32
Penukatu nehe, ywak ywy.
Pezekaiw heze'eg rehe nehe.
Tuwe hepurumu'e haw nuzawy kwaw àmàn nehe.
Àmàn ywy rehe ukyr katu ma'e nehe.
Tuwe heze'eg nuzawy kwaw zuwiri hezuz ma'e rehe uhàz ma'e nehe.
 
Amume'u putar Tupàn Tuweharupi Wiko Ma'e her ikatu haw nehe.
Pemume'u Tupàn Zanezar uhua'u haw nehe.
 
Tupàn Tuweharupi Wiko Ma'e wiko zanepyro har romo.
Ikatuahy a'e. Hemiapo ikatuahy no.
Nuityk kwaw umyrypar wà. Hemiapo ikatu a'e.
Umuàgy'ygatu ikatu 'ymaw. Na'imunar kwaw imuàgà'ym mehe.
 
Nezewe rehe we hemiaihu uzemono ikatu 'ymaw pe wà.
A'e rupi, — Tupàn ta'yr wà, ni'i kwaw teko a'e teko wanupe wà.
Teko ikatu 'ym ma'e iapo har romo wanekon wà. Na'ikatu kwaw wà.
Teko ma'e kwaw katu 'ymar romo wanekon wà.
Nukwaw kwaw ma'e wà.
Nezewe a'e teko wereko Tupàn Tuweharupi Wiko Ma'e a'e wà. Wiko wanu romo a'e.
Tupàn umugakwaw katu a'e teko a'e wà.
A'e peapo teko tetea'u romo a'e. Pemugakwaw a'e no.
 
Pema'enukwaw uzeapo ma'e kwer rehe nehe.
Pema'enukwaw kwehe arer rehe nehe.
— Ma'e uzeapo kwehe mehe, peze penu wanupe nehe.
— Pemume'u uzeapo ma'e kwer kwehe arer nehe,
peze tua'uhez ma'e wanupe nehe.
Tupàn ywate wera'u ma'e umuhàmuhàz teko paw a'e wà.
Omono ywy wanupe pitàitàigatu no.
Umuapyk ma'e ywyzaw nànàn.
Omono amo tupàn wanupe wazar romo pitàitàigatu wà no.
Wexaexak Izaew wemiaihu romo wà.
Zako izuapyapyr wiko Tupàn Tuweharupi Wiko Ma'e hemiruze'eg romo wà.
 
10 Tupàn wexak a'e teko ywyxiguhu rehe. Ukàzym a'e pe wà.
Miar ipuruzukaiwahy ma'e wiko a'e ywyxiguhu rehe wà.
Tupàn uhem wanuwake.
Uzekaiw wanehe wazyra'i wemiamutar katu wera'u zàwe.
11 Wiràhu umu'e umemyr wawewe haw rehe a'e wà.
Upupirar upepo umemyr wapyhyk pà wa'ar mehe.
Nezewegatete Tupàn Tuweharupi Wiko Ma'e uzekaiw wemiaihu wanehe.
12 A'e zutyka'i wexak kar wape ràm wanupe.
Ni amo tupàn nupytywà kwaw wà.
 
13 Tupàn Tuweharupi Wiko Ma'e upyhyk kar ywytyruhu wemiaihu wanupe.
U'u ma'e ko pe har wà. Umur hàir itahu wamyteromo waneko mehe.
Umu'a kar uri 'yw ywy ita tetea'u hereko har rehe.
14 Omono tapi'ak kamykwer wanupe wanemi'u romo.
Omono àràpuhàrànete kamykwer wanupe no.
Omono ho'o kwer ikatu wera'u ma'e wanupe:
àràpuhàràna'yr hawitu ma'e awa ho'o kwer,
àràpuhàràn hawitu ma'e awa ho'o kwer, àràpuhàrànete awa ho'o kwer.
Omono arozràn ikatu wera'u ma'e wanupe.
Omono win ikatu wera'u ma'e wanupe no.
 
15 Teko Tupàn hemixak kwer wiko hemetarer katu ma'e romo wà.
Nezewe rehe we uzàmàtyry'ym Tupàn wà.
Hemetarer katu wà. Waneko haw ikatu. Hurywete wà no.
Nezewe rehe we weityk wapo arer Tupàn wà.
Upuir uzehe uzekaiw ma'e omonokatu har wi wà.
Weityk upyro har wà.
16 Umuwete tupàn a'ua'u wà. A'e rupi umuikwahy kar Tupàn wà.
Umuwete katu tupàn a'ua'u purumuhuhuk ma'e wà.
A'e rupi wikwahy wanupe.
17 Uzuka ma'ea'yr tekwe ikatu 'ym ma'e wanupe wà.
Uzuka ma'ea'yr tupàn a'ua'u wanenataromo wà.
Numuwete pixik kwaw a'e tupàn a'e 'ym mehe wà.
Ipyahu a'e tupàn Izaew wanupe wà.
Waipy nukwaw kwaw wà.
18 Heharaz omonokatu har wi wà.
Weityk u wà. Upuir wapo arer wi wà.
 
