9
God Sauba Ke Molokaea Kesa Na Taovia Tsapakae Doulaka
1 I sau na Taovia e paluvangamaqira igira na puku ka koniqira a Sebulun ma Naptali, mi tana tagu ke mai sauba aia ke vaturikaegira tugua na vera sui ara totu tana votavotana na kao e tû tana Tasi Mediteranean me longa tsau tabana bâ na Kô Jordan, me ba tsau saviliu goto tana Galilii, i tana ara totu igira na tinoni tau Tsiu.
2 Igira na tinoni ara liu moa tana rodo
ara reivulagia kesa na marara loki.
I sau igira ara totu moa tana rodo pulipuli,
mi kalina eni na mararana God e mamarasigira.
3 Taovia igoe nogo o naua migira nimu tinoni ara gini lia tugua na puku loki;
mo nauvanigira mara gini magemage.
Ara gini magemage i matamu,
vaga moa kalina ara angunimai i vera na lakana loki
ara tsurivia tana niqira uta,
me vaga goto kalina igira na mane vaumate ara gini mage loki
na tuvarivotaana na omea ara laua tana vailabu.
4 Rongona igoe nogo Taovia o adiligia na kalagai mamava e ngoligira,
mo kutsia na gai ara ramitsiginia na kokoveqira.
Igoe nogo o tuliusigira na tinoni
ara bingi sekoligira mara tsogori tsunaligira nimu tinoni,
vaga nogo kalina o tuliusigira na alaala na mane vaumate ni Midian i sau.
5 Gaqira porotua igira na gala
ma na poloqira sui ara liasigabu
sauba kara viri iru sui tana lake.
6 !Rongona e kesa na baka e botsamai vanigita!
!E kesa na baka mane God e tusua vanigita!
Aia nogo sauba ke lia nida taovia, me ke tagaovi kaputigita.
Me sauba kara soaginia “Aia e Naua na Totosasaga Laka,”
“God Susuliga,” “Tamana Saliu,”
“Na Taovia na Rago.”
7 Ma gana susuliga sauba ke dato babâ saviliu;
ma na verana sauba ke totu sailagi moa tana rago.
Maia sauba ke tagao na tuguna a David na taovia tsapakae,
me ke vaturia gana susuliga tana sasaga gotolaka ma na pedegoto,
ke tû kalina eni me ke ba saviliu tsau tana susuina na dani.
Na Taovia God Susuliga Sosongo e padakuti matena nogo laka sauba nomoa ke naua ma kara laba na omea sui girani.
Na Taovia Sauba Ke Kedegira na Israel
8 Na Taovia e votapede nogo vanigira na Israel, me vanigira goto na kukuana a Jakob. 9 Igira sui na tinoni ni Israel, migira sui goto ara totu tana verabau ni Samaria, sauba kara donaginia nomoa laka aia nogo na Taovia e naua na omea iani. Mi kalina ia, igira ara kaekae sosongo, mara padaloki segeniqira moa. Mara tsaria, 10 “Na vale biriki ara puka tsuna sui nogo, migami sauba kami logovisuginigira tugua na vatu. Na qaroqaro igira ara aqosiginia na gai na vasa ara kavi pukaligira nogo, migami sauba kami tuguginigira na gai na sida laka saikesa.”
11 Na Taovia e gini kore sosongo vanigira, me molo papada nogo i tobaqira gaqira gala laka kara maiginigira. 12 Igira na Siria tabana i longa, migira na Pilistia tabana i tasi, ara sangavinogoa na mangaqira gana kara konomi poponogira na Israel. Me atsa moa ti e vaga ia, ma na korena na Taovia e tau moa vati sui. Aia e kedegira baba moa.
13 Migira na tinoni ni Israel ara tau vati piloligi tania niqira sasi. Me atsa moa ti na Taovia Susuliga Sosongo e kedegira, migira ara tau moa vati visumai i konina aia. 14 Mi laona kesa lelê moa na dani, na Taovia sauba ke kedegira igira na ida tana Israel kolugira nina tinoni. Aia sauba ke kavikutia na lovana ma na kalina na Israel. 15 Na lova: igira nogo na tuqatuqa ma na tinoni tangisoa, ma na kalina: igira nogo na propete ara saua na sasani peropero. 16 Igira gaqira ida na tinoni girani ara ida seko vanigira moa, me gini ponopala saikesa na tobaqira na tinoni. 17 Aia nogoria na rongona ti na Taovia sauba e utu ke tamivanigotoa sa tinoni vaolu ke mauri, se ke galuvegira na daki ma na baka tinamate, rongona na tinoni sui lakalaka girani ara piloligi taninogoa God, me tabaru seko niqira sasaga, me pipi sui na omea ara tsaria ara seko sui moa. Me atsa moa e vaga ia, ma na korena na Taovia e tau moa vati sui. Aia e kedegira baba moa.
18 Niqira tsutsukibo nogo na tinoni e sekoliginigira, vaga saikesa moa na lake loki e gani poponoa na pokopokona na itai kokonaga, me iru vano tana legai atsi, ma na punguna e vulosudato vaga moa na tuguru katsi. 19 Tana rongona nogo na Taovia Susuliga Sosongo e kore loki vanigira nina tinoni, te nina kede e irudato vaga na lake i laona na butona kao popono me iruvigira sui na tinoni, me pipi kesa e gini boe segenina moa, me tau goto boeginia na kulana. 20 Tana butona kao popono na tinoni ara gini vailaugi na ganiana na memena na mutsa koegua moa ara tsodoa, mara tau goto tangomana kara mutsa masu. !Mara gania tsau tana daleqira segeni! 21 Na puku konina a Manase ara vailabugi kolua na puku konina a Epraim, mi muri mara ka sai alaala mara ka baginia na Juda. Me atsa moa e vaga ia, ma na korena na Taovia e tau moa vati sui. Aia e kedegira baba moa.