7
Na Mane
1 !Niqu udu igoe, e uluvao laka rago na rereimu!
Na tuamu ara ka rereidou rago i laona gamu porotua.
Ma na kakabamu ara ka paquru mara ka rereidou
vaga saikesa nogo na titinoni e katsua kesa na mane e dona sosongo na katsu taoni omea levo tana vatu.
2 Ma na tsuruna na pepemu e vaga moa kesa na bilo
e vô ke kora na uaeni i laona.
Ma na tobamu e vaga moa kesa na ivogo na uiti
ara inilau polipoliginia na vulevule.
3 Mi kaira na tsutsumu ara ka vaga moa ruka na dia batso.
4 Ma na liomu e vaga moa na kusudato sere maka dou.
Ma na matamu ara ka rerei vaga moa na maomao
ligisana na matsapakapuna na verabau ni Hesbon.
Ma na isumu e rerei dou vaga moa na kusudato ni Lebanon
aia e arokalea bâ i Damaskus.
5 Ma na lovamu e totu paladato vaga moa na Vungavunga Karmel.
Ma na ivumu e sasala me bau angaanga,
ma na rereina e raqâ na matana tinoni atsa moa ti na taovia tsapakae.
6 Igoe niqu udu o uluvao laka mo rerei dou sosongo;
minau au galuve sosongoligo.
7 Igoe o dato goto dou vaga moa na gai na niu
ma na tsutsumu ara ka vaga moa na vuana.
8 Minau sauba kau datovia na niu ia,
ma kau pitsua na vuana.
Ma na tsutsumu ara ka vaga moa na vunguna na vuana uaeni,
ma na mamagomu e sigini dou vaga moa na vuruna na gaviga,
9 ma na mangamu e pui dou vaga moa na uaeni dou laka
e taqetu tsavua na tutubena mangaqu ma na livoqu.
Na Daki
10 Inau nina daki nogo aia, maia e padangao sosongoliau inau,
11 Kiki niqu udu, ko mai ma ka ka vano
ma ka totu sa tana vera tetelo ma ka ka maturu i tana.
12 Ma ka mamata bongibongi ma ka ba morosigira
ti kara tuturiga na dato igira na itai na uaeni,
ma kara taporatsa nogo na latseqira,
me ti kara latse goto igira na gai mutsamutsa.
Mi tana nogo ti inau sauba kau sauvanigo niqu galuve.
13 Igoe niqu udu galugaluve, au tsakosaigira nogo danga na vuana gai mutsamutsa,
mau mologira tana savuna matsapana ka valeda,
gana igoe ko gania.
Visana au pitsu idagira nogo, mara visana au vasini moa pitsugira.
Mi kaita ka ka siginia na vuruna na “mandrake,”
aia e naua ka ka gini vaireingaogi.