11
Zopar uze'eg putar kury
11
Nerehe Tupàn izepykaw ipixika'i wera'u purehe izepykaw azeharomoete har wi
Zopar Nama pe har uze'eg putar xe a'e nehe kury.
 
Aipo ni amo nuwazar kwaw a'e neze'eg tetea'u awer newe wà nehe.
Aipo uze'eg tetea'u ma'e wiko xo ze'eg azeharomoete har imume'u har romo wà.
Izo. — Nuwazar kwaw heze'eg ihewe wà nehe, aipo ere iko nezeupe.
— Heze'eg urywahyahy haw umupytu'u kar herehe we har waze'eg ire nehe, aipo ere iko nezeupe.
— Heze'eg ikatuahy, ere iko nezeupe.
— Aiko ikatu 'ym ma'e iapo 'ymar romo Tupàn henataromo ihe, ere iko.
Aze mo Tupàn uze'eg, ikatu mo ihewe.
Aze mo uwazar neze'eg newe, ikatu mo ihewe.
Nemu'e mo ma'ekwaw katu haw rehe a'e.
Ta'e heta ma'e temigwaw 'ym tetea'u xe, ma'e imume'u haw inuromo xe.
Nezewe mehe mo erexak Tupàn nerehe izepykaw.
Nerehe izepykaw ipixika'i. Upuner mo zepykaw uhua'u ma'e pupe nerehe uzepykaw rehe, ta'e uhua'u neremiapo kwer ikatu 'ym ma'e xe.
Nanekàg kwaw Tupàn zàwe ne
— Apuner Tupàn ima'enukwaw paw uzeàmim ma'e kwer ikwaw paw rehe ihe, ere iko nezeupe.
— Apuner Tupàn upuner wera'u ma'e ikwaw katu haw rehe ihe no, ere iko nezeupe.
Upuner ywak wi uhemaw rehe. Ywak nupyhyk kwaw Tupàn a'e.
Nezewe rehe we nerepuner kwaw a'e pe nehemaw rehe.
Tupàn ukwaw umàno ma'e kwer wapyta haw.
Nerekwaw kwaw ne.
Uhu wera'u ywy wi.
Uhua'u wera'u yryhu wi no.
10 Aze Tupàn ukwaw ko rupi nehe, aze upyhyk amo nehe,
Aze weraha hemiapo kwer imume'u haw pe nehe,
Mo upuner imupytu'u kar haw rehe heraha re wà.
11 Tupàn ukwaw teko ikatu 'ym ma'e wà.
Tuweharupi wexak wakatu 'ymaw.
12 Aze ru'u zumen hehaite ma'e uzexak kar putar hehaite 'ym ma'e romo wà nehe.
A'e 'ar mehe teko iranaiw ma'e wereko putar ma'e kwaw katu haw wà nehe.
Ezar katu 'ygwer, i'i a'e
13 Izo, eruwak nepy'a Tupàn ikutyr nehe.
Eze'eg izupe nepue'eg pà nehe.
14 Eityk ikatu 'ymaw nepo imupihunar nehe.
Emupyta kar zo katu 'ymaw neràpuz me nehe.
15 Nezewe mehe ereata putar neàkàg hupir pà nehe,
Nekatu pà nekàg pà nekyze 'ym pà nehe.
16 Nanema'enukwaw kwaw ma'erahy neremipuraraw rehe nehe.
Nuzawy kwaw 'y kwe rupi uwyryk ma'e kwer nehe. Zanereharaz izuwi.
17 Nereko haw uhyape katu wera'u putar kwarahy wapytepe hin mehe har wi nehe.
Ne'ar ipytunahy wera'u ma'e a'e, nuzawy kwaw kwarahy uhem romo ma'e kwer nehe no.
18 Nereko haw ikatu putar nehe. Tynehem putar ma'e hàrogatu haw pupe nehe no.
Tupàn nepyro putar katu 'ymaw wi nehe. Ereker katu putar ma'e rehe nezemupy'a 'ym pà nehe no.
19 Nepytu'u mehe ni amo ma'e nanemukuhem kwaw nehe.
Teko tetea'u ur putar upytywà àwàm henoz pà newe wà nehe no.
20 Ikatu 'ym ma'e uzareko ikatu ma'e hàro 'ym pà wà.
Nuexak kwaw uzàn àwàm wà. Xo umàno àwàm zo uwàro waiko wà.