39
Mawiron ywy rehe har upyhyk Zeruzarez wà
1 Zeneki Zuta ywy rehe har wanuwihawete romo heko mehe 9 haw kwarahy rehe 10 haw zahy rehe Mawiron wanuwihawete Namukononozor ur wemiruze'eg zauxiapekwer nànàn Zeruzarez tawhu iàmàtyry'ym pà a'e kury.
2 Zeneki tuwihawete romo heko mehe 11 haw kwarahy rehe 4 haw zahy rehe 9 haw 'ar mehe uzapo ikwaruhu pàrirogawtàtà rupi teixe àwàm romo wà kury.
Zauxiapekwer wixe tawhu pe hupi wà kury, ipyhyk pà wà kury.
3 Zeruzarez ipyhyk mehe tuwihaw Mawiron wanuwihawete rehe we har paw ur uwenaw rehe wapyk pà wà kury, ukenawhu Myter pe har her ma'e huwake wà kury.
Na'aw amo waner xe wà:
Neregaw-Xarezer, Xagar-Nemo, Xerexeki, amo ae Nerugaw-Xarezer.
4 Tuwihawete Zeneki a'e, hemiruze'eg zauxiapekwer paw a'e wà no, wexak uzeapo ma'e kwer a'e wà.
Na'e uzeagaw tawhu wi uhem pà pyhaw wà kury.
Uhem oho pe tuwihawete ima'etymaw rupi har rupi wà.
Oho ukenawhu mokoz pàrirogaw imuzemogaw rupi wà no.
Uzàn oho Zotàw ywyàpyznaw ikutyr wà.
5 Nezewe rehe we zauxiapekwer Mawiron uzàn wanaikweromo wà.
Upyhyk Zeneki ywytyr heta 'ymaw Zeriko huwake har rehe wà.
Weraha tuwihawete Namukononozor pe wà.
Namukononozor wiko tawhu Himina her ma'e pupe a'e 'ar mehe a'e.
Amat ywy rehe tuz.
A'e pe wahem mehe Namukononozor umume'u Zeneki pe wemiapo ràm a'e kury.
6 Himina pe Mawiron wanuwihawete uzuka kar Zeneki ta'yr wanu henataromo a'e wà.
Uzuka kar tuwihaw Zuta ywy rehe har a'e pe a'e wà no.
7 Na'e ukutuk kar Zeneki heha zauxiapekwer wanupe kury.
Uzàpixipixi kar kyhàhàmtàtà itamorog iapo pyrer pupe no, Mawiron pe heraha kar pà wanupe no.
8 A'e ma'e izeapo mehe we zauxiapekwer umunyk tata tuwihawete hàpuzuhu rehe wà, teko wanàpuz rehe wà no.
Weityk pàrirogawtàtà Zeruzarez izywyr har wà no.
9 Nemuzàrànà zauxiapekwer Mawiron paw wanuwihaw a'e, weraha teko tawhu pupe hezar pyrer paw Mawiron pe a'e wà kury.
Amo Zutew izepyro wer umàno haw wi uzemuryparypar pà Mawiron wanehe wà.
Nezewe rehe we tuwihaw weraha a'e Zutew Mawiron pe a'e wà no.
10 Xo amo teko hemetarer 'ym ma'e wezar Zuta ywy rehe wà.
Naheta kwaw ma'etymaw wanupe.
A'e rupi tuwihaw omono uwà tyw wanupe.
Omono ywy wanupe no.
Umuhem kar Zeremi wà
11 Namukononozor Mawiron wanuwihawete uze'eg Nemuzàrànà pe herehe a'e kury.
12 — Eho Zeremi ipiaromo nehe.
Ezekaiw katu hehe nehe.
Epuraraw kar zo ma'erahy izupe nehe.
Ezapo hemimutar izupe nehe, i'i izupe.
13 Na'aw tuwihaw zauxiapekwer waneko haw wi hemuhem kar arer waner xe wà:
Nemuzàrànà: Nemuzàrànàmà tuwihaw ikàg ma'e, Neregaw-Xarezer tuwihaw ikàg ma'e, amogwer tuwihaw Mawiron wanuwihawete rehe we har paw wà.
14 Hemono Zenari Àikà ta'yr Xàpà hemimino pe.
Hereraha weko haw pe.
Nezewe aiko Zeruzarez pe teko wainuinuromo.
Zeremi umume'u Tupàn ze'eg Emene-Merek pe
15 Zauxiapekwer waneko haw pe hepyhyk mehe we Tupàn Tuweharupi Wiko Ma'e uze'eg ihewe a'e.
Eze'eg Emene-Merek Exio ywy rehe har pe nehe, i'i.
16 Tupàn Tuweharupi Wiko Ma'e upuner wera'u ma'e Izaew wazar uze'eg nezewe a'e, ere izupe nehe, i'i ihewe.
— Amume'u ko ma'e kwehe mehe ihe.
Narur kwaw ikatu haw 'aw tawhu pe nehe.
Arur putar imumaw paw izupe nehe, a'e kwehe mehe.
Azapo putar a'e ma'e heze'eg awer rupi katete ihe nehe.
A'e ma'e iapo mehe ereiko putar xe hexak pà nehe.
17 Nezewe rehe we ihe Tupàn Tuweharupi Wiko Ma'e oromonokatu putar ihe nehe.
Erekyze amo wanuwi ne.
Noromono kwaw a'e teko wanupe ihe nehe.
18 Urupyro putar ihe nehe.
Ereikuwe putar nehe, ta'e erezeruzar herehe ne xe.
Ihe Tupàn Tuweharupi Wiko Ma'e aze'eg kwez kury, i'i Emene-Merek pe.