1 Izo uze'eg a'e kury.

2 Akwaw ma'e nezewe izeapo haw ihe.

Ma'e azapo putar hekatu haw hexak kar pà Tupàn pe.

3 Mo upuner Tupàn pe ukatu haw imume'u haw rehe.

Tupàn upuner miw puranu haw iapo haw rehe.

Ni amo nupuner kwaw ipuranu haw iwazar haw rehe wà.

4 Ohoete ima'e kwaw katu haw 'yryhu ài.

Ipuner haw uhua'u a'e no.

Mo upuner iàmàtyry'ymaw rehe wà. Mo upuner heitykaw rehe wà.

5 Umunyryk kar ywytyruhu teko wanupe imume'u 'ym pà.

Wekwahy haw rehe umumaw a'e ywytyruhu.

6 Tupàn umur kar ywy iryryryryz haw. Ywy uryryryryz a'e mehe.

Weityk ywy izyta no.

7 Tupàn umume'u kwarahy ihem 'ym àwàm. Na'e kwarahy nuhem kwaw.

Umuwew zahytata wà no.

8 Tupàn a'e zutyka'i upir ywak iko a'e.

Upyrog ywy yryhu izywyr har rehe.

9 Tupàn uzapo zahytata wamono'og pà zemono'ogaw romo wà:

Zàwàruhu ur her ma'e uhua'u wera'u ma'e, na'iruz Mari, 7 àràpuhàràna'yr.

Uzapo zahytata kwarahy ihemaw awyze har kutyr har wà no.

10 Tupàn uzapo ma'e uhua'u ma'e wà, ikatuahy ma'e wà no.

Hemiapo kwer purumupytuhegatu kar ma'e nupaw pixik kwaw wà nehe.

11 Tupàn ukwaw heywyr a'e. Naexak kwaw ihe.

Wata oho iko. Naenu kwaw.

12 Aze Tupàn ipurupyhyk wer amo ma'e rehe nehe,

Mo upuner ipyro haw rehe izuwi nehe.

— Ma'e erezapo iko, ni'i kwaw amo izupe wà, ta'e upuner wera'u wanuwi a'e xe.

13 Tupàn nuzewyr kwaw wikwahy haw wi.

Àzàg Haaw her ma'e imyrypar u'ar heityk pyrer romo ipy huwake wà.

14 Aipo aiko upuner ma'e romo ihe. Aipo apuner Tupàn pe ize'eg iwazar haw rehe.

Ma'e pe aexak putar ze'eg izupe imume'u pyràm nehe.

15 Aze ma'e ikatu 'ym ma'e iapo 'ymar romo aiko, nezewe rehe we nawazar iwer mo ize'eg izupe.

Wiko heremiapo kwer imume'u har romo a'e. Hezepuhareko kar haw zo ainoz izupe ihe. Nainoz kwaw amo ma'e izupe.

16 Aze mo ainoz tàmuzgwer wanenataromo nehe, aze mo ur a'e,

Nezewe rehe we nuenu iwer mo heze'eg.

17 Tupàn hezuhaw ywytuaiw àmàn inuromo har pupe a'e.

Umueta tetea'u e heperew.

18 Nahemupytuhem kar kwaw.

Umynehem hereko haw iro haw pupe no.

19 Aipo hekàg ihe. Ikàg wera'u a'e.

Aipo ainoz putar tàmuzgwer wanenataromo ihe nehe. Mo umur kar putar nehe, aze natur wer kwaw nehe.

20 Aiko ikatu 'ym ma'e iapo 'ymar romo, aze mo a'e,

Nezewe rehe we heze'eg hemono kar mo zepykaw pe.

— Ikatu 'ym ma'e iapo har, i'i mo ihewe.

21 Naiko kwaw ikatu 'ym ma'e iapo har romo. Nezewe rehe we nazekaiw kwaw hereko haw rehe.

Hekene'o hereko haw wi.

22 Ma'e paw uzezàwezàwegatu.

A'e rupi, — Tupàn umumaw ikatu ma'e ikatu 'ym ma'e wainuinuromo a'e wà, a'e hezeupe.

23 Aze na'arewahy amo iaiw haw uzuka teko ikatu ma'e wà,

Tupàn upuka.

24 Tupàn omono ywy ikatu 'ym ma'e wapo pe.

Upyk tuwihaw waneha pàn pupe no.

Aze Tupàn nuiko kwaw a'e ma'e iapo arer romo, mo wiko a'e ma'e iapo arer romo a'e.

25 He'ar uzàn wera'u awa uzàn ma'e wi.

Nezewegatete he'ar upaw na'arewahy no. Upaw turywete haw hexak pixik 'ym pà.

26 Hereko haw wata oho kanu iàkwen ma'e ài.

Nuzawy kwaw wiràhu tapixi rehe uzemomor ma'e.

27 Apuner hema'eahy wi hereharaz haw rehe ihe.

Apuner hezemumikahy haw hezar haw rehe herurywete haw pe hezewyr pà nehe.

28 Nezewe rehe we heremipuraraw hemukyzeahy kar na'arewahy a'e.

Ta'e akwaw Tupàn ima'enukwaw paw ihe xe. Naiko kwaw ikatu 'ym ma'e iapo 'ymar romo henataromo ihe.

29 Aiko ikatu 'ym ma'e iapo har romo henataromo.

A'e rupi napuner kwaw ma'e iapo pà hezeagaw haw rehe.

30 Zàmàw nupuner kwaw hekatu 'ymaw ihez haw rehe ihewi.

Zàmàw ikàg wera'u ma'e nupuner kwaw ikatu 'ym ma'e heremiapo kwer imukatu haw rehe nehe.

31 Tupàn hereityk to'om pupe a'e.

Hero te hekamir pe.

32 Tupàn nuiko kwaw teko romo hezàwe.

A'e rupi napuner kwaw ize'eg iwazar haw rehe izupe.

Nurupuner kwaw urezeàmàtyry'ymaw imukatu haw rehe tàmuz wanenataromo.

33 Naheta kwaw tuwihaw heremiapo kwer

Tupàn hemiapo kwer rehe we har imume'u àràm wà.

34 O Tupàn, epytu'u herehe nezepyk ire nehe.

Hemynehem kar zo pe nepurumukyzeahy kar haw pupe nehe.

35 A'e mehe aze'eg putar hekyze 'ym pà nehe.

Ta'e — Ikatu 'ym ma'e iapo har, ni'i kwaw hepy'a ihewe xe.