1 Soadoua na Taovia,

katevulagia gana loki tsapakae;

tsarivanigira na puku sui na omea aia e naugira.

2 Linge na tsonikaeana na Taovia;

katevulagigira na omea dou sui aia e naugira nogo.

3 Ka gini mage loki igita, tana rongona igita a nina tinoni nogo aia;

migira sui goto ara samasama vania kara gini magemage loki.

4 Igita ka bâ i konina na Taovia rongona aia ke sangagita;

ma ka totu sailagi i matana.

5-6 Igamu na kukuana a Abraham aia nina maneaqo na Taovia;

migamu goto na kukuana a Jakob na mane aia God e vilia;

kamu padatugugira na valatsatsa loki God e aqosigira,

ma nina pedelaka aia e naua.

7 Na Taovia aia nogo nida God;

ma nina ketsa ara kalegira na tinoni sui tana barangengo popono.

8 Aia sauba ke padatugu sailaginia moa na vaitasogi e naua kolugira i sau,

ma nina veke sauba kara totu kalavata saviliu vanigira na toga ma na toga na vatavata.

9 Me sauba ke manalia nina vaitasogi aia e naua kolua a Abraham,

ma nina veke e naua vania a Isaak.

10 Na Taovia e naua kesa na vaitasogi kolua a Jakob,

ma na vaitasogi ia sauba ke totu kalavata saviliu.

11 Maia e tsarivania, “Inau sauba kau sauvanigo na kao ni Kanaan,

maia sauba ke lia nimu tamani segeni.”

12 Igira nina tinoni God e tsaurae lê na dangaqira;

mara labavô i laona na kao ni Kanaan.

13 Ara liubamai moa, tû kesa tana vera mara bâ kesa tana vera tavosi,

mara tû tana verana kesa na taovia tsapakae, mara bâ i konina kesa segeni.

14 Mi tana tagu popono ia, ma God e tau tamivania ke kesa ke bingi sekoligira;

maia e parovatavigira na taovia tsapakae me tsarivanigira,

15 “Kamu laka na sekoliaqira igira niqu tinoni inau au viligira;

ma kamu laka saikesa goto na peleaqira igira niqu propete.”

16 Mi kalina na Taovia e naua me liu na uvirau tana veraqira i Kanaan

me adiligi tanigira pipi sui gaqira mutsa,

17 maia e tû, me moloa a Josep aia ara tsabiria mala tseka,

ke idavano i Ejipt.

18 Ara soriginia na tuana a Josep na itai tapala,

ma na liolio tapala ara kurua tana liona,

19 me babâ vaga ia poi tsau kalina ara laba na omea sui vaga aia e katevulagigira ida nogo,

ma na gokona na Taovia e sauvulagia laka na omea aia Josep e tsaria ara mana sui.

20 Mi muri, ma na taovia tsapakae ni Ejipt e mologira nina maneaqo kara ba nusilea a Josep,

aia nogo niqira taovia na puku tavosi e nusilea tania na vale sosori.

21 Maia e moloa ke taovia loki tana verana,

me ke tagaovi kaputigira nina tamani sui,

22 me ke ida vanigira igira nina mane sasanga na taovia tsapakae

me ke totosasaga vanigira igira nina mane na sauparovata vania na taovia tsapakae.

23 Mi muri bâ, ma Jakob goto e vano i Ejipt

me ba totu kalavata i tana.

24 Ma na Taovia e molovanigira nina tinoni kara danga na daleqira,

me naua migira ara susuliga liusigira gaqira gala.

25 Maia nogo e naua ti igira na Ejipt ara reisavigira nina tinoni,

mara perobulesigira sosongo.

26 Mi muri, maia e molo bâ vanigira a Moses nina maneaqo, ma Aaron aia e vilinogoa.

27 Mi kaira nogo ara ka gini aqo na susuligana God,

mara ka naugira danga na valatsatsa tana Ejipt.

28 God e moloa na rodo ke tsavua na vera popono,

migira na tinoni ni Ejipt ara petsakoe moa mara sove na rongomangana.

29 E olia niqira ko loki me lia na gabu

me matesigira sui niqira tsetse.

30 Ma na qori ara dangalia na vera popono,

me tsau bâ tana valena na taovia tsapakae, ara bâ danga goto i laona.

31 Ma God e moloketsa mara laba danga na lango ma na ngitsu,

mara viri vururu i laona na vera popono.

32 Ngiti usa aia e molotsunamaia na kolina na usa kakai kolu angaanga tana veraqira;

33 e sekoli vanigira popono pipi niqira uta na uaeni kolu niqira gai mutsamutsa sui,

me bokugira sui lakalaka pipi na gai ara totu i tana.

34 Aia e moloketsa, mara laba danga sosongo na kipo,

me utu na tsokoraeaqira;

35 migira ara ganigira pipi sui lakalaka na rauna na omea tsukatsuka tana vera ia;

mara ganigira goto na mutsa sui ara tsukagira.

36 Aia e matesigira sui na baka mane botsaida i laoqira na tamadale sui tana Ejipt.

37 Mi muri, maia e adirutsumigira na tinoni ni Israel tania na Ejipt;

migira ara anguniligigira na siliva ma na qolumila,

me pipi gira sui ara mauri dou mara susuliga rago.

38 Migira na Ejipt ara matagunigira sosongo,

mara gini mage moa kalina igira na Israel ara vanoligi tanigira.

39 God e moloa na parako ke didisigira nina tinoni tana dani,

mi tana bongi ma na lake e mararasi vanigira na sautu.

40 Igira ara nono gaqira i konina, maia e molovanigira gaqira manubau;

me sauvanigira na mutsa e talu i gotu kara gania ma kara gini vatsa.

41 Aia e toua na maragova, ma na kô e bubusu tsunamai,

me sarara me mao popono tana kaomate vaga moa ti kesa na ko loki.

42 E padavisua nina veke tabu

aia e nauvaninogoa a Abraham nina maneaqo.

43 Ti aia e gini adirutsumigira nina tinoni vivili,

migira ara lilinge mara gugû loki tana magemage.

44 Maia e tû, me tusulea vanigira niqira kao igira na tinoni tavosi,

me tamivanigira kara aditamaniqira niqira uta.

45 Aia e nauvanigira vaga ia ti igira nina tinoni

kara gini muridougira pipi sui nina ketsa ma nina vali.