9
Teko umume'u wemiapo kwer ikatu 'ym ma'e wà
7 haw zahy rehe 24 haw 'ar mehe teko Izaew izuapyapyr uzemono'og mai'u 'ymaw iapo pà wemiapo kwer ikatu 'ym ma'e rehe uzemumikahy haw hexak kar pà wà kury. Utyryk amo ae ywy rehe har wanuwi a'e 'ym mehe wà. Uzemumikahy haw hexak kar haw rehe umunehew pàn iànàm ma'e ma'eryru iapo pyr wà. Omono ywy uwàkàg rehe wà no. Na'e upu'àm wemiapo kwer ikatu 'ym ma'e imume'u pà wà kury, uwipy wanemiapo kwer ikatu 'ym ma'e imume'u pà wà no. Amo umumaw na'iruz or uzar Tupàn Tuweharupi Wiko Ma'e ize'eg imugeta pà teko wanupe wà. A'e re umumaw amo na'iruz or wemiapo kwer ikatu 'ym ma'e imume'u pà Tupàn Tuweharupi Wiko Ma'e imuwete katu pà wà.
Amo awa upu'àm ywyrapew Erewi izuapyapyr wapyta haw rehe uzar Tupàn Tuweharupi Wiko Ma'e pe uze'eg wahyhaw rupi wà. Na'aw waner xe wà: Zezua, Mani, Kazimiew, Xemani, Muni, Xeremi, Mani, Kenani.
Amo Erewi izuapyapyr wenoz teko wamuwà Tupàn imuwete katu kar pà wanupe wà. Na'aw waner xe wà: Zezua, Kazimiew, Mani, Azaminez, Xeremi, Oni, Xemani, Petai. — Pepu'àm pezar Tupàn Tuweharupi Wiko Ma'e ikatu haw imume'u pà nehe, i'i wanupe wà. — Pemume'u ikatu haw tuweharupi nehe, azeharomoete nehe. Tuwe teko paw umume'u her ikatuahy ma'e ikatu haw wà nehe. Nezewe rehe we imume'u katu haw nuhyk pixik kwaw nehe, i'i wanupe wà.
Umume'u wemiapo kwer ikatu 'ym ma'e Tupàn pe wà
Na'e teko Izaew uze'eg nezewe Tupàn pe wà kury.
 
O Tupàn, xo ne zo ereiko Tuweharupi Wiko Ma'e romo ne.
Erezapo ywak. Erezapo zahytata no.
Erezapo ywy. Erezapo yryhu no. Erezapo yryhu rehe har paw rupi ne wà no.
Eremonokatu teko paw wamuikuwe kar pà ne wà.
Ywak rehe har wapyk upenàràg rehe nemuwete katu pà wà.
 
Ne, o Tupàn Tuweharupi Wiko Ma'e, erexak Àmàràw.
Erepyro Ur tawhu wi Mawiron ywy ywy wi ne.
Amo ae her eremono izupe: Àmàrààw
Nanereityk kwaw a'e. Erexak heko haw.
A'e rupi erezapokatu neze'egaw hehe we.
— Amono putar amo teko wazuapyapyr waiwy peme ihe nehe, ere izupe. — Kànàà izuapyapyr waiwy,
Etew izuapyapyr waiwy, Amohe ywy rehe har waiwy,
Perize izuapyapyr waiwy,
Zemu izuapyapyr waiwy, Zirikaze izuapyapyr waiwy.
Nezuapyapyr wiko putar a'e ywy rehe a'e wà nehe, ere izupe.
Erezapo ma'e neze'eg rupi katete ne, ta'e ereiko uze'eg rupi katete ma'e iapo har romo ne xe.
 
Ureipy upuraraw ma'erahy tetea'u Ezit ywy rehe wiko mehe wà. Erexak ipuraraw mehe ne wà.
— Urepyro pe nehe, i'i newe wà. Ereinu henoz mehe ne wà,
Yryhupiràg izywyr waneko mehe ne wà.
10 Erezapo ma'e purumupytuhegatu kar haw ikatuahy ma'e
Ezit ywy rehe har wanuwihawete henataromo,
hehe we har tuwihaw wanenataromo no,
hemiruze'eg wanenataromo no.
Erepuraraw kar ma'erahy wanupe. Ta'e erekwaw neremiaihu wanupe wanemipuraraw karer ne xe.
A'e ma'e iapo re teko paw ukwaw nerer wà,
te ko 'ar rehe wà.
11 Eremuza'ak 'y yryhu mokoz ipegwer romo ureipy wanuwi ne. Nezewe mehe uwahaw yryhu ywy ikàg ma'e rehe wata pà wà. Erezumim wanaikweromo ur ma'e kwer 'y typy ma'e pupe ne wà. Nuzawy kwaw ita yryhu puruzuka haw pupe u'ar ma'e kwer wà.
12 Eremono kar amo ywàkun wanenataromo 'aromo ne, waho àwàm hexak kar pà wanupe ne.
Pyhaw eremono kar tata iaiha ma'e wanenataromo no.
Uhyape waho àwàm hexak kar pà wanupe.
13 Erewezyw ywak wi Xinaz ywytyr rehe.
Ereze'eg neremiaihu wanupe.
Eremono neze'eg ikatu ma'e wanupe. Eremono purumu'e haw azeharomoete har wanupe no.
14 — Pemonokatu mytu'u haw 'ar ihewe nehe, ere wanupe.
Eremono neze'eg neremiruze'eg Moizez pe. Umume'u a'e ze'eg ureipy wanupe.
15 Eremur typy'ak ywate har wanupe wama'uhez mehe.
Eremuhem kar 'y itahu wi waiwez mehe no.
Eremuigo kar ko ywy izar romo ne wà.
Eremume'uahy ko ywy wanupe kwehe mehe.
 
