27
Zegar haw purutymaw pe har
1 Tupàn Tuweharupi Wiko Ma'e umume'u ko ma'e ihewe kury.
2 — Awa ta'yr, Emume'u zegar haw purutymaw pe har Xir pe nehe. 3 A'e tawhu yryhu iwyr tuz a'e. Ipupe har ume'eg ma'e teko yryhu iwyr har nànàn wà. Ume'eg kar ma'e wanuwi wà no. — Zanezar Tuweharupi Wiko Ma'e umume'u ko ma'e iko a'e, ere a'e tawhu pe nehe.
— Xir, nerurywete ta'e nepuràg eteahy tuwe ne xe.
4 Yryhu uzeapo nereko haw romo.
Neapo arer neapo kanuhu ipuràg eteahy ma'e zàwenugar romo wà.
5 Ukixikixi pin 'yw Eremon ywytyr rehe har neapoapo pà wà.
Uzapo amo ywyràkàxigyw Irimano ywy rehe har nekanuhu izyta romo wà.
6 Upyhyk ywyra kawar her ma'e Màxà pe har uze'ypykuz haw romo iapo pà wà.
Umuhym pin 'yw Xip yrypypo'o pe har ata haw nerehe har romo iapo pà wà.
Nemupuràg marupi pupe wà no.
7 Umuwywyk irin imuma'ema'e pyrer Ezit ywy rehe har nepànuhu ywytu henataromo nereraha haw romo iapo pà wà.
Teko muite har ukwaw izar a'e pànuhu hexak mehe wà.
Umuwywyk pàn hekuzar katu ma'e neràpuzràna'i iapo pà àmàn wi nemonokatu pà wà.
Teko uzapo a'e pàn ipihun wewer ma'e Xip yrypypo'o pe wà.
8 O Xir tawhu, nepupe har wiko a'e kanuhu heruata har romo wà. Ukwaw katu heruata haw wà.
Xitom tawhu pe har wà, Aruwaz tawhu pe har wà no, wiko ze'ypykuz haw pupe a'e kanuhu heruata har romo wà.
9 Awa Mirimo tawhu pe har wiko ywyrapinar a'e kanuhu pupe har romo wà.
Amo umu'e katu a'e awa ywyrapinaw rehe wà.
Kanuhu heruata har kanuhu yryhu rehe har nànànar ume'eg kar ma'e ime'egaw pe wà.
10 Awa ywy nànànar wiko zauxiapekwer ipupe wà: Pezi rehe arer wà, Iri rehe arer wà, Irim rehe arer wà. Umuzaiko umimaw wàkàg imimaw rehe we neràpuz me wà. Upyhyk nepuner haw newe wà. Upyhyk ywy tetea'u tuwihaw ikàg wera'u ma'e romo nemuigo kar pà wà no. 11 Zauxiapekwer Aruwaz parer upyta ume'e ma'e romo nepàrirogawtàtà kupe pe wà. Zauxiapekwer Kamaz parer ume'egatu neràpuzaiha rehe wà. Umuzaiko u'yw wi uzeàmimaw neywyok rehe wà. A'e ae nemupuràg eteahy wà.
12 Ereme'eg ma'e tetea'u Epàn ywy rehe. Umur ma'e newe hekuzaromo wà: itaparat, itaper, itaetàn, itaxum. 13 Ereme'eg ma'e ywy nànàn: Kere ywy, Tumaw ywy, Mezek ywy. Umur uma'ereko e ma'e newe hekuzaromo wà. Umur ma'e itamorog iapo pyrer newe wà no. 14 Ereme'eg nema'e kawaru tuweharupi har wanekuzaromo, kawaru zeàmàtyry'ymawhu pe har wanekuzaromo no, kàwàruràn Mete-Togarima pe har wanekuzaromo no. 15 Teko Hoz pe har ume'eg ma'e newe wà. Ereme'eg ma'e teko yryhu iwyr har wanupe. A'e teko umur marupi hekuzaromo wà. Umur ywyraun marapi her ma'e newe wà no. 16 Teko Xir ywy rehe har ume'eg kar nema'e tetea'u wà no, neremiapo kwer tetea'u wà no. Omono ma'e newe hekuzaromo wà: ita hekuzar katu ma'e huwyahy ma'e emeraw her ma'e, pàn ipihun wewer ma'e, pàn imuma'ema'e pyrer, pàn irin ikatuahy ma'e, ita koraw her ma'e, ita hekuzar katu ma'e humi her ma'e. 17 Zuta ume'eg kar nema'e. Izaew no. Omono ma'e newe hekuzaromo wà: arozràn Minit pe har, hàir, uri kawer, taz zàwenugar. 