28
Uze'egatu ma'e kwaw katu haw rehe
28
Teko uhàwykàz amo ywy rehe parat henuhem pà wà.
Teko umupyràn itazu or ikatu 'ymaw henuhem pà izuwi wà.
Wenuhem ita per ywy wi wà no.
Umupyràn ita itazu komiri henuhem pà izuwi wà no.
Ihàwykàz mehe weraha tatainy ywy kwar pupe wà.
Wekar ita hekuzar katu ma'e ywykwar ohoete ma'e pupe wà no.
Ipytunahy haw pupe wekar ita wà.
Muite tawhu wi wanekon wà.
Ni amo noho kwaw a'e pe wà.
Uhàwykàz ywy ita hekuzar katu ma'e hekar pà wà.
A'e zutyka'i uma'ereko a'e pe wà.
Uzaiko a'e pe uwauwak pà wà, ko rupi wà, kwe rupi wà.
Wa'aromo arozràn hezuz ywy rehe.
Iwy pe ywy uzekazeka uzemu'imu'i pà.
Heta ita hekuzar katu ma'e xapir her ma'e a'e itahu pupe.
Teko wexak or ywyku'i inuinuromo wà no.
Wiràhu nuexak kwaw pe ywykwar piar wà.
Kàkà nukwaw kwaw wà no.
Zàwàruhu iriàw wà, amo miar ipuruzukaiwahy ma'e wà no,
Nuwezyw pixik kwaw a'e pe rupi wà.
Awa uhàwykàz ita tàtàahy ma'e wà.
Uzaikaw ywytyruhu ywy rehe imumew pà wà.
10 Uhàwykàz itakwar iapo pà wà.
Wekar wyzài ita hekuzar katu ma'e ihàwykàz mehe wà.
11 Uhàwykàz oho wiko wà, te uhem ytyzuzàmaw yryhu kutyr uwyryk ma'e pe wà.
Werur a'e imim pyrer tatainy haw pe wà.
Ma'e kwaw katu haw ikatuahy haw
12 Nezewe rehe we nuexak kwaw ma'e kwaw katu haw wà.
Ma'e pe wexak putar wà nehe. Ma'e pe ma'e kwaw paw hekon a'e.
13 Teko nukwaw kwaw ma'e kwaw katu haw ikatu haw wà.
Nuexak kwaw ko ywy rehe wà.
14 Yryhu uhua'u ma'e uze'eg nezewe a'e. — Nuiko kwaw xe a'e, i'i a'e.
Yryhu uze'eg nezewe a'e no. — Nuiko kwaw xe a'e, i'i a'e no.
15 Ikatu wera'u or wi a'e.
Teko numekuzar kwaw parat hekuzarer rehe wà nehe.
16 Aze teko omono'og or ikatu wera'u ma'e wà, nezewe rehe we nupuner kwaw ma'e kwaw katu haw ime'eg kar haw rehe wà.
Aze omono'og ita hekuzar katu ma'e wà: agata her ma'e, xapir her ma'e, nezewe rehe we nupuner kwaw ime'eg kar haw rehe wà.
17 Ikatu wera'u or wi. Ikatu wera'u ita hekuzar ma'e wi no.
Teko nupuner kwaw ime'eg kar haw rehe ita hekuzar katu ma'e pupe wà, ni or ikatuahy ma'e wà.
18 Ita koraw her ma'e nahekuzar katu kwaw. Ita kiritaw nahekuzar katu kwaw no.
Teko nupuner kwaw ma'e kwaw katu haw ime'eg kar haw rehe a'e ita pupe wà. Ikatu wera'u ita perura her ma'e wi.
19 Ikatu wera'u ita topaz her ma'e Exio ywy rehe har wi.
Ikatu wera'u or ikatuahy wera'u ma'e wi no.
Tupàn zo ukwaw ma'e kwaw katu haw heta haw a'e
20 Ma'e kwaw katu haw a'e, ma'e wi tur a'e.
Ma'e pe hekon.
21 Ni amo wikuwe ma'e nupuner kwaw hexakaw rehe wà.
Ni wiràmiri ywak rehe uwewe ma'e wà.
22 Purumumaw paw a'e, màno haw a'e no,
Nezewe uze'eg izupe wà. — Nuruexak kwaw ure. Xo imume'u haw zo uruenu, i'i wà.
23 Xo Tupàn zo ukwaw izupe uhemaw.
Xo a'e zo ukwaw ipyta haw.
24 Ta'e wexak ywy muite wera'u har a'e xe.
Wexak ma'e ko ywy rehe uzeapo ma'e paw rupi katete a'e no.
25 Tupàn omono wakàgaw ywytu wanupe.
Omono uhua'u haw yryhu pe no.
26 Umume'u àmàn ikyr àwàm.
Wexak kar ywytu àmàn inuromo har iho àwàm izupe no.
27 A'e 'ar mehe wexak ma'e kwaw katu haw a'e.
Ikatu izupe.
28 Na'e uze'eg teko wanupe.
— Aze peneko wer ma'e kwaw katu har romo nehe, pekyze pezar wi nehe.
Aze pepurukwaw katu wer ma'e rehe nehe, petyryk ikatu 'ymaw wi nehe no, i'i wanupe.