1 !Taovia, ko tukapusigira igira ara tukapusiau,

mo ko vailabu kolugira igira ara vailabu koluau inau!

2 Ko adia gamu tako ma gamu sagore

mo ko mai isutuguqu.

3 Ko saukaea nimu bao ma nimu kilekile,

mo ko tukapusigira igira ara takuviau.

Mo ko veke vaniau laka sauba nomoa ko maurisiau inau.

4 !Ko utusigira igira ara tovoa laka kara labumatesiau inau;

ko naua me ke paluvangamaqira lê!

!Migira ara vorogokona na labuaqu inau,

kara sugavisu lê me ke ponopala na tobaqira!

5 !Kara vaga moa na rau matemate lê e lovosaginia na guguri

kalina ke tû nina angelo na Taovia me ke tsialigigira!

6 !Ma na sautu tana kara liu ke rodo me ke madali,

kalina nina angelo na Taovia ke takuvigira!

7 Ara tau lelê tamanina sa niqira rongona mara tû mara tavongani molovaniau gaqu taviti,

mara tsaia na qilu e qou gana kau puka i laona.

8 Ma na mate sauba ke tavongani gadovigira kalina igira ara tau padâ;

sauba kara sogo segeni i laona niqira taviti ara molovaniau,

ma kara puka tana qou loki ara tsaia vaniau ma kara mate i laona.

9 Mi tana ti inau kau gini mage tana rongona na omea e naua na Taovia,

me sauba kau gini magemage rongona aia e maurisiau.

10 Mi tana tobaqu popono sauba kau tsarivania na Taovia,

“?Taovia asei nomoa ke vaga igoe?

Igoe o maurisigira ara maluku tania na limaqira igira ara susuliga liusigira;

migira ara tau tamanina sa omea tania na limaqira igira ara rotasigira.”

11 Igira na tinoni seko ara tû mara tavongani keli vaniau lê

tana rongona na tsutsukibo inau au tau donaginia.

12 Ara tuguvisu vaniau na seko tuguna na omea dou au naua,

me gini ponopala saikesa na tobaqu.

13 Minau au tau nauvaganana vanigira ia. Tagara.

Mi kalina igira ara lobogu, minau au roku,

mau tsoni vitoaqu segeni.

Au ulutsuna na lovaqu mau nonginongi kakai vanigira,

14 vaga moa kalina au nonginongi vania kesa na kulaqu se kesa na tasiqu.

Au liubamai kiki moa tana melu

vaga moa kalina kesa e roku rongona e mate na tinana.

15 Kalina inau au totu moa i laona na rota, migira sui ara gini mage,

mara saikolumai mara gilugaqu.

Migira goto na tinoni inau au tau donaginigira ara totu matengana na lumuaqu.

16 Igira ara gilugaqu babâ moa,

mara vusuliau tana kore.

17 ?Me laka ke oka koegua sagata ko momoro lê moa igoe Taovia?

!Ko mai mo ko laumaurisiau tania na limaqira igira ara sekoliau,

ko maurisiau tanigira na laeone girani!

18 Mi tana ti sauba inau kau soadougo i laona niqira saikolu nimu tinoni;

ma kau tsonikaego i mataqira igira sui.

19 Ko laka na tamivaniaqira gaqu gala, igira na vanga pero,

kara mage rongona ara tuliusiau inau.

Ko laka na tamivaniaqira igira ara reisaviau lê tagara sa rongona

kara kiataginiau tana niqu rota.

20 Ara tau goto dona kara tsonia sa goko laka;

ara dona moa na botsangiana pipi vatana na goko pero kalegira na tinoni ara tobarago.

21 Ara tû mara gudato mara keli vaniau, mara tsarivaganana,

“!Lelê, ami reia na omea igoe o naua!”

22 Eo, migoe nogo Taovia o reinogoa na omea iani.

!Vaga ia, mo ko laka na totu mui Taovia;

ko laka goto na totu ao taniaqu vaga sagata ia!

23 Ko aligiri Taovia mo ko isutuguqu;

ko tsaku niqu God mo ko sogogaqu.

24 Taovia igoe o gotolaka saikesa,

me vaga ia mo ko sauvulagia laka inau na tinoni dou mau tau sasi;

mo ko laka na tamivaniaqira gaqu gala kara gini mage matena ara tuliusiau.

25 Ko laka goto na tamivaniaqira kara goko ma kara tsarisegeniqira vaga iani,

“!Dou! !E laba vaninogoa na omea igita a kilia!

!Reia! !Igita a matesinogoa!”

26 Migoe Taovia ko naua, ma kara luvu lê igira ara gini mage tana rongona na rota e gadoviau inau,

me ke ponopala lê na tobaqira,

migira ara koesegeniqira mara tsaria laka ara dou bâ liusiau inau,

igoe ko naua, me ke tsavugira popono na vangamâ me ke paluvangamaqira.

27 Migira moa ara ngaoa laka ke managaqu inau,

kara tû ma kara gudato tana magemage ma kara tsari sailaginia,

“!E loki tsapakae manana na Taovia!

Aia e gini mage na reiana kalina e managana nina tinoni aqo.”

28 Mi tana nogo ti sauba inau kau katevulagia laka igoe Taovia o gotolaka,

ma kau tsonikaego sailagi na dani popono.