1 Màràzàwe tuwe Tupàn upuner wera'u ma'e numume'u kwaw teko wanemiapo kwer ikatu 'ym ma'e imume'u àwàm 'ar.

Màràzàwe tuwe numume'u kwaw wemiruze'eg wanemiapo kwer imume'u àwàm 'ar.

2 Heta awa ita ywyzaw hexak kar haw imunyrykar wà.

Nezewe umuhua'u uiwy wà.

Imunar amo heimaw àràpuhàràna'yr wanehe, weimaw wainuromo wamono pà wà.

3 Weraha zumen kwarer tu 'ym ma'e wanuwi wà.

Upyhyk tapi'ak kuzà imen umàno ma'e kwer waneimaw wà, aze a'e kuzà unewer temetarer rehe wanupe wà.

4 Imunar hemetarer 'ym ma'e wama'e rehe wà.

Ma'e hereko har 'ym uzàn wanuwi uzeàmim pà wà.

5 Hemetarer 'ym ma'e

Wata ywyxiguhu rehe zumen hehaite ma'e ài wà,

Uwa'yr wanemi'u ràm hekar pà wà.

6 Naheta kwaw ma'e hemetarer 'ym ma'e wanupe. A'e rupi uma'ereko ikatu 'ym ma'e wanemi'u ràm imono'og pà wà.

Upyhyk uwa wanupe wà.

7 Pyhaw tuwixàg mehe naheta kwaw zewànaw wanupe.

Naheta kwaw tuwixàgaw wi wazemuaku haw wanupe.

8 Ywytyruhu rehe wata mehe àmàn umuàkymahy wà.

Wekar àmàn wi uzeàmimaw itahu iwype wà.

9 Iaiw ma'e upyhyk kwarera'i tu 'ym ma'e uma'ereko e ma'e romo wamuigo kar pà wà.

Aze ma'e hereko 'ymar unewer temetarer a'e iaiw ma'e wanupe wà, upyhyk wana'yr wemetarer hekuzaromo wà, uma'ereko e ma'e romo wamuigo kar pà wà.

10 Hemetarer 'ym ma'e wata waiko kwe rupi ukamir 'ym pà wà.

Upaw etea'i wama'e wanuwi. Uzuhez arozràn ipo'o haw rehe uma'ereko mehe wà.

11 Weruwaruwak ita iapu'a ma'e ikawer iàmi pà uri wi wà, ikatu 'ym ma'e wanupe uma'ereko pà wà.

Upyropyrog uwà rehe tykwer iàmi pà wanupe no.

Umàno uwi'u 'ymaw wi uma'ereko mehe wà.

12 Ikutuk pyrer ikixi pyrer umàno etea'i ma'e wà, uhapukaz tawhu pupe wà.

— Urepytywà pe nehe, i'i wà.

Nezewe rehe we Tupàn nuenu kwaw wà.

13 Iaiw ma'e na'iakatuwawahy kwaw tatainy rehe wà.

Wape nànàn wata mehe ma'e paw iapo mehe nuputar kwaw tatainy wà.

14 Upuruzuka ma'e upu'àm izi'itahy hemetarer 'ym ma'e izuka pà.

Pyhaw wiko imunar ma'e romo.

15 Wemireko 'ym puhe oho ma'e ràm uwàro ipytunaw. Umim uwa.

Nezewe mehe ni amo nuexak kwaw huwa wà.

16 Imunar ma'e wixe amo hàpuz pupe pyhaw wà.

Nuhem kwaw wata pà 'aromo wà.

Ta'e tatainy na'ikatu kwaw wanupe xe.

17 Ukyze tatainy 'aromo har wi wà.

Ipytunaw numukyzeahy kar kwaw wà.

18 Zopar uze'eg putar a'e nehe kury.

'Y uwyrykahy ma'e weraha awa ikatu 'ym ma'e a'e.

Tupàn omono uze'egaiw iziwy rehe.

Nuzewyr kwaw oko pe ma'ywa tyw pe uma'ereko pà.

19 'Yxig huwixàgahy ma'e typyràn kwarahy mehe haku mehe.

Nezewegatete ikatu 'ym ma'e iapo har ukàzym putar ywy wikuwe ma'e waneko haw wi nehe no.

20 Te ihy na'ima'enukwaw kwaw hehe.

Merua'yr u'u ho'o kwer wà. Ikatu wanupe i'u mehe.

Teko paw heharaz izuwi wà.

Tupàn umumaw ikatu 'ym ma'e iapo har ywyra u'ar ma'e wer ài.

21 Agwer ma'e uzeapo izupe a'e, ta'e nupytywà pixik kwaw kuzà imen umàno ma'e kwer a'e wà xe.

Nupuhareko kwaw kuzà umemyr haw rehe upuner 'ym ma'e wà no.

22 Tupàn umumaw ikatu 'ym ma'e upuner haw pupe wà.

Uzapo ma'e a'e iaiw ma'e waneko haw imumaw pà.

23 Tupàn umuigo kar wà, ikatu 'ymaw imunyryk kar pà wanuwi wà.

Nezewe rehe we ume'egatu wanehe.

24 Iaiw ma'e umumaw amo 'ar hemetarer katu ma'e romo wà.

Na'arewahy uxinig ka'api'i ài wà.

Nuzawy kwaw arozràn haryw imonohok pyrer wà.

25 — Nan kwaw nezewe, aipo amo upuner u'e haw rehe wà. — Neremume'u kwaw ze'eg azeharomoete har,

Aipo amo upuner u'e haw rehe ihewe wà.