10
Tupàn a'ua'u wamuwete haw, Tupànete imuwete haw no
Teko Izaew izuapyapyr wà. Peinu Tupàn Tuweharupi Wiko Ma'e ze'eg peme imur pyrer nehe kury. — Pezapo zo amo ywy rehe har wanemiapo nehe.
Ipytuhegatu ma'e hexak pyr 'ym
ywak rehe izexak kar mehe wà.
Pepytuhegatu zo hexak mehe nehe.
Watupàn wamuwete haw nuzawy kwaw heityk pyrer.
Omonohok ywyra ka'a pe wà.
Na'e ipuràg ma'e iapo har upyhyk utakihe inugwer iapo haw rehe we. Na'e ukixikixi a'e ywyra tupàn a'ua'u iapo pà.
Na'e umupuràg parat pupe or pupe.
Umupu'àgatu itaxu pupe.
Nezewe tupàn a'ua'u nuzepei'ài'àg kwaw.
Agwer tupàn a'ua'u nupuner kwaw uze'egaw rehe wà.
Nuzawy kwaw awa hagapaw wiràmiri imukuhem kar har pipin hezuz haw rehe har wà.
Teko upir heraha pà wà, ta'e nupuner kwaw wata haw rehe wà xe.
Pekyze zo wanuwi nehe.
Nupuner kwaw ikatu 'ym ma'e iapo haw rehe wà.
Nupuner kwaw ikatu ma'e iapo haw rehe wà no, i'i Tupàn.
O Tupàn Tuweharupi Wiko Ma'e. Naheta kwaw amo nezewe nugar wà.
Nekàga'u no.
Nerer upuner wera'u no.
Mo nuzeruze'eg kwaw nerehe wà nehe,
o ywy nànànar wanuwihawete.
Tuwe teko paw uzeruze'egatu nerehe wà nehe.
Naheta kwaw amo ma'e kwaw katu har
nezàwenugar ywy nànàn wà.
Ma'e kwaw katu har ywy nànànar wiko ma'e kwaw 'ymar romo wà.
Iranaiwahy paw rupi wà. Aipo tupàn a'ua'u ywyra iapo pyrer upuner wamu'e haw rehe amo ma'e rehe wà.
Umupuràg a'e tupàn a'ua'u parat Epàn ywy wi herur pyrer pupe wà, itazu or Upaz ywy wi herur pyrer pupe wà no.
Xo ipuràg ma'e iapo har uzapo a'e ma'ereko haw wà.
Umunehew hopoz ipiràg wewer ma'e wanehe wà. Umunehew hopoz ipiràg ma'e wanehe wà no.
Pàn iapo haw ikwaw katu har uzapo hopoz wà.
10 Tupàn Tuweharupi Wiko Ma'e wiko Tupàn Azeharomoete har romo a'e.
Wiko Tupàn Wikuwe Ma'e romo, Umàno 'Ym Ma'e romo no.
Tupàn Tuweharupi Wiko Ma'e ikwahy mehe ywy uryryryryz a'e.
Teko ywy rehe har nupuner kwaw ikwahy haw rehe wà.
11 Peze'eg nezewe teko ywy rehe har wanupe nehe.
— Tupàn umumaw putar
tupàn ywy iapo 'ymar wà nehe, ywak iapo 'ymar wà nehe.
Ukàzym putar ywy wi paw rupi wà nehe.
Zegar haw Tupàn imuwete haw
12 Tupàn Tuweharupi Wiko Ma'e uzapo ywy upuner haw rupi.
Uma'e kwaw katu haw pupe uzapo ywy paw rupi.
Uma'e kwaw paw pupe upupirar ywak pàn teko izewànaw ài.
13 Aze Tupàn uze'eg,
'y ywak rehe har okororo zàwàruhu ài.
Umuzeupir kar ywàkun ywy iahykaw rehe.
Uzapo àmàn iweraw paw.
Umuhem kar ywytu imonokatu haw wi.
