5
Nemora, Marak zegar haw
1 A'e 'ar mehe Nemora a'e, Marak Aminoàw ta'yr a'e no, umuzàg 'aw zegar haw Tupàn pe wà.
2 Ikatuahy Tupàn Tuweharupi Wiko Ma'e a'e.
— Xiàmàtyry'ym teko ikatu 'ym ma'e wà nehe, i'i teko wà.
A'e rupi uzemono'og tuwihawete hehe we hurywete romo wà.
3 Pezeapyaka katu nehe, tuwihawete wà. Peme'egatu nehe, tuwihawete wà.
Azegar putar Tupàn pe nehe. Azegar putar hehe nehe.
Azupy putar hexi'àm henataromo nehe,
Tupàn Izaew wazar henataromo nehe.
4 Tupàn Tuweharupi Wiko Ma'e, ywytyr Xeir ywy rehe har wi nehem mehe,
Enom ywy wi nezur mehe,
Uryryryryz katu ywy.
Ukyukyr katu àmàn 'y tetea'u u'ar ywàkun wi.
5 Uryryryryz ywytyr Tupàn Tuweharupi Wiko Ma'e henataromo wà,
Xinaz ywytyr izar henataromo wà,
Tupàn Izaew wazar henataromo wà.
6 Xagar Anat ta'yr heko mehe,
Zaew heko mehe, naheta kwaw wata ma'e pe rupi wà,
ta'e wata ma'e wata amo ae pe imim pyrer rupi a'e wà xe.
7 Tawhu Izaew ywy rehe har pe naheta kwaw teko wà.
Teko nuiko kwaw tawhu pupe wà.
Ne Nemora ne, xo nezur ire zo teko wata pe rupi wà, wiko tawhu pe wà.
Erezur Izaew wahy romo ne.
8 A'e 'ym mehe Izaew wexaexak amo ae tupàn a'ua'u uzar romo wà.
A'e rupi heta zeàmàtyry'ymaw ko ywy rehe.
A'e 'ar mehe heta 40 miw zauxiapekwer Izaew wainuromo wà.
Naheta kwaw ni pitài purukutukaw wanupe wà.
Naheta kwaw ni pitài u'yw wi wazemimaw wanupe wà.
9 Herurywete Izaew wanuwihaw wanehe ihe.
Herurywete zauxiapekwer ipuruàmàtyry'ym wer ma'e wanehe ihe no.
Azeharomoete ikatuahy Tupàn Tuweharupi Wiko Ma'e a'e.
10 Pe zumen xig ma'e ku'az wata ma'e pe, peze'eg hehe nehe.
Peapyk peiko pekawaru kupe har rehe.
Pe upy rehe wata ma'e pe no,
11 Pezeapyaka katu 'yzygwar izywyr uzegar ma'e wanehe nehe.
Tupàn Tuweharupi Wiko Ma'e rehe uze'eg waiko wà,
Iàmàtyry'ym arer waneityk awer rehe uze'eg waiko wà.
Izaew wanehe uze'eg waiko wà,
wàmàtyry'ym arer waneityk awer rehe uze'eg waiko wà.
A'e rupi teko Tupàn hemiaihu a'e wà kury, wezyw weko haw tawhu pe a'e wà kury.
12 Eme'e nehe, Nemora. Eme'e kury. Eme'e nehe. Eme'e kury.
Emuzàg amo zegar haw kury.
Epu'àm kury, Marak Aminoàw ta'yr.
Eraha neàmàtyry'ymar ne wà nehe,
eraha neremityk kwer ne wà nehe.
13 Awa wikuwe ma'e oho uwihaw waneko haw pe wà.
Teko Tupàn hemiaihu werur awa ikàg ma'e Marak pe wà.
Uzemuàgà'ym zeàmàtyry'ymaw pe oho àwàm rehe wà.
14 Eparai waiwy wi wanur wà,
Ywy ywytyr wamyter pe har pe wanuwi wà.
Mezàmi izuapyapyr ur a'e wà no,
Neremiaihu wanupi a'e wà no.
Wanuwihaw wezyw Makir wi wà.
Waneruze'egar wezyw Zemurom izuapyapyr waiwy wi wà.
15 Ixakar izuapyapyr wanuwihaw oho Nemora rupi wà.
Azeharomoete Ixakar izuapyapyr oho wà. Oho Marak a'e no.
Oho ywy ywytyr wamyter pe har pe wà.
Humen izuapyapyr a'e wà, Uzemuza'aza'ak a'e wà.
Uze'eg ahyahy uzeupeupe wà. A'e rupi noho kwaw wà.
16 Màràzàwe tuwe upyta a'e pe àràpuhàràn wainuromo wà.
Aipo ipuranu wer àràpuhàràn wanehe uzekaiw ma'e wanehe wà,
waneimaw wanenoz mehe wà.
