulagiana popono vanigamu nina goko. 26 Ma nina goko God e kalea na omea aia e poia tuu i sau nogo vanigira na mamatana na tinoni sui. Mi tana tagu eni moa ti aia e sauvulagia vanigira igira ara galuvea. 27 Miani nogo e vaga nina papada God: laka ke sauvulagi talua vanigira nina tinoni na omea loki tsapakae saviliu iani, aia e vangarau manogatia vanigira na tinoni sui lakalaka. Ma na omea loki tsapakae iani, aia nogoria laka a Iesu Kristo e mauri i laomui, maia nogo na papadana laka sauba igamu goto kamu patakolua tana mararana God. 28 Aia nogoria na rongona ti igami ami gini madodo na turupatuna tana rongona a Iesu Kristo vanigira na tinoni sui. Mami parovatavigira sui, mami sasanigira sui, mami nusirongona dou a Iesu Kristo vanigira, rongona ti igira sui kara gini lia na tinoni ganoga i matana God tana sasagana nogo a Iesu Kristo. 29 Tana rongoqira nogo na omea girani ti inau au gini rota na aqo kakai, mau ngongoragi kolua na susuligana loki a Iesu Kristo aia e aqo i koniqu.