NINA PAPI
A JOEL
Na Vuresi Makaliana Na Omea Ara Marea Tana Papi Iani
I laona na papi iani, aia nina papi A Joel, ara maretsunagira nina goko kesa na propete, a Joel na asana. Me tau moa totu sa nauna na turupatuna laka na vatana na mane koegua aia. Me rerei vaga moa ti aia e mauri tana tagu kalina e dato susuliga na vera ni Persia, mi tana tagu goto kalina igira na Tsiu ara mololenogoa i Babilon, mara visutugua tana kao ni Juda.
A Joel e turupatuna tana rongona kesa na tagu seko sosongo sauba ke gadovia na Juda. Na aso sauba ke sina kakai sosongo, ma kara viri mate takuti na omea sui, ma kara laba danga sosongo na kipo, ma kara ganigira sui na vangana na uta. Mi tana omea vaga nogo gira aia Joel e reia vaga na papadana na maiana nina Dani na Taovia, na tagu kalina God ke kedegira igira sui ara sove na rongomangana aia, me ke saupeluna vanigira igira ara muria nina kili. Maia Joel e raigira na tinoni kara pilotoba ma kara mololea niqira sasi, mi tana ti God sauba ke galuvegira tugua. Me kesa na veke dou sosongo e totu tana nina goko a Joel tana Lova 2 buto 28-32, i tana God e vekea laka sauba ke molomaia nina Tarunga i koniqira na tinoni sui na mane ma na daki, na tinoni vaolu ma na tinoni ganoga. Mi muri bâ kalina God e molomaia na Tarunga Tabu i koniqira gana duli a Iesu, maia Petero e adikaea nina goko iani a Joel. Reia tana Niqira Aqoaqo na Apostolo Lova 2 buto 1-42.
Na Omea Ara Totu Tana Papi Iani
Na rota seko loki ara naua na kipo 1:1–2:17
Na veke tana rongona na mauri vaolu 2:18-27
Nina dani na Taovia 2:28–3:21
1
Ara Tangisia Niqira Uta
1 Iani nogo e vaga nina goko na Taovia vania a Joel na dalena a Petuel.
2 Kamu rorongo dou igamu na tinoni ganoga, migamu sui goto tana Juda kamu rorongo mai. ?Laka amu reinogoa e laba sa omea vaga ia tana maurimui igamu, se tana mauriqira igira na mumuamui? 3 Kamu turupatuna vanigira na dalemui tana rongona na omea vaga ia, migira kara gini turupatuna vanigira na daleqira, migira goto sauba kara gini turupatuna babâ vanigira na vatavata kara mai i muri.
4 Na alaala ma na alaala na kipo ara mai mara viri vungu tana omea tsukatsuka, mara ganiligisuia na rauqira. Mi kalina e lovoligi kesa na alaala me mai tao goto kesa na alaala. 5 Kamu mamata ma kamu ngangai igamu na vanga inu bubulega. Ma kamu ngangai goto amu inu uaeni, rongona igira na kipo ara ganigira sui nogo na vuana uaeni agana na aqosiginiana na uaeni vaolu.
6 Na alaala popono na kipo ara tovusi poponoa nida kao, migira ara susuliga mara danga sosongo me utu na tsokoraeaqira, me vavanga sosongo na livoqira vaga moa na livona laeone. 7 Mara ganigira sui lakalaka nida itai na uaeni, mara ganigira sui goto na vuana nida gai mutsamutsa. Mara ganiligisuia na kokorana nida gai tsukatsuka mara viri sere takuti na araqira.
8 Kamu ngangai igamu na tinoni, vaga moa kalina kesa na baka daki e tangisia na mateana na mane aia sauba ke taugâ. 9 Me tagara goto sa uiti se sa uaeni agana na savoriana tana Vale Tabu. Migira na manetabu ara gini tangitangi rongona ara tau goto tamanina sa omea kara savori vania na Taovia. 10 Me tagara goto sa omea ke totuvisu i laona na uta, ma na kao goto e tangitangi, rongona ara viri nanga sui na vangana i laona, ma na vuana uaeni ara viri makede lê, migira na gai na olive ara viri matsele sui.
11 Kamu tangitangi igamu na tinoni aqo kao. Ma kamu ngangai igamu amu reitutugugira na uta na uaeni, rongona na uiti, ma na barli, me pipi sui na omea tsukatsuka ara viri nanga lê sui. 12 Igira na itai na uaeni ma na gai mutsamutsa ara viri matsele sui. Migira sui goto na gai mutsamutsa tavosi ara viri matsele mara mate lê. Me sui lê goto niqira magemage na tinoni.
13 Migamu na manetabu amu aqo tana na belatabu, kamu sageligira nimui polo baubau papadana na melu ma kamu ngangai. Kamu vano tana Vale Tabu ma kamu tangitangi tana bongi popono. E tagara lelê goto sa mutsa se sa uaeni gana na savorivaniana nimui God. 14 Kamu ketsaligira na tinoni kara tsoni vitoaqira segeni. Kamu soasaigira na toga gana na samasama. Ma kara saimai goto na tinoni lokiloki, migira sui lakalaka na tinoni tana Juda, i laona nina Vale Tabu nimui God ma kamu ngangai dato vania. 15 Nina dani na Taovia e mai varangi nogo, aia nogo na dani i tana aia na God Susuliga Sosongo ke alomaia gaqira matemate na tinoni sui. Ma na omea mamataguniga nomoa sauba ke laba tana dani ia.
16 A momoro lê moa gita, ma gada mutsa ara viri nanga lê sui, ma tau goto reia sa magemage i laona nina Vale Tabu nida God. 17 E mamatsa lê na kao, mara viri mate lê na omea sui igita a tsukagira. Me tagara goto sa mutsa agana na mololakaana. Me vaga ia, migira na vale na mololaka mutsa ara totu kobakoba lê mara viri taratsi sui. 18 Migira na buluka ara viri kanga tana rota loki, rongona e tagara sa buruburu kara gania, migira goto na sipi ara gini rota sosongo na vitoa. 19 Minau au ngangai dato vanigo Taovia, rongona igira na buruburu ma na gai ara viri mate vaga moa ti e iruvigira na lake. 20 Migira goto na omea tuavati atsi ara ngangai dato vanigo ko sangagira rongona na kô sui ara viri mamatsa takuti.