1 Na'e Izo uze'eg a'e kury.

2 Aze mo amo wexak iaiw ma'e ihewe uzeapo ma'e kwer ipuhuz haw wà, Aze mo omono heremipuraraw puhuz haw hexakaw rehe wà,

3 Azeharomoete ipuhuz katu wera'u ywyxig yryhu izywyr har wi wà.

A'e rupi aze'egahy ihe.

4 Tupàn upuner wera'u ma'e hezywa u'yw puruzuka haw hereko har pupe a'e.

A'e puruzuka haw wixe hepy'a pupe.

Heàmàtyry'ym awer pupe Tupàn hemynehem hekyzeahy haw pupe no.

5 Zumen hurywete ka'api'i i'u mehe a'e.

Tapi'ak nuze'egahy kwaw a'e, aze heta ka'api'i izupe a'e.

6 Temi'u xa 'ym ma'e na'ikatu kwaw teko wanupe.

Zapukaz hupi'a pupe har xig ma'e na'ikatu kwaw i'u mehe.

7 Nazuhez kwaw a'e ma'e ihe.

Heremi'u kwer paw uzapo ikatu 'ymaw ihewe no.

8 A, aze mo Tupàn umur hereminoz ihewe.

A, aze mo Tupàn uwazar heze'eg ihewe.

9 A'e mehe mo o'ok mo hereko haw ihewi.

Heàmàtyry'ym mo hemumaw pà no.

10 Aze mo akwaw a'e ma'e Tupàn hemiapo ràm,

Apoapor mo herurywete haw rehe. Aze mo apuraraw ma'erahy tetea'u,

Nezewe rehe we mo apoapor mo. Ta'e Tupàn ikatuahy a'e xe. Hemiapo kar paw ikatu ihewe.

11 Nahekàg kwaw ihe. Màràzàwe tuwe aikuwe ihe.

Naheta kwaw ma'e hàrogatu haw ihewe.

12 Aipo hekàg ita ài.

Aipo ita morog uzeapo heretekwer romo.

13 Napuner kwaw hezepytywà haw rehe ihe.

Naheta kwaw hepytywà àràm wà no.

14 Aze amo teko he'o nehe, tuwe imyrypar upuhareko a'e wà nehe.

Aze upytu'u Tupàn upuner wera'u ma'e wi ukyze re nehe,

Nezewe rehe we imyrypar upuhareko putar wà nehe.

15 Pe hemyrypar pe, Nahepytywà kwaw pe.

Azemumikahy peze'eg henu mehe.

Peiko yrykaw kwarahy mehe typaw ma'e kwer ài ihewe.

16 Izypy mehe tynehem 'y tàtà huwixàg ma'e pupe, 'y xig ma'e pupe no.

17 A'e re uzeapo 'yete romo.

A'e 'y ukàzym oho iko kwarahy haku haw iwy pe.

Te iahykaw rehe ywy 'y iwy pe har uxinig tàtà romo.

18 Wata haw rehe uzemono'og ma'e ukàzym 'y hekaekar pà wà.

Wata oho waiko ywyxiguhu rupi wà. Umàno a'e pe wà.

19 Teko Tema wi ur ma'e kwer wà, Xama wi ur ma'e kwer wà no,

Wekar a'e yrykaw oho waiko 'y hexak àwàm hàrogatu pà wà.

20 Uhem mehe uzemumikahy paw rupi wà.

Hàrogatu haw umàno wanuwi a'e pe.

21 Peiko a'e yrykaw ài.

Pexak ma'erahy heremipuraraw. A'e rupi pekyze.

22 Aipo ainoz ma'e peme.

— Pemur ma'e ihewe nehe, aipo a'e peme.

23 — Hepyro pe heàmàtyry'ymar wi nehe, aipo a'e peme.

— Imunar ma'e wanuwi hepyro pe nehe, aipo a'e peme.

24 Hemu'e pe nehe. A'e mehe naze'eg kwaw nehe.

Pexak kar heremiawy kwer ihewe nehe.

25 Aze amo umume'u ze'eg azeharomoete har, teko uzeruzar hehe wà.

— Ikatu 'ym ma'e erezapo Tupàn henataromo ne, peze ihewe. Napemume'u kwaw ze'eg azeharomoete har.

26 Aipo peze'eg zemueteahy wer heze'eg rehe.

Aipo awa ma'erahy ipuraraw har ize'eg nuzawy kwaw ywytu peme.

27 Aze mo heta tu 'ym ma'e pepo pe,

Peme'eg mo hemetarer katu wera'u ma'e pe.

Te pemyrypar peme'eg mo amo pe uma'ereko e ma'e ràm romo wamuigo kar pà.

28 Peme'egatu hereha rehe nehe.

Na'e — Neremu'em iko, peze ihewe nehe.

29 Pemuzewyr kar penemimume'u kwer nehe.

Peiko zo herehe hemu'em ma'e romo nehe. Hemono kar zo pe zepykaw pe nehe. Ze'eg azeharomoete har amume'u teko ihe.

30 — Hemu'em ma'e, peze peiko ihewe.

Aipo akwaw ikatu ma'e iapo haw ihe.

Aipo akwaw ikatu 'ym ma'e wi hetyrykaw.