NA KATEMAI
IGIRA NA OMEA A IESU E KATEVULAGIGIRA VANIAA IOANE
Na Vuresi Makaliana Na Omea Ara Marea Tana Papi Iani
Na papi iani ara soaginia na Katemai, a Ioane e marea vanigira na Kristiano vaolu, kesa tana tagu kalina ara rotasi sosongoligira na Kristiano rongona ara tutunina kakai laka a Iesu Kristo e Taovia. E ngaoa laka ke kakaisiginigira ma kara gini malagai na tukakai tana niqira tutuni, atsa moa ti na rota loki se na mate ke gadovigira.
Tana papi iani e gini aqo danga na goko tabana ma na gokolia. Ma na omea aia e marea, igira na Kristiano vaolu ara dona rago kara padagadovia, migira na tinoni tavosi sui ke utugana vanigira nomoa na padagadoviana. Me atsa moa ti ke tavosi babaa niqira votagoko na tinoni tana rongona na omea ara totu tana papi iani, me atsa moa goto ti ke kakai vanigita goto igita i dani eni na padagadoviana popono, ma na sasani pukuga i laona e totu maka saikesa nomoa: laka tana rongona saikesa nogo nina aqo ma nina rota a Iesu Kristo na Taovia, ti God sauba kesa dani ke tsogori tsunaliginigira sui gana gala, kolugotoa Satan, me ke saua na peluna vanigira sui igira ara totukakai tana niqira tutuni. Mi tana susuina, maia God ke saua na baragata vaolu ma na barangengo vaolu vanigira na tinoni ara tutunina mara totukakai i konina.
Na Omea Ara Totu Tana Papi Iani
Na goko idaida 1:1-8
A Iesu e laba vania a Ioane 1:9-20
Na goko e kaletugira vitu na vera na lotu 2:1–3:22
Na viviruna papi kolu vitu na bubulutina 4:1–8:1
Ara tu vitu na tavuli 8:2–11:19
Na daki ma na vua loki 12:1-17
Ruka na omea tuavati atsi 13:1-18
Visana tavosi goto na moro 14:1–15:8
Tugira vitu na dangana popo na korena God 16:1-21
E toroutsa na Babilon, ma na tuliusiaqira na omea tuavati atsi migira na propete peropero ma na tidao seko 17:1–20:10
Na pede loki tana susuina na dani 20:11-15
Na baragata vaolu, na barangengo vaolu, ma na Jerusalem vaolu 21:1–22:5
Na visumaiana a Iesu 22:6-17
Na susuina 22:18-21
1
1 Tana papi iani, e totu na (mamarena) na omea vaga nogo aia God e molovania a Iesu Kristo ke gini katevulagimaia vanigira nina tinoni, tana rongona na omea sauba ke tau oka ma kara laba. A Iesu Kristo e mologinia kesa nina angelo ke mai laba i koniqu, inau a Ioane nina maneaqo, me ke vuresi makalivaniau na omea sui girani. 2 Minau au tsarivulagigira nogo na omea sui au reigira. Miani nogo e vaga na turupatuna na tsaqina na goko na katemai e talumai i konina God, ma na manana vaga nogo a Iesu Kristo e katevulagimaia vaniau. 3 !Ke dou vania asei ti vaga aia ke tsokodougira na tsaqina goko sui ara totu i laona na papi iani! !Me ke dou vanigira goto igira ara rongomi vatavigira, mara muridougira na goko na katemai ara totu tana papi iani! Rongona e varangi sosongo nogo ke laba na tagu i tana kara laba manana na omea sui vaga girani.
A Ioane e Mamare Baa Vanitugira Vitu na Vera na Lotu
4 Inau a Ioane, au marea na leta iani vanitugamu sui amu tu vitu na vera na lotu tana butona na vera ni Asia:
God aia e totu nogo kalina ia, me totu nogo tuu tana tuturigana, me sauba ke visumaitugua, aia nogo e molo baa vanigamu nina vangalaka ma nina rago, mi tugira goto tu vitu na tarunga ara tu totu i matana nina sasana na totukae na Taovia, i tana aia e tuu me tagaovigira na tinoni ma na omea sui, 5 maia goto a Iesu Kristo, nina tabegoko manana God, maia na kesanina e maurivisutugua tania na mate, maia goto nogo e taovia kaputigira na taovia tsapakae sui tana barangengo popono.