14 Henataromo teko paw wiko iranaiw ma'e romo wà, ma'e kwaw par 'ym romo wà.
Ipuràg ma'e iapo har paw imaranugar wemiapo kwer tupàn a'ua'u wanehe wà.
Ta'e nuiko kwaw Tupàn azeharomoete har romo wà xe.
Nuikuwe kwaw wà.
15 Heityk pyràm romo wanekon wà. Wiko purupe temu'emaw romo wà.
Tupàn Tuweharupi Wiko Ma'e ur putar wanehe uzepyk pà nehe. A'e 'ar mehe umumaw putar a'e tupàn a'ua'u a'e wà nehe.
16 Tupàn Zako izar nuiko kwaw wazàwe a'e.
A'e ae uzapo ma'e paw rupi a'e.
Wexaexak Izaew izuapyapyr wemiaihu romo wamuigo kar pà a'e.
Tupàn Tuweharupi Wiko Ma'e Upuner Wera'u Ma'e her romo a'e.
Tupàn omono kar hyahy teko waiwy wi wà
17 Zeruzarez pe har wà, peàmàtyry'ymar umàmàn tawhu peneko haw izywyr a'e wà kury.
Pemono'og pema'e peata àwàm rehe har nehe.
18 Ta'e Tupàn Tuweharupi Wiko Ma'e
pemuhem kar putar ko ywy wi a'e nehe xe.
Nezewe mehe pezypyrog putar ma'e ikwaw pà nehe.
Ihe Tupàn Tuweharupi Wiko Ma'e aiko ko ma'e imume'u har romo ihe.
 
19 Teko Zeruzarez pe har uhapukaz wà.
— Urekutuk urekixi pà wà, urumàno etea'i kury, i'i wà.
— Urekixi awer na'ike'e wer kwaw.
— Urupuner agwer ma'e rehe nehe, uru'e zepe. Nurupuner kwaw.
20 Umumaw putar ureràpuzràn wà nehe.
Ureràpuzràn ihàm ohok a'e.
Urera'yr uhem oho wà.
Paw rupi oho xe wi wà.
Nupyta kwaw teko ureràpuzràn imupu'àm wi àràm wà.
Naheta kwaw amo pànuhu imuzaiko àràm wà no, i'i wà.
21 Awazar waze'eg wanupe ihe.
— Tuwihaw wiko iranaiw ma'e romo wà.
— Exak kar urerape ràm urewe nehe, ni'i kwaw Tupàn pe wà.
A'e rupi u'ar wà.
A'e rupi zauxiapekwer umuhàmuhàz zaneànàm a'e wà no.
22 Pezeapyaka katu nehe. Uhem ze'eg herur pyrer kwez kury.
Teko amo ywy kwarahy heixe haw awyze har kutyr har uzemuàgà'ymahy waiko amo ma'e rehe wà.
Zauxiapekwer a'e wi ur ma'e ràm uzapo putar tawhu Zuta ywy rehe har ywyxiguhu romo a'e wà nehe,
awarahu waneko haw romo a'e wà nehe, a'e wanupe.
Zeremi uze'eg Tupàn pe teko wanehe a'e
23 O Tupàn Tuweharupi Wiko Ma'e. Akwaw ko ma'e ihe.
Teko nuiko kwaw weko àwàm izar romo wà.
Ni amo nupuner kwaw ma'e weko àwàm rehe imuzeapo kar haw rehe wà.
24 O Tupàn Tuweharupi Wiko Ma'e, emu'e ureànàm ne wà nehe.
Ezepykahy zo wanehe nehe.
Ezepyk zo urerehe nekwahy mehe nehe.
Aze mo erezepyk urerehe nekwahy mehe, uremumaw pe mo paw rupi.
25 Ezakook nekwahy haw ywy nànànar nemuwete 'ymar wanehe nehe, teko nereitykar wanehe nehe.
Ta'e urezuka a'e wà xe.
Uruiko Zako izuapyapyr romo ure.
Umumaw ureywy wà no.