18 Namaz tawhu ume'eg kar nema'e. Nema'e tetea'u hekuzaromo umur ma'e wà: win Ewmon parer, àràpuhàràn hawitu ma'e hawer Xar parer. 19 Uzaw pe har werur ma'e newe nema'e hekuzaromo wà: win, itaper iapoapo katu pyrer, taz zàwenugar. 20 Nenà pe har umur kawaru pykaw newe nema'e hekuzaromo wà. 21 Àràw izuapyapyr wà, tuwihaw Kenar pe har wà no, umur ma'e newe nema'e hekuzaromo wà no: àràpuhàràna'yr hawitu ma'e, àràpuhàràn hawitu ma'e, àràpuhàrànete. 22 Ma'eme'egar Xama pe har wà, Hama pe har wà no, umur ma'e newe nema'e hekuzaromo wà: taz zàwenugar ikatu wera'u ma'e, ita hekuzar katu ma'e, or. 23 Amo tawhu ume'eg ma'e newe wà, ume'eg kar ma'e newi wà no: Àrà, Kane, En, ma'eme'egar Xama pe har wà, Axur, Kiwmaz. Paw rupi uzapo ma'eme'egaw nerehe we wà. 24 Ume'eg kamir hekuzar katu ma'e newe wà. Ume'eg topoz hekuzar katu ma'e newe wà no, pàn ipihun wewer ma'e, pàn imuma'ema'e pyrer, pàn iànàm ma'e ywy ipykaw hexakaw tetea'u hereko har, kyhàhàm, kyhàhàm iànàm ma'e ipupe katu pyrer.
25 Omono'og kanuhu tetea'u nema'e heraha pà newe wà.
Xir, nerezuawy kwaw kanuhu yryhu rehe har.
Kanuhu ma'e ipuhuz ma'e tetea'u heraha har.
26 Uze'ypykuz ma'e nerehe we har yryhu rehe muite nereruata mehe,
ywytu kwarahy heixe haw wi ur ma'e nemuzeapypyk kar muite ywy wi a'e.
27 Ma'e neremime'eg ràm hekuzar katu ma'e paw,
nereruata har yryhu rehe wata ma'e paw wà,
ywyra pinar kanuhu pupe har paw wà, ma'eme'egar kanuhu pupe har paw wà,
zauxiapekwer kanuhu pupe har paw wà,
paw rupi ukàzym yryhu pupe wà,
kanuhu izeapypyk mehe wà.
28 Ywy rehe har wenu
kanuhu heruata har 'y pupe wamàno mehe wà.
29 Teko weityk kanuhu paw rupi wà kury.
Kanuhu heruata har paw oho ywy pe wà.
30 Paw rupi uzai'oahy nerehe wà.
Umur ywyku'i wàkàg rehe tanimuk rehe uzerezerew pà wà,
uzemumikahy haw hexak kar pà wà.
31 Nerehe uma'enukwaw mehe upin wàkàg wà.
Umunehew ma'eryru pàn iànàm ma'e iapo pyrer ukamir romo wà.
Uzai'o upy'a iro ma'e rehe we wà.
32 Umuzàg ko zegar haw purumuzemumikahy kar ma'e newe wà.
— Mo upuner Xir ài.
Upyta uze'eg 'ym pà yryhu myter pe 'y iwy pe kury.
33 Nema'e yryhu nànàn heraha mehe,
eremono ma'e teko tetea'u wamurywete kar pà.
Nema'e hekuzar katu ma'e imono mehe
eremuigo kar tuwihawete ywy rehe har hemetarer katu ma'e romo ne wà.
34 Ko 'ar rehe ereiko yryhu iwype kury.
Erezeapypyk eho yryhu ohoete ma'e pupe.
Nema'e paw rupi, newe uma'ereko ma'e paw rupi wà no,
ukàzym yryhu pupe nerehe we wà.
35 Yryhu iwyr wiko ma'e paw ukyzeahy uzeapo ma'e kwer hexak ire wà. Te tuwihawete ukyzeahy wà. Teko upuner wakyze haw hexakaw rehe wanuwa rehe wà. 36 Erepaw tuwe. Ma'eme'egar ywy nànànar ukyzeahy wà. — Uzeapo iaiw ma'e Xiro pe. Aipo uzeapo putar nezewegatete haw zanewe nehe no, i'i uzeupeupe ukyze pà wà.