A Iesu Kristo e galuve sosongoligita, mi tana mateana nogo tana gai (ulutaligu) e gini tsonimateqira nida sasi, 6 me naua, migita a gini lia na puku manetabu, gana na aqo vaniana God na Tamana. !Igita ka tsonikaea a Iesu Kristo tana mararana ma na susuligana na dani ma na dani! Amen.
7 !Reia baa, aia e maimai nogo tana parako! Igira sui na tinoni sauba kara reia aia, kolugira goto igira ara baoginia na bao. Na tinoni sui lakalaka tana barangengo popono sauba kara tangisia. !Me sauba nomoa ke vaga ia!
8 “Inau na Idana tsotsodo, ma na Susuina tsotsodo,” e tsaria na Taovia God susuliga sosongo, aia e totu kalina ia, me totu nogo tuu tana tuturigana, me sauba ke visumaitugua.
A Iesu e Laba Vania a Ioane
9 Inau a Ioane na tasimui, ma gamui dulikolu tana tutuni konina a Iesu Kristo gada Taovia Tsapakae. Minau kesa au vaga goto igamu, au berengiti kakai goto na bariana na rota loki vaga e gadovigira igira sui e tamanigira a Iesu Kristo. Inau au tototu moa tana momoru ni Patmos, i tana ara tsoniau rongona au tau kuti na turupatuna na gokona God ma na manana vaga nogo a Iesu Kristo e katevulagimaia vaniau. 10 Me kesa tana nina Dani na Taovia, ma na Tarunga Tabu e totuviau, mau rongomia kesa na goko e tangi loki vaga moa ti kesa na tavuli e tatangi mai i muriqu. 11 Maia e tsarivaniau: “Ko maretsunagira na omea sui o reigira, mo ko tusu baa na papi vanitugira na vera na lotu tana vitu na vera loki tugirani: i Epesus, mi Smirna, mi Pergamum, mi Tiatira, mi Sardis, mi Piladelpia, mi Laodisea.”
12 Mau pilovisu laka kau morosia asei aia e gokomai vaniau. Mau reitugira ara tu vitu na gai qolu na mani molodatoana na bulu iruiru, 13 mi tu koniqira e totu kesa, aia e rerei vaga na Dalena Tinoni, me sagelia na polo katsi e tsuna tsau i tuana, me soritaligua na polo qolu tana aseasena. 14 Me seremaka na ivuna, ma na matana e iru vaga na lake. 15 Na tuana e angaanga vaga moa ti na tapala mila ara kotsa maledoua. Ma nina goko e tangi vaga saikesa na kukutuna na sasavu tana koo loki. 16 Mi tana limana madoa e tangolitugira vitu na veitugu, mi tana mangana e rutsumai kesa na isi vavanga ruka levu. Ma na ngorana e maka vaga na makana na aso tana niaso vota.
17 Mi kalina inau au reia na omea vaga ia, mau pukatsuna i tuana vaga moa ti au mate nogo. Maia e molomaia na limana madoa i koniqu me tsarivaniau, “!Ko laka na matagu! Inau na Idana tsotsodo, minau na Susuina tsotsodo. 18 Inau au mamauri kalavata. Eo, au mate rago nogo i sau, mi kalina eni au mauri, me sauba kau mauri babaa na dani ma na dani. Inau au susuliga kaputia na mate ma na veraqira na mate. 19 Me vaga ia, migoe ko maretsunagira moa na omea sui o reigira, eo, igira sui na omea igoe o reigira kalina ia, kolugira goto na omea sauba igoe ko reigira kara laba i muri baa. 20 Iani nogo e vaga na papadana popoi tugira vitu na veitugu igoe o reigira tana limaqu madoa, mi tugira na gai qolu gana na mani molodato bulu iruiru: tugira vitu na veitugu na papadana nogoria tu niqira angelo vangatao tugira vitu na vera na lotu. Mi tugira vitu na gai qolu na mani molodato bulu iruiru, na papadana nogoria tugira vitu na vera na lotu.