16 Ureipy wiko wera'u wà.
Upytu'u nereruzar har romo wiko re wà. Na'ipureruzar wer kwaw neze'eg rehe wà.
17 — Nureruzar kwaw neze'eg nehe, i'i newe wà.
Heharaz neremiapo kwer paw wi wà.
Heharaz purumupytuhegatu kar haw neremiapo wer wi wà no.
Wiko wera'u wà, a'e rupi wexak amo uwihaw wà.
Urereraha wi pe Ezit pe nehe, i'i izupe wà.
Heko wer wi amo pe uma'ereko e ma'e romo wà.
Nezewe rehe we ereiko Tupàn teko wanemiapo kwer ikatu 'ym ma'e wi heharaz ma'e romo ne.
Nekatuahy ne. Puramutar ma'e romo ereiko.
Mewe katu erekwahy purupe.
Nepurupuhareko haw uhua'u.
A'e rupi na'urereityk kwaw pe ne.
18 Umupyràn itatàtà tapi'ak awa hagapaw romo iapo pà wà.
— Tupàn urezar, i'i hagapaw pe wà.
— Urepyro pe Ezit ywy wi ne, i'i izupe wà.
O Tupàn, uze'eg zemueteahy nerehe wà.
19 Nezewe rehe we nereityk kwaw ywyxiguhu heta haw pe ne wà.
Ta'e nepurupuhareko haw uhua'u xe.
Neremunyryk kwaw ywàkun wanuwi. Neremunyryk kwaw tata iaiha ma'e wanuwi no.
A'e ma'e wexak kar waho àwàm wanupe 'aromo, pyhaw no.
20 Eremur nerekwe ikatu ma'e wanupe.
Nerekwe umu'e wanemiapo ràm rehe wà.
Eremur mana ywak wi wanemi'u romo.
Eremur 'y wanupe wai'uwez haw imumaw pà no.
21 Eremumaw 40 kwarahy ywyxiguhu rehe wamuigo kar pà ne.
Uhyk ma'e wanupe paw rupi.
Wama'e na'iaiw kwaw wanuwi.
Wapy nahezun kwaw.
 
22 Eremur teko waiwy neremiaihu wanupe. Eremur tuwihaw waiwy wanupe no.
Eremur wanuwake har waiwy wanupe no.
Izaew upyro Ezemon waiwy wà.
Xeom wiko Ezemon ywy rehe har wanuwihaw romo.
Upyro Màxà waiwy wà. Og wiko Màxà ywy rehe har wanuwihawete romo.
23 Eremur wazuapyapyr wanupe wà. Wazuapyapyr waneta haw
nuzuawy kwaw zahytata ywak rehe har waneta haw.
Ererur xe ko ywy rehe wamuikuwe kar pà ne wà.
Eremume'uahy ko ywy waipy wanupe kwehe mehe.
24 Upyro Kànàà izuapyapyr waiwy wà.
Ereityk teko a'e ywy rehe wiko ma'e ne wà.
Eremur nekàgaw neremiaihu wanupe. A'e rupi upuner wemimutar iapo haw rehe wà,
teko Kànàà ywy rehe har wanupe wà, wanuwihawete wanupe wà no.
25 Neremiaihu upyro tawhu wà. Pàrirogawtàtà iaiha ma'e umàmàn a'e tawhu waiwyr.
Upyro ywy ikatu ma'e wà. Upyro tàpuz temetarer pupe tynehem ma'e wà no.
Upyro ywykwar 'y rehe we har romo iapo pyrer wà.
Upyro amo ma'e wà no: Uri 'yw, ma'e'a 'yw, ma'ywa tyw.
U'u ma'e wemimutar paw wà. Te ikyra katu wà.
Upyro ikatu ma'e neremimur kwer paw rupi katete wà.
 
