2 Minaz, nahekàg kwaw ihe. Naheta kwaw hekàgaw ihewe kury.

Hepytywàgatu pe iko ne. Hemurywete katu kar pe iko no.

3 Erekwaw katu pureruze'egatu haw.

Eremumaw putar nema'ekwaw paw hemu'e mehe nehe.

4 Mo nepytywà a'e ze'eg imume'u mehe.

Mo nemuze'eg kar nezewe.

5 Minaz uze'eg putar kury. — Umàno ma'e kwer uryryryryz ukyze haw rehe

'y ywy iwy pe har pupe wiko mehe wà.

6 Umàno ma'e kwer wapyta haw uzewàpytymawok Tupàn henataromo.

Naheta kwaw ipykaw. Upuner wyzài a'e pe uzeapo ma'e hexakaw rehe.

7 Tupàn upupirar ywak ma'e heta 'ymaw i'aromo.

Umupyta kar ywy ma'e heta 'ymaw i'aromo no.

8 Upyhyk 'y ywàkun pupe.

'Y numu'i kwaw ywàkun ipuhuz haw pupe.

9 Umim zahy huwa huwahu mehe,

Ywàkun ipupirar pà i'aromo.

10 Tupàn umuapyk iapu'a ma'e yryhu mytepe a'e,

Tatainy imunyryk kar pà ipytunaw wi a'e.

11 Aze uze'egahy ywak izyta wanupe,

Izyta ukyze uryryryryz pà wà.

12 Tupàn wiko yryhu izar romo upuner haw rupi.

Uma'ekwaw katu haw pupe wiko àzàg Haaw her ma'e izar romo no.

13 Izupy haw pupe Tupàn umukatu ywak.

Mozuhu uzàn izuwi. Opo pupe uzuka a'e moz.

14 Tupàn upuner ma'e tetea'u iapo haw rehe, wyzài ikàg ma'e iapo haw rehe.

Xo màràn zo amume'u kwez xe peme.

Mo upuner ipuner haw uhua'u haw ikwaw paw rehe wà.