31
Ezit nuzawy kwaw ywyràkàxigyw a'e
1 Uruikuwe ipyhyk pyrer romo amo ywy rehe ure. 11 haw kwarahy rehe 3 haw zahy rehe pitài haw 'ar mehe Tupàn Tuweharupi Wiko Ma'e uze'eg wi ihewe kury.
2 — Awa ta'yr, Emume'u ko ma'e Ezit wanuwihawete pe nehe, hemiruze'eg wanupe nehe no.
— Erepuner katu ne.
Ma'e wiko nezàwe.
3 Ereiko ywyràkàxigyw Irimano ywy rehe har ài.
Neràkàgwer ipuràg eteahy. Tynehem huwer pupe.
Ereiko ywyra aiha ma'e ài. Erehem ywak rehe.
4 Heta 'y netua'u mehe.
Heta 'y ywy iwy pe har newe no.
Teko omono 'y ywyra henaw pe wà.
Umuyryk kar yrykaw ywyra ka'a pe har nànàn wà.
5 Heta 'y izupe.
A'e rupi ywyràkàxigyw aiha wera'u amo ywyra wi.
Hàkà uhua'u wà. Ipukua'u wà no.
6 Wiràmiri xiroxirogatu hexakaw hereko har uzapo waipy hàkà rehe wà.
Miar hehaite ma'e imemyr iwype wà no.
I'àgwer rehe teko ywy nànànar upytu'u wà.
7 Ipuràg eteahy a'e ywyra.
Aiha katu. Ipuku hàkà wà.
Hapo uhem oho yrykaw ywy iwy pe har pe wà.
8 Ni amo ywyràkàxigyw Tupàn ima'etymaw pe har na'ikatuahy kwaw a'e ywyra ài a'e wà.
Ni amo ywyra Xipere pe har nahàkà kwaw izàwe wà.
Ni amo pi 'yw ka'a pe har nahàkà kwaw izàwe wà.
Ni amo ywyra Tupàn ima'etymaw pe har ipuràg eteahy a'e ywyra ài a'e wà.
9 Ihe amupuràg eteahy nezewe ihe.
Amono hàkà tetea'u izupe no.
Tupàn ima'etymaw En her ma'e pe
ywyra paw hewyrowyroahy hehe wà.
10 Ihe pezar Tuweharupi Wiko Ma'e amume'u putar uzeapo ma'e ràm ihe nehe kury. Itua'u a'e, te uhem ywàkun pe. Itua'u mehe umume'ume'u ikatu wera'u haw no. 11 A'e rupi aityk a'e ywyra. Aeityk kar putar amo ywy rehe har wanuwihawete pe nehe. Iaiw a'e. A'e rupi a'e tuwihawete uzapo putar iaiw ma'e izupe nehe no. 12 Amo ywy rehe har ma'erahy ipuraraw har weityk putar wà nehe. Wezar putar wà nehe no. Hàkàgwer imonohok pyrer u'ar putar ywyàpyznaw nànàn nehe, ywytyruhu a'e ywy rehe har nànàn nehe no. Teko paw i'àgwer rehe wiko ma'e oho putar a'e wi wà nehe. 13 Wiràmiri wapyk putar ywyra u'ar ma'e kwer rehe wà nehe. Miar ipuruzukaiwahy ma'e wata putar hàkàgwer rehe wà nehe. 14 Ko 'ar henataromo ni amo ywyra na'itua'u kwaw a'e ywyra ài wà nehe. Nuhem kwaw ywàkun pe wà nehe. Teko upuner 'y tetea'u imono haw rehe izupe wà nehe. Nezewe rehe we na'itua'u kwaw izàwe wà nehe. Paw rupi umàno putar teko umàno ma'e ràm ài wà nehe. Uzemono'og putar umàno ma'e kwer wanehe we wapyta haw pe wà nehe.
15 Zanezar Tuweharupi Wiko Ma'e umume'u ko ma'e.
— Amo 'ar mehe a'e ywyra wezyw putar umàno ma'e kwer wapyta haw pe nehe. A'e 'ar mehe azupyk kar putar 'y ywy iwype har pe nehe, zemumikahy haw hexak kar pà nehe. Amupytu'u kar yrykawhu wawyryk ire ihe wà. Heta tetea'u yrykaw wà. Namuyryk kar kwaw a'e 'ar mehe ihe wà nehe. Ywyra umàno. A'e rupi arur putar ipytunahy haw ywytyr Irimano ywy rehe har wanehe ihe nehe. Amuxinig putar ywyra ka'a pe har paw ihe wà nehe no. 16 Umàno ma'e kwer wapyta haw pe imono kar mehe nehe, i'ar haw iànoànogaw umuryryryryz kar putar ywy paw wà nehe. Ywyra En rehe har paw wà nehe, Irimano rehe har paw wà nehe no, ipuràg eteahy wera'u ma'e wà nehe, 'y tetea'u hereko har wà nehe no, ywy iwy pe har wà nehe no, hurywete putar i'ar awer rehe wà nehe. 17 Oho putar hupi umàno ma'e kwer wapyta haw pe wà nehe. Uzemono'og putar u'ar ma'e kwer wanehe we wà nehe. I'àgwer rehe wiko ma'e kwer uhàuhàz putar ywy nànàn wà nehe.
18 A'e ywyra a'e, wiko Ezit ywy rehe har wanuwihawete romo a'e. Wiko hemiruze'eg teko paw wà no. Ni ywyra En rehe har aiha katu izàwe wà. Ipuràg eteahy a'e no. Ko 'ar rehe wezyw putar umàno ma'e kwer wapyta haw pe ywyra En rehe arer wanehe we wà nehe. Uzemono'og putar uzeruzar 'ym ma'e wanehe we wà nehe. Uzemono'og putar zeàmàtyry'ymawhu pe umàno ma'e kwer wanehe we wà nehe no. Ihe pezar Tuweharupi Wiko Ma'e aze'eg kwez kury.