26 Nezewe rehe we neremiaihu nereityk neze'eg heruzar ire upytu'u pà wà.
Uzewyr newi wà, uzewyr neze'eg wi wà no.
Uzuka neze'eg imume'u har wà. Neze'eg imume'u har umume'u ikatu ma'e wanemiapo ràm wà. — Pezewyr Tupàn pe nehe, i'i wanupe wà.
Neremiaihu uze'eg zemueteahy tetea'u nerehe wà.
27 A'e rupi erepyhyk kar waàmàtyry'ymar wanupe ne wà.
Eremuigo kar waàmàtyry'ymar wanuwihaw romo ne wà.
Ma'erahy ipuraraw mehe uze'eg newe wà. — Urepytywà pe nehe, i'i newe wà.
Ywak rehe nereko mehe erewazar waze'eg wanupe.
Erepuhareko katu ne wà. A'e rupi eremur kar tuwihaw wanupe ne wà.
Tuwihaw upyro neremiaihu waàmàtyry'ymar wanuwi wà.
28 Zeàmàtyry'ym 'ymaw izewyr mehe neremiaihu uzapo wi ikatu 'ym ma'e wà.
Ereityk kar wi waàmàtyry'ymar wanupe ne wà.
Uzemumik wi wemiapo kwer ikatu 'ym ma'e rehe wà.
— Urepyro pe nehe, i'i wi newe wà.
Waze'eg mehe erenu ne wà. Ereinu wiwi tuweharupi ne wà.
Erepyro ne wà, ta'e erepuhareko katu ne wà xe.
29 — Peruzar hepurumu'e awer nehe, ere wanupe.
Wiko wera'u wà. A'e rupi weityk neremiapo kar wà.
Uzapo ikatu 'ym ma'e neze'eg heruzar 'ym pà wà.
Neze'eg heruzar haw weraha teko wanekuwe àwàm pe wà.
Nezewe rehe we nuweruzar kwaw wà. Nereityk wà.
Nanereruzar kwaw wà. — Nuweruzar kwaw neze'eg nehe, i'i newe wà.
30 Kwarahy nànàn ereze'eg wanupe. Iàrew nekwahy haw.
Eremur kar nerekwe neze'eg imume'u har wanupe.
Neze'eg imume'u har umume'u wanemiapo kwer ikatu 'ym ma'e wanupe.
Nezewe rehe we neremiaihu wà, wiko ma'e henu 'ymar romo wà.
A'e rupi eremuigo kar teko amo ae ywy rehe har ne wà, neremiaihu wazar romo ne wà.
31 Erepuhareko katu ne wà.
A'e rupi nereityk kwaw ne wà. Neremumaw kwaw ne wà.
Ereiko Tupàn upurupuhareko katu ma'e romo. Ereiko Tupàn ikatu ma'e romo.
 
32 O Tupàn urezar, nehua'u wera'u ne.
Eremukyze katu teko ne wà. Erepuner wera'u no.
Erezapo tuwe neremiapo ràm purupe neremimume'u kwer no.
Kwehe mehe Axir ywy rehe har wiko urezar romo a'e wà.
A'e 'ar mehe arer we urupuraraw ma'erahy tetea'u ure.
Ureruwihawete wà, ureruwihaw wà no,
xaxeto wà no, neze'eg imume'u har wà no,
ureipy wà, ureànàm paw wà no, paw rupi katete
urupuraraw ma'erahy tetea'u ure.
Nema'enukwaw ureremipuraraw rehe nehe.
33 Nekatu urerehe nezepyk mehe.
Uruzapo ikatu 'ym ma'e ure. Nezewe rehe we na'urereityk kwaw pe ne.
34 Ureipy wà, ureruwihawete wà no,
ureruwihaw wà, xaxeto wà no,
nuweruzar kwaw neze'eg wà. Nuweruzar kwaw neremiapo kar wà. Nuzekaiw kwaw neze'eg rehe wà.
35 Tuwihawete weruze'egatu neremiaihu wà, ta'e ereruze'egatu kar wanupe ne wà xe.
A'e teko wikuwe ywy uhua'u ma'e rehe wà, wanupe neremimur kwer rehe wà.
Nezewe rehe we nanemuwete katu kwaw wà.
Nuzemumikahy kwaw wemiapo kwer ikatu 'ym ma'e rehe wà.
36 Ko 'ar rehe uruiko amo pe uma'ereko e ma'e romo ureiwy neremimur kwer rehe ure kury,
ko ywy ikatuahy ma'e ureremi'u imur har rehe ure kury.
37 Ko ywy rehe hezuz ma'e i'a kwer omono kar tuwihawete wanupe.
Eremuigo kar a'e awa tuwihawete romo ne wà, a'e rupi upuraraw kar ma'erahy urewe wà.
Ta'e uruiko ikatu 'ym ma'e iapo har romo ure xe.
Uzapo wemimutar urewe wà, tapi'ak urereimaw wanupe wà no.
Uruzemumikahy ure. Urupurarawahy ma'erahy uruiko no,
i'i wà.
Umuapyk teko uze'egatu haw pape rehe wà
38 A'e rupi ure Izaew ure, uruzapokatu ureze'egaw uruiko pape rehe imuapyk pà ure kury. Ureruwihaw wà, Erewi izuapyapyr ureinuinuromo har wà, xaxeto ureinuinuromo har wà, umuapyk putar uwer a'e pape rehe wemiapo ràm imume'uahy pà a'e wà nehe.