“?Me laka tangomana igoe ko kautsiginia na salili aia Leviatan na tuqana vigo na omea mamauri ni tasi,

se ko soriginia na itai na lapina?

2 ?Laka tangomana ko tsukulaginia na itai tana tsotouna,

se ko karagiginia na salili na ngongoena?

3 ?Me laka sauba aia ke ngasugo ko galuvea,

mo ko tamivania me ke vano lê?

4 ?Me laka sauba aia ke naua kesa na vekesai kolugo,

me ke vekea laka sauba ke aqo vanigo tana maurina popono?

5 ?Laka tangomana igoe ko ladogasia vaga kalina o nauvania kesa nimu manu,

se ko soriginia na itai, migira na dalemu daki kara gini sisinagi?

6 ?Me laka igira na mane tsabiri kara gini vaipetsakoegi tana molo matena?

?Me laka sauba kara putsi kutikutia ti kara tsabiria?

7 ?Laka tangomana ko baoa ma kara viri katsa gamu bao i konina,

se ko baolobia na lovana?

8 Bâ, ko tovovidana na tangoliana, maia sauba ke iri, mi tana ti ko vatsangia na susuligana,

me utu goto ko padalea, mo ko ngaotugua na tovoana.

9 “Me ti vaga kesa ke reilakana moa na Leviatan,

me sauba ke kaso tobana me ke tavongani mateluvu lê.

10 Me ti vaga ke bâ kesa me ke tsaia, maia sauba ke kore.

?Masei nomoa ke malagai na ba tû i matana?

11 ?Masei tangomana ke baginia aia me ke mauri moa?

Tagara kesa tana barangengo popono tangomana ke naua.

12 “Ko rorongo igoe, minau kau votadou vanigo tana rongona na tuana aia Leviatan,

ma gana susuliga, ma na rereina na konina.

13 Tau tangomana kesa ke ratsiligi vania gana polo na tsavugotu,

se ke tailobia gana sagore e sagelia.

14 ?Masei nomoa tangomana ke mangangasi vania na mangana,

i tana ara viri tû na livona mamataguniga?

15 Ma na kakana tana gotuna ara viri tutû palatete

vaga na tako ara bulusaigira, mara kakai vaga na vatu.

16 Me pipi kesa e tuguta bâ kolua kesa i ligisana,

me atsa moa ti na magomago me tau goto tangomana ke liu tana ka gaqira levuga.

17 Igira sui ara totu bulusai kakai

me tau goto tangomana sa omea ke raqa votagira.

18 Mi kalina aia e tsipe, ma na angaanga e kirapi mai,

ma na matana e maka vaga moa na aso kalina e dato vaolu.

19 Na lapina lake e rutsumai tana mangana,

ma na vividina ara viri rarasa bamai.

20 Ma na pungu e rutsuligi talu i laona na isuna,

vaga moa na punguna na buruburu ara kodoa i vavana na kuki.

21 Mi kalina aia e manganga ma na mamagona e gini gâ na lake;

ma na iruna e rutsulaba tana mangana.

22 Me matai sosongo na liona,

migira sui ara tsodoa aia ara gini matagu loki sosongo.

23 Me tau goto maluku sa tabana na kokorana;

e kakai popono vaga moa na tapala laka.

24 Ma na tobana e kakai pitsu

vaga saikesa moa na vatu na asa gau.

25 Mi kalina aia ke tû, me atsa moa na tinoni susuliga bâ, migira goto ara matagu mate;

me labe lê na koniqira popono.

26 Me tau goto tangomana sa isi kara tou bokaliginia;

se sa bao, se sa pipili kara baoginia.

27 Mi matana aia, ma na tapala laka e malutsi lê vaga moa na rau na buruburu makede.

ma na tapalamila e maluku lê vaga moa na gai tolatola.

28 Me tagara goto sa pipili tangomana ke molo matagu vania me ke gini tsogo aia;

migira goto na vatu ara taiginia ara vaga moa ti na tapurina tetele lê na buruburu makede.

29 Mi matana aia na tubi e vaga lê moa ti kesa na rau na buruburu makede.

maia e kiataginigira lê moa kalina na tinoni ara langâ mara tsonia niqira bao.

30 Ma na vidona tana tobana ara vaga moa na tatsilena vavanga na popovatu;

me pipi tana nauna aia e liu ma na vidona e dona ke qaria na kao.

31 Mi kalina aia e su tsuna i tasi, maia na tasi e aligiri me vulodato,

me pupuega vaga moa kalina e totopo na kô.

32 Me molovisua i murina na burorona angaanga, me sere vaga saikesa moa na sengena na tuqatuqa.

33 Me tagara goto sa omea tana barangengo popono ke atsa kolua;

aia nogo e kesa na omea vovola e vô saikesa na matagu.

34 Aia e morosi peagira na omea sui atsa moa ti igira na omea tuavati vanga kaekae;

me taovia kaputigira pipi sui lakalaka na omea tuavati atsi.”