1 Pipi tana bongi kalina au maturu,

au bolea moa aia au ngao sosongolia.

Au lalave bamaia, mau tau goto ba tsodoa.

2 Au liu bamai i laona na sautu loki

ma na pakokana na verabau.

Au lalave bamaia aia au ngao sosongolia.

Au momoro bamai rago mau tau goto tsodoa.

3 Migira na mane matali ara matalia na verabau ara morosiau.

Minau au tû mau veisuagira, “?Laka amu tau reikikia niqu udu inau?”

4 Mi kalina tsotsodo au mololegira igira mau ba tsodoa.

Mau tangoli kakaia, mau tau goto tamivania ke vano,

poi tsau kalina au adivanoa i valena tinaqu,

i laona nogo nina voki aia e vasuau.

5 Igamu na daki ni Jerusalem kamu vatsa vaniau

tana asaqira na dia ma na omea tuavati atsi ara dona sosongo na ulo tsaku,

laka sauba kamu tau goto adikae gokona na vainaugi

poi tsau ke tsau segeni gana tagu.

6 ?Nagua vaga ia e maimai talu tana kaomate

vaga moa na kakoluna na pungu,

me sigini dou vaga moa na bulunagai uruuru ma na mira,

me pipi sui na vatana na sede ara dona na tsabiriana igira ara tsabiri omea levo?

7 !Reia bâ! Kesa na sasana na totukae dou sosongo ara kalagaimaia,

maia nogo a Solomon e totukae i kelana;

mara ono sangavulu na mane vaumate ara dulikolumaia,

igira na mane vaumate susuliga liuliu bâ tana Israel.

8 Igira sui lakalaka ara dona sosongo na gini vailabu na isi,

me danga nogo kalina ara sangâ tana vailabugi loki.

Me pipi vidaqira e tango kesa nina isi,

mara totu vangarau pitugira na gala kara tau maiginigira tana bongi.

9 A Solomon na taovia tsapakae ara kalagaimaia tana nina sasana na totukae tamani valena

ara aqosiginia na gai laka.

10 Na tuguruna ara poroginia na siliva,

ma na valena ara tsavuginia na polo ara tula mamaregasiginia na terete qolu.

Ma na mani totukae ara tsavuginia na polo tsitsibora,

ara vosi valakasidoua igira na daki ni Jerusalem.

11 Igamu na daki ni Sion, kamu mai ma kamu reia a Solomon na taovia tsapakae.

Aia e sagelia gana kepi taovia aia na tinana e molovaninogoa i lovana

tana nina dani na mutsasai na tauga,

aia nogo na dani na mage loki vania.