NA LINGE NA GALUVE
Na Vuresi Makaliana Na Omea Ara Marea Tana Papi Iani
I laona na papi iani Na Linge na Galuve ara maregira visana na linge na galuve kesa na mane e nauvania kesa na daki, ma na daki ia e tuguvisu vania na mane. Ma na papi iani ara soaginigotoa Nina Linge a Solomon, rongona visana ara padâ laka a Solomon nogo e maregira na linge girani.
Ara danga tana papi i laona na Mamare Tabu ara gini gokolia laka na Israel nina daki God. Mi kalina igira na Tsiu ara tsokoa na papi iani, ara padâ e sauvulagia nina galuve loki God vanigira na Israel, ma niqira galuve loki na Israel vania God. Mi kalina igira na Kristiano ara tsokoa na papi iani, ara padâ e sauvulagia nina galuve loki a Iesu Kristo vania na saikolu na lotu, ma nina galuve loki na saikolu na lotu vania a Iesu Kristo.
Na Omea Ara Totu Tana Papi Iani
Na kesanina linge 1:1–2:7
Na rukanina linge 2:8–3:5
Na tolunina linge 3:6–5:1
Na vatinina linge 5:2–6:3
Na tsegenina linge 6:4–8:4
Na ononina linge 8:5-14
1
1 Na linge dou liuliu bâ e marea a Solomon.
Na Kesanina Linge
Na Daki
2 Ko laka kiki na kuti na domiaqu;
rongona nimu galuve vaniau e dou liusia bâ na uaeni.
3 E sigini dou sosongo na vurumu;
ma na tatangina na soamu e dou sosongo vaniau vaga moa kalina ara qetua na ko sisigini.
!Aia nogo na rongona ti ara ngao sosogoligo goto igira na daki tavosi!
4 Ko adiau moa inau ma ka ka tsogoligi;
ko adiau i laona nimu voki mo ko lia niqu taovia tsapakae.
Mi kaita sauba ka gini magemage na totu sai.
Igoe o galuve sosongoliau,
mi kaita ka ka gini mage manana.
Ka nida mage e dou liusia bâ na gini mage na inu uaeni.
!Aia nogo na rongona ti igira sui na daki ara ngao sosongoligo igoe!
5 Kamu rorongo mai igamu na daki ni Jerusalem.
Inau e bora rago na kokoraqu, mau rereidou sosongo nomoa.
Au bora vaga saikesa na valepolo tana kaomate ni Kedar,
mau rereidou vaga saikesa nogo na polokatsi ara tsauraginia tana valena a Solomon.
6 Kamu laka moa na reipeaaqu rongona e bora na kokoraqu,
na aso moa e rangiau te e gini bora na kokoraqu.
Igira na tasiqu ara kore sosongo vaniau
mara turuau kau ba aqo i laona na uta na uaeni.
Mau tau goto tamani sa tagu kau arago kikia na koniqu segeni.
7 Migoe niqu udu, ko tsarivaniau,
?Iava tana sauba igoe ko adivanogira nimu sipi kara gania na buruburu?
?Miava tana sauba kara ba toturavi kalina ke papara na aso tana niaso vota?
?Me rongona gua te e kiligotoa kau ba lavego i laoqira niqira sipi igira na mane pitusipi tavosi?
Na Mane
8 ?Igoe niqu udu o rerei dou sosongo liusigira na daki sui, laka o tau vati donaginia moa na nauna ia?
Ko bâ mo ko muria na maleaqira na sipi,
mo ko ba mologira nimu dalena naniqoti kara mutsamutsa
i ligisaqira niqira valepolo igira na mane pitusipi.
9 Eo, igoe niqu udu o rerei dou laka
ma gamu inilau ara rerei dou saikesa,
vaga moa na inilau ara inilauginigira na ose ara raqâ nina terê na taovia tsapakae ni Ejipt.
10 Ma na ngoramu e rereidou sosongo kolua gamu tsaukuli,
ma na liomu kolua gamu liolio ara aqosiginia na vatu angaanga.
11 Migami sauba kami aqosi vanigo gamu inilau qolumila
ma kami baruginia na siliva.
Na Daki
12 Niqu taovia tsapakae e tsaro i nigena,
me siginia na vuruna niqu sede.
13 Niqu udu e vaga moa na veveqona na papasa sisigini dou
e tsaro tana aseasequ.
14 Niqu udu e vaga saikesa moa na tsitsi sisigini dou
ara viri taporatsa i laona na uta na uaeni i Engedi.
Na Mane
15 !Na vanga rerei dou nomoa na rereimu igoe niqu udu;
me mauri manana nomoa na matamu!
Na Daki
16 !Na vanga uluvao laka nomoa na rereimu igoe niqu udu galugaluve;
eo, igoe o rerei dou manana nomoa!
Na buruburu marao dou sauba ke lia ka nigeda.
17 Ma na gai na sida sauba ke lia na gogona ka valeda,
ma na aru ke lia na gasona.