8
Zezuz wiko tuwe zanepytywà har romo Tupàn huwa rupi a'e
1 Azeharomoete urumume'u Zezuz heko haw uruiko peme ure kury, xaxeto romo heko haw peme ure kury. Zanepytywà har romo hekon a'e. Wapyk in ywate Tupàn iawyze har rehe. Ikàg tuwe Tupàn zàwegatete kury. 2 Xaxeto wanuwihaw ikàg wera'u ma'e romo hekon. Naheta pixik kwaw ikatu 'ymaw a'e pe. Kwehe mehe ywy rehe teko uzapo tàpuzràn a'e wà, Tupàn imuapyk pà nezewe a'e wà. Tupàn wiko oho ipupe a'e. Nuiko kwaw a'e pe ko 'ar rehe kury. Zezuz wiko Tupàn hàpuzuhuete pe kury, hàpuzuhu rehe uzekaiw pà kury. Tupàn uzapo a'e tàpuz ko 'ar rehe har. Awa nuzapo kwaw wà.
3 Xaxeto paw rupi a'e wà, omono ma'e Tupàn pe wà. Uzuka ma'ea'yr huwa rupi wà. A'e rupi zanepytywà har Zezuz a'e no, omono ma'e izupe a'e no. 4 Aze mo ywy rehe hekon, nuiko iwer mo xaxeto romo. Ta'e heta amo xaxeto xe a'e wà xe. Omono ma'e Tupàn pe wà, zutew wanàmuzgwer ze'eg rupi wà. 5 Zezuz a'e, xaxeto ikàg wera'u ma'e romo hekon a'e. Xaxeto ko ywy rehe har a'e wà, uzeagaw izàwe wiko pà a'e wà. Wama'ereko haw nuzawy kwaw ima'ereko haw ywate har wà. Nezewegatete Moizez a'e no, uzypyrog Tupàn hàpuz iapo pà a'e no. Iapo 'ym mehe Tupàn uze'eg izupe. — Ywytyr rehe nereko mehe aexak kar ma'e ywate har newe ihe, i'i izupe. Ezapo heràpuz hagapaw nehe, heràpuzete zàwenugar nehe, i'i izupe. A'e rupi Tupàn hàpuz ko ywy rehe har a'e, nuzawy kwaw hàpuz ywate har hagapaw a'e. 6 Xaxeto ko ywy rehe har a'e wà, upytywà teko a'e wà. Zezuz upytywà tuwe teko a'e wà. Ta'e weraha uzehe uzeruzar ma'e a'e wà xe, ze'eg ipyahu ma'e rupi a'e wà xe. Ta'e ze'eg ipyahu ma'e ikatu wera'u ze'eg kwehe arer wi a'e xe. Ta'e ze'eg ipyahu ma'e umume'u Tupàn hemiapo ràm ikatu wera'u ma'e zanewe a'e xe. 7 Aze mo ze'eg kwehe arer ikatu tuwe a'e, aze mo uhyk tuwe a'e, a'e mehe mo Tupàn numume'u iwer mo ze'eg ipyahu ma'e purupe a'e kury. 8 Tupàn wexak wemiaihu wanemiapo kwer ikatu 'ym ma'e a'e. A'e rupi uze'eg nezewe wanupe a'e.
— Uhem putar amo 'ar a'e nehe.
A'e 'ar mehe amume'u putar heze'eg ipyahu ma'e ihe nehe, heremiapo putar haw ihe nehe,
Izaew izuapyapyr wanupe ihe nehe,
Zuta izuapyapyr wanupe ihe nehe, i'i wanupe.
9 A'e ze'eg heremimume'u ràm nehe, uzawy putar heze'eg kwehe arer nehe.
Uzawy putar waipy wanupe heremimume'u kwer nehe.
A'e 'ar mehe apyhyk waipy wapo rehe ihe wà,
Ezit ywy wi wapyro pà waneraha pà ihe wà.
Noho kwaw zepe heze'eg rupi wà.
Nuweruzar katu kwaw heze'eg wà.
A'e rupi nazekaiw katu kwaw wanehe ihe, i'i Zanezar.
10 — Amume'u wi putar amo ae heze'eg Izaew izuapyapyr wanupe ihe nehe kury,
'ar uhem ma'e ràm rehe ihe nehe kury. Akwaw kar putar heze'eg wanupe nehe.
Aze teko umuapyk ze'eg pape rehe nehe, nukàzym kwaw nehe.
Nezewegatete amuapyk putar heze'eg wapy'a pe nehe.
Ipureruzar wer hehe wà nehe.
Naheharaz kwaw izuwi wà nehe.
Aiko putar wazar romo ihe nehe no.
Wiko putar heremiruze'eg romo wà nehe no.
11 — Amu'e putar herapi har Tupàn ze'eg rehe ihe nehe,
ni'i kwaw teko wà nehe, wapi har wanupe wà nehe.
— Amume'u putar Tupàn ze'eg heànàm wanupe nehe,
a'e rupi ukwaw putar Tupàn a'e wà nehe, ni'i kwaw teko wà nehe.
Ta'e hekwaw putar tuwe paw rupi wà nehe xe.
Ikàg wera'u ma'e hekwaw putar wà nehe no.
12 Apuhareko katu ihe wà nehe.
Nazepyk kwaw wanehe nehe, wanemiapo kwer rehe nehe.
Nahema'enukwaw kwaw wanemiapo kwer ikatu 'ym ma'e rehe nehe,
i'i Tupàn purupe.
13 Kwehe nehe Tupàn umume'u uze'eg ipy teko wanupe a'e. Teko noho kwaw a'e ze'eg rupi a'e wà. Na'e umume'u ze'eg ipyahu ma'e wanupe. Nuweruzar kar kwaw uze'eg kwehe arer zanewe kury. Xiruzar ze'eg ipyahu ma'e zaiko kury. Naxiruzar kwaw ze'eg kwehe arer kury. Aze zanekamir izemàner nehe, xityk nehe. Nezewegatete naxiruzar kwaw ze'eg kwehe arer kury. Ta'e xiriko ze'eg ipyahu ma'e kury xe.