46
Namukononozor weityk Ezit ywy rehe har Karakemi tawhu pe wà
1 Tupàn Tuweharupi Wiko Ma'e uze'eg ihewe teko ywy nànànar wanehe. 2 Uze'eg ihewe Nek Ezit ywy rehe har wanuwihawete hemiruze'eg zauxiapekwer wanehe. Tuwihawete Namukononozor Mawiron pe har weityk a'e zauxiapekwer Karakemi tawhu pe Ewparat yryhu huwake a'e wà. A'e ma'e uzeapo Zeoaki Zuzi ta'yr Zuta ywy rehe har wanuwihawete romo heko mehe 4 haw kwarahy rehe. Tupàn Tuweharupi Wiko Ma'e uze'eg nezewe Ezit ywy rehe.
3 Tuwihaw Ezit ywy rehe har uhapukaz nezewe wà.
— Pemuàgà'ym u'yw wi pemimaw nehe.
Peata zeàmàtyry'ymawhu pe nehe.
4 Pemono zuru pe har kawaru rehe nehe. Peapyk wakupe pe nehe.
Peata pezeirogatu pà nehe. Pemunehew peàkàg imimaw tàtà ma'e nehe.
Pemuaime katu penu'ywpuku nehe. Pemunehew pepuxi'a imimaw tàtà ma'e nehe no.
5 Ma'e aexak teko ihe, i'i Tupàn.
Ezit ywy rehe har uzàn ukyze pà wà.
Uzàn wà, ta'e ukyzeahy wà xe.
Uzàn na'arewahy wà.
Nume'e kwaw waikwer amo wà nehe.
6 Na'arewahy uzàn ma'e nupuner kwaw uzepyro haw rehe wà nehe.
Zauxiapekwer nupuner kwaw umàno haw wi uzepyro haw rehe wà.
Kwarahy heixe haw awyze har kutyr, yryhu Ewparat huwake uzepyapi u'ar pà wà.
7 Mo uzeupir wà iko yrykawhu Niru zàwe a'e.
Nuzawy kwaw yrykawhu tynehem ma'e. 'Y upyk ywy uzeiwyr har.
8 Ezit ywy a'e. Uzeupir Niru yrykaw ài a'e. Nuzawy kwaw yrykawhu ywy uzeiwyr har imuzeenar. — Azeupir putar ywy paw ipyk pà ihe nehe, i'i Ezit.
Amumaw putar tawhu ihe wà nehe. Azuka putar wapupe har ihe wà nehe no.
9 Ezit ywy rehe har wà.
Pemono kar kawaru pe wà nehe.
Pemuzàn kar ywyramawa zeàmàtyry'ymawhu pe pe wà nehe.
Pemono kar zauxiapekwer a'e pe pe wà nehe:
Awa Exio ywy rehe har wà, Irim rehe har wà no, Uzemimaw hereko har wà.
Awa Iru ywy rehe har wà, U'yw uwyrapar pupe imomor har wà.
10 Tupàn Tuweharupi Wiko Ma'e upuner wera'u ma'e wiko ko 'ar izar romo a'e.
Kutàri uzepyk putar purehe nehe.
Kutàri uzepyk putar wàmàtyry'ymar wanehe nehe.
Itakihepuku u'u putar a'e wà nehe,
te na'ipuruzuka wer kwaw amo rehe wà nehe.
U'u putar wanuwykwer nehe,
te uhyk putar izupe nehe.
Kutàri upuner wera'u ma'e uzuka putar wemipyhyk ma'ea'yr ài a'e wà nehe,
Ywy kwarahy heixe haw awyze har kutyr har rehe Ewparat yrykawhu huwake wà nehe.
11 Teko Ezit ywy rehe har wà, peho Zireaz pe no.
Pekar muhàg peho nehe.
Pepuhàg paw na'ikatu kwaw.
Ta'e naheta kwaw pema'eahy haw wi pemukatu haw xe.
12 Teko ywy tetea'u rehe har wenu waneitykaw imume'u haw wà.
Teko ywy nànànar wenu wanehapukaz mehe wà.
Amo zauxiapekwer uzepyapi amo rehe.
Mokoz u'ar ywy rehe wà.
Namukononozor ur waàmàtyry'ym pà
13 Namukononozor Mawiron ywy rehe har wanuwihawete ur Ezit iàmàtyry'ym pà. Tur mehe Tupàn Tuweharupi Wiko Ma'e umume'u ko ma'e ihewe a'e.
14 — Pemume'u ko ze'eg tawhu Ezit ywy rehe har nànàn nehe:
Miginow pe, Men pe, Tapinez pe.
— Pezemuàgà'ym pezepyro àwàm rehe nehe.
Peàmàtyry'ymar umumaw putar pema'e paw zeàmàtyry'ymawhu pe wà nehe.
15 Màràzàwe tuwe pezar tupàn ua'u upuner ma'e u'ar.
U'ar a'e, ta'e Tupàn Tuweharupi Wiko Ma'e weityk ywy rehe a'e xe, peze wanupe nehe.