19 Tupàn Tuweharupi Wiko Ma'e wexak a'e ma'e iapo mehe wà.
Wikwahy wanupe.
A'e rupi weityk wa'yr wà. Weityk wazyr wà no.
20 — Aityk kwez ihe wà. Aexak putar wanupe uzeapo ma'e ràm nehe kury.
Ta'e wiko teko hereruzar 'ymar romo wà xe.
Wiko hera'yr heze'eg heruzar 'ymar romo wà, i'i wanupe.
21 Umuwete tupàn a'ua'u wanagapaw hemuikwahy kar pà wà.
Herewyrowyroahy wazar tupàn a'ua'u wanehe ihe.
Amono kar putar teko ma'e kwaw par 'ym wanupe ihe wà nehe.
A'e teko umuikwahy kar putar Izaew a'e wà nehe.
Hewyrowyroahy putar amo teko ikàg 'ym ma'e wanehe wà nehe.
22 Hekwahy haw ukaz putar tata zàwe nehe.
Umumaw putar ywy rehe har paw rupi nehe.
Te umàno ma'e kwer wapyta haw wapy putar nehe.
Wapy putar ywytyruhu iwy pe har nehe.
 
23 Amu'ar kar putar iaiw haw wanehe imupytu'u kar 'ym pà nehe.
Akutuk putar ma'erahy tetea'u pupe ihe wà nehe.
24 Ma'uhez haw uzuka putar a'e wà nehe.
Taku haw umumaw putar wà nehe.
Ma'eahy haw umumaw putar wà nehe.
Ni amo numukatu kwaw a'e ma'eahy haw wi wà nehe.
Amono kar putar miar hehaite ma'e wakutyr ihe wà nehe.
Uzàmàtyry'ym putar oho wà nehe.
Amono kar putar mozaiw wakutyr ihe wà nehe no. Uxi'u putar wà nehe.
25 Katu pe wàpuz wi umàno putar oho zeàmàtyry'ymawhu pe wà nehe.
Umàno putar wàpuz me ukyze haw wi wà nehe.
Zauxiapekwer uzuka putar kwàkwàmo wà.
Uzuka putar kuzàwaza wà nehe no.
Uzuka putar kwarearer wà nehe no.
Uzuka putar kuzàtàigwer wà nehe no.
Uzuka putar tua'uhez kwer wà nehe no. Uzuka putar ihya'uhez kwer wà nehe no.
26 Apuner mo ywy nànàn wamuhàmuhàz haw rehe ihe.
Nezewe mehe teko paw heharaz mo wanuwi wà.
27 Aze mo azapo nezewe haw, waàmàtyry'ymar uze'eg urywahyahy mo wanehe wà.
Naputar kwaw nezewe haw ihe.
Hemu'em mo uzeupeupe wanehe wà no.
— Uruityk Tupàn hemiaihu ure wà, i'i mua'u mo wà. Naputar kwaw nezewe haw ihe.
— Tupàn Tuweharupi Wiko Ma'e numumaw kwaw a'e wà, i'i mua'u mo wà.
Naputar kwaw nezewe haw ihe.
 
28 Izaew wiko teko ma'e kwaw par 'ym romo wà.
Nukwaw pixik kwaw ma'e wà.
29 Aze mo wiko ma'e kwaw par romo wà,
— Tupàn zanereityk zaneremiapo kwer rehe a'e, i'i mo wà.
— Uzepyk zanerehe zaneremiapo kwer ikatu 'ygwer ma'e hekuzaromo a'e, i'i mo wà.
30 Màràzàwe tuwe miw uzàn oho pitài wàmàtyry'ymar wi wà.
Mokoz umuzàn kar 10.000 wà.
Uzàn wanuwi wà, ta'e wanehe uzekaiw ma'e weityk a'e wà xe.
Tupàn Tuweharupi Wiko Ma'e ume'eg wemiaihu waàmàtyry'ymar wanupe wà.
 
31 Zaneàmàtyry'ymar wazar tupàn wà,
na'ikàg kwaw Tupàn Zanezar zàwe wà.
Te zaneàmàtyry'ymar umume'u ikàg wera'u haw wà.
32 Iaiw Xotom tawhu pe har wazàwe wà, Komor tawhu pe har wazàwe wà.
Nuzawy kwaw uwà 'yw i'a ma'e wà. I'a kwer na'ikatu kwaw.
Iro. Upuruzuka no.
33 Nuzawy kwaw win mozaiw ipuruzuka haw iapo pyrer wà.
Wenuhem puruzuka haw mozaiw wanuwi win romo iapo pà wà.
 