Azeharomoete Humen izuapyapyr uzemuza'aza'ak a'e wà no.
Uze'eze'eg ahyahy uzeupeupe wà. A'e rupi noho kwaw wà.
17 Kaz izuapyapyr a'e wà,
upyta yrykaw Zotàw iwyr kwarahy ihem haw kutyr har rehe a'e wà.
Nà izuapyapyr wà, màràzàwe tuwe upyta weko haw pe wà.
Azer izuapyapyr upytu'u wata re yryhu iwyr wà.
Upyta a'e pe ywyxiguhu rehe wà.
18 Zemurom izuapyapyr a'e wà, Napitari izuapyapyr a'e wà no,
Oho zeàmàtyry'ymaw pe wà.
Upuner mo umàno haw rehe wà.
19 Tuwihawete ur Tanak pe wàmàtyry'ymar wazuka pà wà,
uhem Mezin yrykaw huwake wà.
Kànàà izuapyapyr wanuwihawete uzàmàtyry'ym wà.
Nupyro kwaw temetarer wàmàtyry'ymar wanuwi wà.
20 Te zahytata wà no, uzàmàtyry'ym wà no,
ywak rehe wata mehe wà no. Uzàmàtyry'ym tuwihawete Xi wà.
21 Yrykaw Kizom tynehem 'y pupe a'e.
Weraha Izaew waàmàtyry'ymar wazuka pà a'e wà.
Yrykawhu kwehe arer a'e, Kizom her ma'e a'e.
Ata putar nehe, Ata putar hekàgaw rupi nehe.
22 Na'e kawaru uzàuzàn a'e wà.
Upyropyrog ywy a'e wà.
23 Pemono ze'egaiw Meroz tawhu pe har wanehe nehe,
i'i Tupàn heko haw pe har.
Pemume'uahy uzeapo ma'e ràm iaiw ma'e wanupe nehe,
Pezapo kar iaiw ma'e Tupàn pe nehe, a'e tawhu pe har wanehe pezepyk pà nehe.
Ta'e nur kwaw Tupàn ipytywà pà wà xe.
Zauxiapekwer a'e pe har nur kwaw zeàmàtyry'ymaw pe Tupàn ipytywà pà wà xe,
i'i Tupàn heko haw pe har.
24 Zaew Emer Kene izuapyr hemireko a'e,
Hurywete wera'u tuwe amogwer kuzà wanuwi a'e.
Hurywete wera'u amogwer kuzà tàpuzràn pupe wiko ma'e wanuwi a'e.
25 Xi wenoz 'y izupe. Omono ma'e kamykwer izupe a'e.
Werur ikawer izupe kawaw puràg eteahy ma'e pupe.
26 Upyhyk a'e ywyra'i tàpuzràn ikokaw haime katu ma'e opo pupe.
Upyhyk ita uka haw opo inugwer pupe.
Ukutuk Xi a'e, iàkàg ika pà.
Ukutuk iàkàg ipei'ài'àg pà a'e no.
27 U'ar upenàràg rehe wapyk pà.
U'ar ywy rehe uzerew pà.
Wapyk upenàràg rehe ipy huwake.
U'ar ywy rehe uzerew pà.
Umàno ywy rehe u'ar mehe.
28 Xi ihy ume'e wàpuz ukenaw rupi a'e.
Ume'egatu ukenaw rupi a'e.
Màràzàwe tuwe ywyramawa hememyr herur har nuhem kwaw a'e.
Màràzàwe tuwe iàrew iko a'e.
Màràzàwe tuwe heimaw kawaru wata waiko mewe katu a'e wà,
i'i ihy uzeupe.
29 Hehe we har ma'e kwaw wera'u har uze'eg izupe wà.
Umume'u wi waze'eg wanupe no.
30 Umuza'aza'ak ma'e wemipyhyk kwer waiko wà.
Zauxiapekwer upyhyk kuzàwaza waiko uzeupe pitàitàigatu wà.
Upyhyk mokoz kuzàwaza waiko uzeupe pitàitàigatu wà.
Omono kamir ikatuahy ma'e waiko Xi pe wà.
Pàn imupuràg eteahy pyrer omono putar tuwihawete hemireko pe wà,
i'i ihy pe wà.
31 Ne Tupàn Tuweharupi Wiko Ma'e ne. Neàmàtyry'ymar umàno nezewe wà.
Neamutar har nemyrypar a'e wà,
uhyape katu kwarahy heny kwer ihem mehe har ài a'e wà.
A'e re upaw zeàmàtyry'ymaw kury.
Umumaw 40 kwarahy katu haw rupi zeàmàtyry'ym 'ym pà wà.