16 Zauxiapekwer Ezit ywy rehe har uzepyapi u'ar pà wà.
Uze'eg uzeupeupe wà.
— Zaha na'arewahy nehe.
Zazewyr zanereko haw pe nehe, Zaneànàm wapyr nehe.
Nezewe mehe zazepyro putar zaneàmàtyry'ymar watakihepuku wi nehe.
17 Pemono ko her ipyahu ma'e Ezit wanuwihawete pe nehe.
Uze'eg ma'e wànoànog ma'e, i'i putar izupe wà nehe. — Awa wàmàtyry'ymar heitykaw rehe upuner 'ym ma'e, i'i putar izupe wà nehe.
18 Ihe Tuwihawete ihe, aiko ko ma'e imume'u har romo ihe.
Aiko Tupàn Tuweharupi Wiko Ma'e romo.
Tupàn Tuweharupi Wiko Ma'e herer romo ihe.
Upuner wera'u ma'e romo aiko.
Tamor aiha katu wera'u amogwer ywytyruhu wanuwi.
Ywytyr Karamew yryhu i'aromo hin a'e no.
Nezewegatete peàmàtyry'ym àràm ikàg wera'u pewi, Ezit ywy rehe har wà.
19 Teko Ezit ywy rehe har wà.
Pezemuàgà'ym nehe, peneraha putar wemipyhyk kwer romo wà nehe.
Tawhu Men uzeapo putar ywyxiguhu romo nehe.
Uzeapo putar heityk pyrer romo nehe. Naheta kwaw teko ipupe wà nehe.
20 Ezit nuzawy kwaw tapi'ak kuzà ipuràg eteahy ma'e.
Meruhu kwarahy heixe haw awyze har kutyr har wi ur ma'e kwer uxi'u oho.
21 Wanuwihawete omono temetarer amo zauxiapekwer wanupe puràmàtyry'ymaw hekuzaromo.
Nezewe rehe we na'ipuruzukaiwahy kwaw wà. Nuzawy kwaw tapi'ak ikyra katu ma'e wà. Na'ipuruzukaiw kwaw wà.
Na'ikàg kwaw zeàmàtyry'ymawhu pe oho àwàm rehe.
Uzewyr uzàn pà wà.
Ta'e iaiw haw i'ar uhem wà xe.
Uhem wamumaw paw 'ar wà.
22 Ezit uzàn oho wà. Uze'eg moz ài wà.
Ta'e zauxiapekwer uhem waiko wà xe.
Waàmàtyry'ymar uzàmàtyry'ym wà itazy pupe wà.
Nuzawy kwaw zepe'aw imonohokar wà.
23 Zawaiw katu a'e ka'a pupe teixe haw.
Weityk a'e ywyra paw wà.
Heta tetea'u awa wà.
Teko nupuner kwaw wapapar haw rehe wà.
Waàmàtyry'ymar zauxiapekwer waneta haw uhua'u wera'u tukur waneta haw wi.
24 Teko Ezit ywy rehe har wiko ikàg 'ym ma'e romo wà kury.
Ta'e teko kwarahy heixe haw awyze har kutyr har weityk a'e wà xe.
Ihe Tupàn Tuweharupi Wiko Ma'e aze'eg kwez kury.
25 Tupàn Tuweharupi Wiko Ma'e upuner wera'u ma'e Izaew wazar uze'eg kury.
— Azepyk putar Amon Tema wazar Ezit wazar rehe ihe nehe. Azepyk putar wazar wanehe nehe, wanuwihawete wanehe nehe no. Azepyk putar Ezit ywy rehe har wanuwihawete rehe nehe. Azepyk putar hehe uzeruzar ma'e wanehe paw rupi nehe no. 26 Mawiron wanuwihawete Namukononozor a'e, hemiruze'eg zauxiapekwer a'e wà no, ipuruzuka wer wanehe a'e wà. Amono putar wanupe ihe wà nehe. Nezewe rehe we amo 'ar pawire teko wiko putar Ezit ywy rehe wà nehe. Ihe Tupàn Tuweharupi Wiko Ma'e aze'eg kwez kury.
Tupàn upyro putar wemiaihu a'e wà
27 Heremiruze'eg Zako izuapyapyr wà, Pekyze zo nehe.
Teko Izaew wà, pepytuhegatu zo no.
Apupyro putar a'e teko ywy muite har wanuwi ihe nehe.
Peiko uma'ereko e ma'e a'e ywy rehe. Apupyro putar a'e wi nehe.
Pezewyr putar peywy pe peneko katu pà nehe.
Ni amo nuzapo kwaw ikatu 'ym ma'e peme wà nehe.
Ni amo napemukyze kar kwaw wà nehe.
28 Aiko putar penehe we pepyro pà nehe.
Apumuhàz ywy tetea'u rehe ihe.
Amumaw putar teko a'e ywy rehe har paw ihe wà nehe.
Napumumaw kwaw nehe.
Napezepyro kwaw hezepykaw wi nehe.
Nezewe rehe we penehe hezepyk mehe nazepykahy kwaw nehe.
Ihe Tupàn Tuweharupi Wiko Ma'e aze'eg kwez kury.