ZEMUGETA HAW PITÀI HAW
3
3–14
Izo omono ze'egaiw uzexak kar awer 'ar rehe
3
1-2 Iahykaw rehe Izo uze'eg kury. Omono uze'egaiw 'ar uzexak kar awer rehe. Na'aw Izo ize'eg awer xe.
3 Tuwe Tupàn omono ze'egaiw hezexak kar awer 'ar rehe nehe.
Tuwe Tupàn omono ze'egaiw a'e ipytunaw rehe nehe.
— Uzexak kar a'e, i'i a'e 'ar mehe wà. — Awa a'e, i'i wà.
4 Tuwe a'e 'ar uzeapo ipytunahy haw romo nehe.
Tuwe Tupàn ywate har nuzekaiw kwaw a'e 'ar rehe nehe.
Tuwe tatainy nuhyape pixik kwaw a'e 'ar rehe nehe.
5 Tuwe ipytunahy haw wiko izar romo nehe.
Tuwe ywàkun upyk nehe. Tuwe ywàkun umuwew kwarahy heny haw a'e 'ar rehe har nehe.
6 Tuwe a'e ipytunaw ipytunahy tuweharupi nehe.
Tuwe ukàzym 'ar ipapar haw wi nehe.
7 Tuwe a'e ipytunaw upyta umyrypar 'ym romo nehe, uzemumikahy ma'e romo nehe.
Tuwe ni amo nuenu kwaw amo urywete haw rehe wanehapukaz mehe wà nehe.
8 Amo paze ma'e ikàg wera'u àzàg Erewiàtà her ma'e wi wà.
Tuwe a'e paze ma'e omono uze'egaiw a'e ipytunaw rehe wà nehe.
9 Tuwe zahytata izi'itahy har a'e ipytunaw rehe har uwew wà nehe.
Tuwe uwàro tatainy nehe. Tuwe tatainy nur kwaw izupe nehe.
Tuwe na'iku'em pixik kwaw nehe.
10 Ta'e hemuzexak kar hehy pe a'e xe.
Nahemunyryk kwaw ko ma'erahy wi.
Màràzàwe tuwe nazexak kar kwaw umàno ma'e kwer ài ihe
11 Màràzàwe tuwe nazexak kar kwaw umàno ma'e kwer romo.
Màràzàwe tuwe namàno kwaw hezexak kar mehe.
12 Màràzàwe tuwe hehy hepyhyk u'uwaromo a'e.
Màràzàwe tuwe umur ukàm ihewe hemukamu kar pà ipupe.
13 Aze mo àmàno a'e 'ar mehe we,
Aker mo ko 'ar rehe.
Apytu'u mo ma'erahy ipuraraw 'ym pà.
14 Aiko mo tuwihawete wanehe we. Aiko mo tuwihaw upuner ma'e wanehe we.
A'e tuwihaw uzapo wi wàpuzuhu kwehe arer wà.
15 Aiko mo tuwihaw wanehe we.
A'e tuwihaw umynehem wàpuz or pupe wà, parat pupe wà no.
16 Aze mo hehy hezuka zemim hezexak kar 'ym mehe we a'e.
Naikuwe iwer mo ihe. Aiko mo kwarer 'ar hexak 'ymar ài.
17 Tywypaw pe upaw ikatu 'ym ma'e wanemimutar.
Ikene'o ma'e upytu'u a'e pe wà.
18 Imunehew pyrer upytu'u a'e pe uzeinuinuromo wà.
Nuenu kwaw uwihaw hehapukaz haw a'e pe wà.
19 Upuner ma'e wiko a'e pe wà. Upuner 'ym ma'e wiko a'e pe wà no.
Uma'ereko e ma'e kwer utyryk uzarer wanuwi wà no.
Màràzàwe tuwe hurywete 'ym ma'e wiko we wà no
20 Màràzàwe tuwe uzemumikahy ma'e wexak wiwi tatainy wà.
Màràzàwe tuwe teko nuzuka kwaw upy'a pupe uzemumikahy ma'e wà.
21 Uwàro umàno àwàm waiko wà. Nur kwaw a'e.
Uputar umàno àwàm temetarer tetea'u wi wà. Nezewe rehe we nur kwaw wanupe.
22 Uzetymaw pupe uwezyw mehe hurywete wà.
Hurywete azeharomoete wà.
23 Tupàn umuata kar hehàpyhà 'ym ma'e zàwe wà.
Umàmàn waiwyr paw rupi wà.
24 Namai'u kwaw ihe. Azai'o. Hekuhemaw uzeakook 'y ài.
25 Akyze amo ma'e uzeapo ma'e ràm wi ihe. Uzeapo tuwe a'e ma'e.
Akyze tuwe amo ma'e wi. A'e ma'e nuzawy kwaw tuwe hemugaz taw a'e.
26 Naiko kwaw zeàmàtyry'ymaw rehe. Naheta kwaw hepytu'u haw ihewe.
Naheawoawotahy kwaw zote ihe.