10
Na Samasama Vaniaqira na God Peropero Ma na Samasama Vaniana na God Mana
1 Igamu na tinoni ni Israel kamu rongomi vatavidoua na goko e tsarivanigamu na Taovia. 2 Aia e tsarivaganana iani,
“Kamu laka na muritaoniana niqira omeomea igira na puku tavosi;
me ke laka ponopala na tobamui kalina kamu morosigira na padapada kara laba tana masaoka,
atsa moa ti igira na puku tavosi kara mataguni sosongoligira.
3 Niqira lotu na tinoni girani e puala lê saikesa.
Ara kavia na gai tana goana atsi,
me kesa na mane e dona na katsu omea levo e katsuginia kesa na titinoni,
4 mara baruginia na siliva ma na qolumila.
Mi muri, mara poga kakaiginia na nila gana ke gini tau takeli.
5 Ma na titinonina na god peropero vaga ia,
ara vaga saikesa moa na omea gana na pero manu ara moloa tana uta na sila;
ara tau dona na goko;
me kilia kara kalagaigira
rongona e utu kara vanovano segeni.
Igamu kamu laka na mataguniaqira,
rongona igira ara tau tangomana kara sekoligamu,
se kara nauvanigamu sa omea dou.”
6 Taovia, e tagara goto kesa ke vaga igoe;
igoe segeni moa o loki tsapakae,
mo susuliga sosongo, me tangiloki na asamu.
7 ?Masei ke tau padalokigo igoe na taovia tsapakae kaputigira na puku sui?
E ulagana nomoa kara padalokigo,
rongona e tagara goto ke kesa ke atsa kolugo igoe
i laoqira na tinoni sasaga pipi sui tana puku,
se i laoqira niqira taovia tsapakae.
8 Igira sui lakalaka ara bubulega mara tau saikesa sasaga.
Ara ba lalave sasani i koniqira na titinonina na god peropero
ara katsuginia na gai lê moa.
9 Ara baru poponoginigira na siliva ni Spain,
ma na qolumila ni Upas,
niqira aqo nogo na tinoni ara sasaga tana aqosiana na omea levo.
Mara sagelivanigira na polo bora ma na polo tsisibora
ara vosia igira na tinoni ara dona sosongo na vosipolo.
10 Migoe segeni moa Taovia o God mana,
migoe na God mamauri,
mo taovia tsapakae na dani ma na dani.
Mi kalina ti ke momosa tobamu igoe, ma na barangengo popono ke gariri tana matagu;
migira na puku sui ara tau tangomana kara baria nimu momosa toba loki.
11 Igamu na tinoni ni Israel kamu tsarivaganana vanigira na tinoni ponotoba, “Nimui god peropero igamu ara tau aqosia na barangengo ma na masaoka, me sauba kara toroutsa sui. Me utu goto kara totu babâ sa nauna tana barangengo.”
Na Linge na Tsonikaeana God
(Jeremia 51:15-19)
12 Na Taovia e volâ na barangengo tana susuligana nogo aia;
mi tana nina sasaga loki e tatakatsinia na baragata.
13 E goko moa aia, me alevo na kô i gotu tana masaoka;
mara maisai na parako na usa tû tana susuina na barangengo.
Maia e naua me kirapi na angaanga i laona na usa,
me molomaia na guguri loki talumai tana nina voki na mani mololaka omea levo.
14 Migira na tinoni ara tau vaga ia.
Igira sui ara bubulega mara tau saikesa sasaga.
Migira ara katsugira na titinonina na god peropero sauba kara gini vangamâ,
rongona na nununa na god ara aqosia igira ara tau saikesa mana, mara tau mamauri.
15 Ara tau saikesa tamani sa rongona, me ulagana nomoa ka reipeagira moa;
maia na Taovia sauba ke mai me ke toroutsanigira sui lakalaka.
16 Ma nina God a Jakob e tau saikesa vaga gira igira.
Aia nogo e aqosia pipi sui na omea,
me viligira na Israel kara lia nina tinoni segeni nogo.
Na Taovia Susuliga Sosongo aia nogo na asana.
Na Taovia Sauba Ke Kedegira na Juda
17 !Igamu na tinoni ni Jerusalem igira gamui gala ara totu poligamu nogo! Kamu boligira sui nimui omea tatamani. 18 Na Taovia sauba ke tsialigigamu tania na kao iani; maia sauba ke tsogori rapasigamu poi tsau ke tau goto totuvisu ke kesa. Na Taovia nogo e tsaria na omea iani.
19 Migira na tinoni ni Jerusalem ara ngangaidato mara tsaria,
“!E seko sosongo nomoa nida rota!
Me utu goto kara mavu na bokada.
E gadovigita nogo na rota loki iani, ma nida aqo nomoa ka berengiti.
20 Igira sui nida valepolo ara seko sui nogo;
mara viri nguta sui na itai ara soriginigira.
Migira sui na daleda ara vanoligi nogo;
me tau totuvisu kesa ke sangâ na vaturikaeaqira tugua nida valepolo;
me tagara goto kesa ke sangâ na tsauraginiaqira na polokatsi ara tsautsau tana matsapaqira.”
21 Minau au tsaria vanigira, “Igira nida ida ara tau saikesa sasaga.
Ara tau nongia na Taovia ke tagaovia niqira papada.
Aia nogoria na rongona te igira ara tau tangomana
na tagaovi douaqira nida tinoni,
mara gini totu saranga bamai lê.
22 !Kamu rongomia bâ! !E labamai kesa na turupatu!
!Kesa na leleo loki e tangilaba i laona kesa na puku tavosi tabana i vava;
migira nina mane vaumate ara maimai nogo
gana kara sekoligira sui na verabau tana Juda ma kara lia na kaomate,
niqira mani totu na pai atsi.”
23 Taovia, inau au donagininogoa laka e tagara kesa tinoni ke taovia vanisegenia,
me ke tagaovia na vavanona na maurina segeni.
24 Ko gotosigira rago nimu tinoni Taovia;
mo ko laka moa na rotasiamami sosongo,
se ko pedegami kalina ke momosa loki na tobamu;
rongona ti ko nauvaganana ia, me sauba igami kami mate sui.
25 Ke piloa nimu momosatoba, me ke ba gado
i koniqira na puku tavosi igira ara tau samasama vanigo igoe,
mi koniqira na tinoni ara sove tanigo.
Igira nogo ara labumatesigira nimu tinoni;
mara toroutsani saikesalia na veramami.