39
1 Ma na Taovia e goko goto vania a Job me tsaria,
“?Laka igoe o donaginia e ngisa ara botsa igira na naniqoti atsi ara totu tana vungavunga?
?Me laka o momoro igoe kalina ara vasusu igira na dia atsi?
2-3 ?Me laka o dona igoe e visa na vula ara totu i tobana
tinaqira igira na dalena naniqoti ma na dia atsi?
Me laka o donagotoa igoe tana tagu gua ara vatsangia na daleqira?
4 Mi laona na goana atsi igira na daleqira ara lokiloki mara susuliga;
mara tsidaligi tania na tinaqira, mara tau goto visumai i koniqira.
5 “?Masei nogo e tamivanigira na asi atsi kara muria niqira papada segeni?
?Masei nogo e nusiligia na sosoriqira, me tamivanigira kara rurugu bamai?
6 Inau nogo au sauvanigira na kaomate ke lia na veraqira,
mau tamivanigira kara mauri tana kao atsa e totu na solo konina.
7 Mara totu ao sosongo tania na leleona na veraloki,
me tau goto tangomana ke kesa ke ladogasigira, ma kara lia nina mani aqo.
8 Ara liu bamai moa i kelana na vungavunga,
mara lalave gaqira buruburu kara gania.
9 “?Egua igoe a Job, o pada laka sauba ke tami sa buluka atsi me ke aqo vanigo?
?Me laka aia ke tami na ba totu i laona nimu vale na buluka tana bongi?
10 ?Me tangomana ko soria na itai i konina sa vidaqira mo ko naua me ke aqo vanigo tana pilokao?
?Se ke raqâ na gau na ovu tavugi tana nimu uta?
11 ?Me laka tangomana ko norua na susuligana loki aia,
me ke nauvanigo nimu aqo loki vaga gira?
12 ?Me laka aia nomoa o padavania ke angunimai vanigo na vuana nimu uta ganoga,
me ke ba mologira goto nimu vatuna uiti tana nauna na mani dudusi uiti?
13 “!Reia na vatana na manu ara soaginia na ostris,*39:13 “na ostris” Aia e kesa na vatana na manu tua katsi e dona na vavano tsaku sosongo tana kao me vo moa na lovo dato i gotu ao. e rereidou sosongo na ivuna ma na rapona,
maia e tau moa dona ke galuvegira na dalena vaga e naua na tsou.
14 Na ostris e mologira nina toluna kara totu lê tana kao,
rongona na guguvuna na kao ke paragira.
15 Me tau goto gini boe ti na tuana tinoni ke tsogori botsaligira,
se na omea atsi kara butuligira.
16 Me vaga moa ti ara tau na toluna segeni nogo aia,
me tau lelê gini boe laka nina rota tana vasusu e puala lê.
17 Minau nogoria au nauvania te aia e gini bubulega,
mau tau goto tusuvania na sasaga loki.
18 Me atsa moa ti inau au nauvani vaganana ia, mi kalina aia e tuturiga na ulo,
maia e dona ke ulo tsaku sosongo, liusigira na ose kolugira igira ara sage i koniqira.
19 “?Me laka igoe nogo a Job, o nauvanigira na ose mara gini susuliga sosongo,
mo tusuvanigira na ivuqira katsi murina lioqira?
20 ?Migoe nogo o nauvanigira ti ara gini dona na tsipu mala kipo,
mara gini molo matagu vanigira na tinoni tana niqira ngusu ara naua me tangi loki na isuqira?
21 Ara gini kaekae na susuligaqira, ma na guguna na tuaqira ara asikaeginia na kao,
mara ulo tsapatugu bâ i laona na vailabu tana susuligaqira popono..
22 Ara tau goto dona na mataguniana sa omea,
me tau goto tangomana sa isi ke sugarivisugira.
23 Ma gaqira sagore na mane ara sage tana ose ara viri rereke, mara angaanga takuti i laona na aso.
24 Mi kalina igira na ose ara rongomia na tatangina na tavuli, me gini kaso na tobaqira;
mara gini tau tangomana kara tu dodo, ara ulovano saviliu.
25 Me pipi kalina e tangi na tavuli, migira ara ngusu loki goto;
ara sigininogoa na vuruna na vailabu loki idavia kara ba varangisia,
mara rongomigira gaqira taovia tagao na mane vaumate kalina ara soalagini vanigira niqira mane.
26 “?Me laka na roga e sasani i konimu igoe te e gini dona na lovo,
me kaporakasia na rapona me sautadâ tabana i ata?
27 ?Me laka na manuloki e pitugo igoe ko ketsalia
ti ke ba logo binuna i gotu ao i kelana na vungavunga?
28 Aia e aqosia na valena i kelana na maragova i gotu ao,
ma na tsotsokina e lia nina mani taopoi.
29 Mi tana nogo aia e tû me matani bamaigira
ti ke visana na omea ke labugira me ke ganigira,
me atsa moa ti kara totu ao, maia e morosigira moa.
30 Iava moa i tana e totu na kubuqira na omea mate,
mi tana ara saimai na manuloki,
ma na daleqira tetelo ara gini mage na mutsuana na gabuqira.”
*39:13 39:13 “na ostris” Aia e kesa na vatana na manu tua katsi e dona na vavano tsaku sosongo tana kao me vo moa na lovo dato i gotu ao.