34 Tupàn ima'enukwaw ma'e wàmàtyry'ymar wanemiapo kwer rehe a'e.
Wàro 'ar ikatu ma'e iko. A'e 'ar mehe uzepyk putar wanehe nehe.
35 Tupàn uzepyk putar nehe. Umekuzar putar nehe.
Ur putar amo 'ar nehe. A'e 'ar mehe iàmàtyry'ymar u'ar putar wà nehe.
Iaiw haw wanehe i'ar haw 'ar uhem iko na'arewahy a'e.
 
36 Tupàn Tuweharupi Wiko Ma'e upuhareko putar wemiaihu wà nehe,
Wakàg 'ymaw hexak mehe wà nehe.
Upyro putar izupe uma'ereko ma'e wà nehe.
Paw rupi weityk a'e 'ym mehe wà.
37 Na'e upuranu putar wemiaihu wanehe nehe.
— Ma'e pe tupàn a'ua'u pezar wanekon wà kury, i'i putar wanupe nehe.
Pezeruzar amo penehe uzekaiw ma'e rehe. Ma'e pe hekon kury.
38 Pezuka ma'ea'yr henataromo pe wà.
Pemono ma'ea'yr wanupe pe wà. Pemono win wanupe.
Tuwe pepytywà ko 'ar rehe a'e wà nehe kury.
Tuwe ur pepyro pà wà nehe no.
 
39 Pe paw rupi nehe, pekwaw ko ma'e nehe. Xo ihe zo aiko Tupàn romo ihe.
Naheta kwaw amo tupàn wà.
Apuruzuka ihe. Apurumuigo kar ihe no.
Apurukutuk no. Apurumukatu no.
Aze hepurapo wer amo ma'e rehe nehe,
ni amo nupuner kwaw hemupytu'u kar haw rehe iapo re wà nehe.
40 Aupir hepo ywak kutyr kury.
Amume'uahy ko ma'e hereko haw rehe ihe kury.
Azapo putar ko ma'e ihe nehe.
41 Amuaime katu putar hetakihe puku heny katu ma'e ihe nehe.
Azypyrog putar ikatu 'ym ma'e iapo har wanehe hezepyk pà nehe.
Azepyk putar heàmàtyry'ymar wanehe nehe.
Azepyk putar herehe iakatuwawahy 'ym ma'e wanehe nehe no.
42 Teko wanuwykwer umupinipinim putar heru'yw nehe.
Hetakihe puku uzuka putar heàmàtyry'ymar a'e wà nehe.
Ni pitài heàmàtyry'ymar nuhem kwaw umàno haw wi wà nehe.
Te heremipyhyk kwer azuka putar ihe wà nehe,
i'i Tupàn.
 
43 Tuwe teko paw umume'u Tupàn hemiaihu wakatu haw wà nehe.
Tupàn uzepyk putar wemiruze'eg wazuka arer wanehe nehe.
Uzepyk putar wàmàtyry'ymar wanehe nehe.
Umunàn putar wemiaihu wanemiapo kwer ikatu 'ym ma'e nehe.
 
44 Moizez a'e, Zuzue Nu ta'yr a'e no, umuzàg a'e zegar haw paw teko wanenataromo a'e wà.
Upaw etea'i Moizez ze'eg awer kury
45 Moizez umumaw Tupàn ze'eg nànàn teko wamu'e haw. 46 Na'e uze'eg wanupe. — Pema'enukwaw katu ma'e nànàn pemu'e awer rehe nehe. — Peruzar Tupàn ze'eg pape rehe imuapyk pyrer paw rupi nehe, peze pena'yr wanupe nehe. 47 — Na'ikatu kwaw, peze zo a'e ze'eg pe nehe. Nan. A'e ze'eg pemuigo kar a'e. Aze peruzar a'e ze'eg nehe, pemumaw putar kwarahy tetea'u ywy na'arewahy penemipyhyk ràm Zotàw yrykawhu ikupe kutyr har rehe peneko pà nehe. 48 A'e 'ar mehe we Tupàn Tuweharupi Wiko Ma'e uze'eg Moizez pe.
49 — Eho ywytyruhu heta haw Amari her ma'e ko Moaw ywy rehe har pe nehe. Ezeupir Nemo ywytyr Zeriko tawhu henataromo har rehe nehe. Ywytyr apyr nereko mehe erexak putar Kànàà ywy nehe. Amono putar a'e ywy teko Izaew izuapyapyr wanupe nehe. 50 Neryky'yr Àràw umàno Or ywytyr rehe a'e. Nezewegatete eremàno putar Nemo ywytyr rehe ne nehe no. 51 Naperuzar katu kwaw heze'eg teko Izaew wanenataromo. Merima 'yzygwar huwake peneko mehe napeiko kwaw muite Kanez tawhu wi. Peiko Zim ywyxiguhu rehe a'e 'ar mehe. A'e pe a'e 'ar mehe nahemuwete kwaw pe pe. 52 A'e rupi xo muite wi erexak putar ywy Izaew wanupe heremimono ràm nehe. Nereixe kwaw ipupe nehe. Nereata kwaw hehe nehe.